مقامات حلمنتيشي

عم قفة .. والأطرش في الزفة !!

قال عم قفة متظاهراً بالعبط / رغم أنه مكار ولبط / ذهبت لقهوة المنظر الجميل / والتقيت بصديقي المعلم خليل / اللي سمعة تقيل / وبعد السلام علي أهالي الحتة الجدعان / دار بيني وبينه حوار الطرشان / فهو أطرش وأنا عبيط / فكان كلامنا كله بزرميط / وإليكم عينة / علي سبيل البينة / سمعت آخر خبر / بتقول إيه؟ مبارك صحته في خطر/ بقولك مبارك في الجنايات / بتقول مين اللي مات؟ / هو حسين سالم لسة هربان / يا سلام هو فيه أحلي من لحم الغزلان / أنت من السلفيين وللا المحظورة ؟ / متشكر ما بحبش آكل طاطورة / أنت فاهم حاجة من اللي بيحصل؟ / قصدك إيه بالفيلسوف الأهطل؟ / هل ستختار للرئاسة عمرو موسي؟ / قلت لك ما بحبش الكوسة / طيب إيه رأيك في د.مصطفي البرادعي؟ / مين؟ أوباما ابن الحاج برعي/ بقولك البرادعي/ طيب ما تصلي وتدعي / إلاّ رأيك إيه في الائتلاف؟ / هاته أنت فاكرني هاخاف / بقولك شباب ائتلاف الثورة / مين اللي متهم بالمؤامرة ؟/ هل ستشارك في الحوارالوطني؟ / أنت عاوز مراتي تمرمطني / الفوضي بقت في كل اتجاه / حد حايشك ماتروح دورة المياه / تيجي نزور الوزراء في المزرعة / مش عيب تقول لي البس بردعة / سوزان عملت قسطرة / إيه ؟ سوزان عاوزه حجاب ماركة طرة / الواد سمعة هايروح التحرير يوم الجمعة / مالها سنيه ولعة ؟ / بقولك سمعة هيعمل مظاهرة مليونية / سمعة عاوز يصيّف في المنوفية !/ بقولك مظاهرة مليونية / ما أنا عارف أن فيه بلاعات مستخبية / بيقولوا نتنياهو رايح يحج / بتقول إيه؟ العرب واخدين حقنة بنج / تعرف أن الفلول جمع فلة / وليه عاوزين يقطعوا الفانلة ؟/ هو احنا ناقصين / نبقي عريانين وجعانين / طيب خد عندك هذا الخبر المثير / د.شرف هايصلي الجمعة في التحرير / إيه د.شرف هايموّت الصراصير / بقولك ها يصلي في التحرير / هايقطع لمين ودانه والمناخير؟ / بقولك هايصلي في التحرير / إيه ؟ نظيف نايم علي السرير / طيب ما تعرفش حاجة يا معلم / عن سر اختفاء بطرس غالي المجرم؟ / معقولة غالي هايتجوز نانسي عجرم!/ تعرف أن البلد داخلة علي مجاعة / قلت لك ما بحبش الصياعة / سيضربون بيد من حديد كل مستفز / حديد؟ هو فيه أحلي من حديد عز / يريدون تقسيم مصر إلي دولتين / خلال قرن أو قرنين / قرن غزال وللا قرن ثور / وللا نعمل زار للديكتاتور / بقولك دولة للمسلمين وأخري للنصاري / طبعاً لازم يقولوا لأهل الحارة / ويقرأوا الفاتحة علي روح اللي غرقوا في العبّارة / يا جدع اسمع بقي / وبلاش تريقة / وبطل في قرعتك تهرش / ما أنا سامع أنت فاكرني أطرش / بس أنت زهقتني يا خليل / أنت اللي تبطل تهبيل / يبقي أكيد أنت بتسمع وبتستهبل / ليه أنت شايفني عمال أريّل / أنا سامع وفاهم كل حاجة / بس حاطط أعصابي في ثلاجة/ عملاً بالمثل طنش تعيش / وتاكل قراقيش / ثم أنشدني هذا الشعر الحلمنتيش: الفوضي صارت في كفّه / وبلادي صارت في كفه / قد دختُ وداخت أفكاري .. ودماغي قد لفّت لفّه / وفسادٌ منفلتٌ يجري ... يجعلني أشعر بالهفّه / والأحسن ياقفة أني .. أبقي كالأطرش في الزفه.