عاليا ابنة الشهيد: أبي استشهد من أجل الوطن بكلمات مبللة بالدموع قالت عاليا الطفلة ابنة العشر سنوات.. انا فخورة انني ابنة الشهيد ياسر الحديدي.. واعلم جيدا ان بابا في الجنة.. في مكان احسن مني آلاف المرات.. وهذا فقط هو اللي مصبرني علي فراقه.. واضافت عاليا الطفلة الرقيقة ان حق بابا مش هيروح.. زمايله هيجيبوه.. مصر فيها ابطال كثير زي بابا الشهيد البطل.. قبل ما يموت بنص ساعة اتصل بيا وسألته هتيجي امتي قاللي بعد بكره انا جي يا عاليا.. قولت له يا بابا وحشتني قوي قوي انا خلصت امتحان وعاوزة اشوفك.. قاللي انا باحارب الارهابيين يا عاليا ولو ان جيت مين هيحاربهم.. ثم اكملت عاليا في لهجة كلها تحد قائلة: بابا سابني وحيدة انا وماما.. وانا مش هسيب حقه انا هدخل كلية الاعلام وهكمل وادخل اكاديمية الشرطة وابقي ضابط لازم اخذ حق بابا.. انا هكبر واعوض ماما عن الحزن والاسي اللي شافته.. انا باقول للرئيس السيسي ربنا يخليك لينا يا ريس يا اللي دايما فاكر الشهداء وأولادهم وبتسألوا علينا علي طول.. واضافت الطفلة عاليا أنا في سنة خمسة وطالعة سنة سادسة وانا مبسوطة اوي من ان الرئيس السيسي كرم بابا اللي وحشني اوي والرئيس حضني وباس راسي وقاللي يا عاليا انا عارف ان مفيش حاجة هتعوضك عن بابا الشهيد البطل بس احنا معاكي طول العمر واي حاجة تحتاجيها انا تحت امرك يا عاليا.. واضافت الصغيرة عزائي ان بابا حي في الجنة وحاسس بينا وانا زي ما وعدته قبل ما يموت هذاكر واتفوق دايما عشان يفرح بيا هناك عند ربنا.. وعزائي كمان ان مصر كلها ابطال هياخدوا حق كل الشهداء وكل ما يموت شهيد في الف غيره بيطلعوا يكملوا المسيرة وياخد حق الشهداء الابطال اللي زي بابا.