#هشتجة

عالمصري دور ......

مقعزيزي الرجل اللي مصمم يعاير زوجته بجمال ممثلات الجونة، بصة واحدة في المراية هتحل المشكلة خصوصا لما تفهم أن المدام اتجوزتك عشان تكسب فيك ثواب....#لا تعايرني ولا اعايرك.
بعيدا عن أن سبتمبر هو الشهر الوحيد في السنة اللي فيه 195 يوم و3 أسابيع ويجي 7000 ساعة، إلا أنه كمان بالنسبة للأسرة المصرية محتاج موازنة السعودية والكويت والإمارات والبحرين مجتمعين !!! #سنة سبتمبر.
الحاجة الوحيدة اللي محدش جاب سيرتها في مهرجان الجونة السينمائي هي...... السينما، هل هو مهرجان الجونة المش السينمائي أم التغطية الإعلامية هي السبب ؟؟؟ #أين_سينماتي
أعتقد أن زيارة المصالح الحكومية لاستخراج أي أوراق رسمية تفوق في ثوابها زيارة دور رعاية اليتامي والمسنين لأنها........#تكفير ذنوب.
اللي بيحصل في الإعلام الرياضي ده...... عيب وحرام يا سعادة البيه #مايصحش_كده
هو التوكتوك ده ابن مين في مصر ؟؟؟
#توكتوك_ولابزنس
الفرخة عايزة قمحة والقمحة في الجبل، والإعلام عايز وزير والوزير في المدينة #هيكل_الإعلام
عمرو محمود ياسين... لما الموهبة تنفجر في وشك وتكتشف أن ابن الوز فنان
#نصيبنا وقسمتنا.
احنا وصلنا لمرحلة التفكير في وزارة جديدة للرد علي الشائعات يكون دور الوزير فيها أنه يطلع كل يوم في التليفزيون يحلف عالمصحف والإنجيل وبالطلاق أن مفيش حاجة من دي حصلت.
#كفاية ارحموها.
اللي يقولك إن الإعلام بره بيتطور وبيعمل منصات، قول له وماله ما احنا كمان بنتطور وبنعمل مصاطب.
#ياخسارة.
انتوا فاكرين اننا شعب متدين بطبعه ؟؟ نو ابسولوتلي.
احنا شعب متدين بمنشوراته علي السوشيال ميديا فقط.
#سبحتك_يامعلم_سلطان
اسمع كلامهم عن الفقاعة العقارية أصدقهم، أشوف قوايم الحجز في مشروعاتهم الجديدة استعجب.
# فقاعة آخر زمن
بعض العاملين في الجهاز الإداري مش عايزين قانون الخدمة المدنية، دول عايزين قانون مكافحة الإرهاب.
#مدام_عفاف_فوريڤر