حكايات سريعة

منذ فتره ليست بطويلة، دعت لي أمي بقولها »ربنا ما يعلق قلبك بحاجة مش من نصيبك»‬، وقتها لم أفكر في تلك الكلمة، وأكملت يومي بقولي »‬بيس بيس».. ولكن في الحقيقة عندما بدأت التفكير في تلك الكلمات وجدت أن مجرد التفكير في الأمر مرهق بدنيًا ونفسيًا بطريقة كبيرة، بل هو متعب جدًا للروح بشكل غير محتمل..ففي الحقيقة فكرة أن تتعلق بشئ ليس لك من البداية ولن يكون لك في النهاية، أو أن تتعلق بشئ خسرته وانت متأكد أنه لن يعود لك في النهاية، كمن يتعلق »‬بخيط دايب» ويحاول الصعود به إلي الأعلي، فآجلًا أو عاجلًا ستسقط إلي سابع أرض.. حاول أن تخرج مما أنت فيه وأن تخرج ذلك الشئ أو الشخص من عقلك، فلا تحب شخصا يجعلك ثاني اهتماماته، فإما أن تكون الأول أو أن ترحل في هدوء، وإن كان مفهومك عن الحب هو التنازل فاعلم أن الحب في الأساس هو حدوتة كرامة.
في إحدي المرات كنت مع صديق لي في المستشفي.. شاهدت موقفا سيظل محفورا في ذاكرتي مدي الحياة طول عمري... راجل عجوز عنده حوالي 70 سنة شايل مراته ومخليها ساندة عليه رغم انه مش قادر يمشي علي رجله.. مستحملها وشايلها كأنه عنده 20 سنة وباصص لها بكل حب وحنان وبيدعيلها تقوم بالسلامة وتقف علي رجليها تاني عشان يعرفوا يخرجوا مع بعض زي ايام زمان.. بيقولها انا فاكر لما وقفتي جمبي وانا عيان وفضلتي تخدميني وانا عمري ما هسيبك غير لما أموت.. بجد موقف خلاني اراجع كل حياتي عشان لازم اختار صح.. اختاروا إللي هيكمل حياتوا معاكوا صح عشان لما توصلوا للسن ده تلاقوه جمبكوا عشان إللي بيحب هو إللي بيضحي عشانك ويقف جنبك ويتحملك ويساندك في ازماتك ومشاكلك وتعبك وانك مهما كنت مبهورا بالشكل والمنظر لازم تختار إللي يحبك بجد وخلي بالك ان انبهارك ده ممكن يخليك متشوفش إللي بيحبك بجد.
واحد صاحبي مبقالوش هو ومراته 6 شهور متجوزين قابلتهم وقعدت معاهم... طول مهو قاعد عمال يبصلها ويضحك وبيشكر فيها وفي اخلاقها ويرفع مقامها.. خدته علي جنب وقعدت معاه في مكان لوحدنا.. ايه ياعم عمال تشكر في مراتك وتقول عنها غالية وطيبة.. انت خايف منها ولا ايه وبعدين انت مش كنت بتحب واحده قبلها ولما بعدتوا قولتلي عمر قلبي ما هيدق تاني ولا هعرف احب غيرها خلاص !.. قالي كنت مغفل مين قال ان الانسان ميعرفش يحب غير مرة ؟!.. تصدق بالله..انا ربنا عوضني بواحده تتحط ع الجرح يطيب.. محترماني وصيناني وشيلاني فوق دماغها.. عاملة زي المغناطيس عمالة تشد قلبي نحيتها لحد لما وقعت في حبها.. بتفهمني من نظرة عنيا.. وكانت بتحبني من زمان وانا ولا انا هنا.. الست اللي قاعدة برة دي يا عمرو انا فعلاً ندمان اني معرفتهاش من زمان والحمد لله اني خسرت اللي قبلها كل يوم بحمد ربنا انه جعلني اخسرها علشان يعوضني بست البنات.. ثم مين قال الحُب مرة في العُمر بس ؟! مبيعرفش حاجة.. الحب بيجي بالمودة والرحمة والتفاهم.. صدقني انا بموت فيها مبحبهاش بس.
خلاصة الأمر أن ربنا بيعوض بياخد بس عشان يعطي الحاجة الحلوة اللي متأذيش.. الشئ اللي انت فاكره كويس وراح هتيجي يوم وتقول الحمد لله دا كويس قوي انه راح.. ارضي بمقسومك وتأكد تمامًا ان الخير جاي من وسع بتخسر حاجة لأن وقتها ربنا بيدبرلك من نصيبك حاجات أحسن تكسبها.