#هشتجة

نعم للاستثمار الرياضي ولا للاستحمار الرياضي
#صاحب_الكورة
يا د.برادعي مفيش تويتة علي ڤيروس سي أو العشوائيات ولا الكيبورد عندك بيحدف شمال
#الشباب_يامني
ازاي متدين بطبعه وأعلي مشاهدة عنده لسما المصري
#مش_متدين_بطبعه
الدوري بجمهور يا زكي قدرة، الدوري من غير جمهور يا زكي قدرة
#مين_زكي_قدرة
انتوا فاكرين إن التنمر في مصر بين الأطفال، نو ابسولوتلي، التنمر عندنا بين الكبار
#شعب_متنمر_بطبعه
مين دي يا بابا؟ دي اسمها معددة يا حبيبي زمان كانت بتردح في الشارع ودلوقت بتشتغل في الإعلام الرياضي
#ردح_أوڤر
الإعلام المصري مش عايز وزير، إعلامنا عايز حانوتي
#علي_فين_ياهوي
ابنك شغال في إيه يا حاج ؟
في الطاقة
براڤو، ويا تري في الطاقة النووية ولا الشمسية؟
لأ، ابني بيوزع طاقة سلبية
#كفاية واتغطوا بملاية
الأدب فصلوه عن العلم
#بالصاد
عايز توقف حال أي مشروع في مصر، شكل له لجنة، أما لو عايز تدمر الصناعة كلها، فشكل لها مجلس قومي.
#لجنة الشنكل
اكتشف العلماء أن مواطني 6 أكتوبر يقضون ثلثي عمرهم علي المحور بينما يقضي مواطنو التجمع 90 % تقريبا من عمرهم علي الدائري.
#اللهم_طيارة
ليه الأمم المتحدة تصرف وتكلف جمعية عامة كل سنة، طالما ممكن تذيع جمعية السنة اللي قبلها وأكيد محدش هيلاحظ أي فرق.
#الأمم_المش_متحدة
الحكومة لازم تصدر قرارا بتقسيم سبتمبر ل 3 شهور والناس تقبض فيه 3 مرات قبل الشهر وبعده.
#رأس_السنة_السبتمبرية
المجهود الذي بذل من نساء مصر لجمع معلومات كافية عن زوجة الفيشاوي يفوق ما قدمه السي أي إيه والكي چي بي وسكوتلاند يارد من مجهودات في ال 150 سنة الأخيرة.
#الحاسة التاسعة
ترامب كان ناقص يوّقف تاكسي لإردوغان ويقول له خد عمك الحاج إردو معاك وابقي نزله عند موقف نيو يورك _ اسطنبول.
#طريق_الندامة_ياابو_إردو
المشكلة إنك أول ما بتقبض المرتب بتحس إنك نجيب ساويرس، لكن بعد ساعتين بتكتشف إنك نجيب........ فول وطعمية وكتر الشطة وحياة والدك عشان ننسي.
#أين_مرتباتي
أنا خايف علي الناس اللي دخلوا السوق العقاري بغرض التسقيع، فجأة يلاقوا نفسهم في مرحلة التجميد.
#اوعي_الفقاعة
اسمع كلامك عن حال البلد اصدقك،
اشوف عربيتك الجديدة استعجب !!!!
#بلاش - انته