وعد فأوفى.."لكنه وصل شهيدًا "

السلام عليكم يا أخويا.. أخبارك إيه؟ وحشتنى أووى..، "أزيك ياباشا.. أخبارك إيه يا حبيبى".. الحمد لله، إيه الأخبار عندكو طمنى عليك وعلى بابا وماما..،"الحمد لله يا حبى كله تمام.. طمنى أنت عليك".. الحمد لله رايح كمين أبو رفاعى بالشيخ زويد..، "رايح فين؟ مابلاش"،.. ياعم هم 10 أيام وهنزل، بس مش تقول لأمى أو أبويا، أنا هبلغهم أما أنزل إجازة بطريقتى، الدنيا هنا حلوة وأمان من بير عبد.
إدينى أمى بقى، بس إوعى تقولها إنى روحت الشيخ زويد.." ثوانى.. معاك أهى"، السلام عليكم يا أمى.. وحشتينى..، ازيك يا محمد عامل إيه يا حبيبى.. الحمد لله، أنا بخير مش تقلقى هنزل أفطر معاكو الأربعاء أو الخميس اللى جاى.. بس إدعيلى يا أمى أوى إن ربنا ينصرنا على أعداء الوطن..، "ربنا يحفظك يا ابنى أنت وال زيك".
أختى أخبارها إيه والواد ابنها اللى شبهى كبر ولا لسه.. "كلهم يا حبيبى كويسين وبيسلموا عليك أوى.. خلى بالك أنت من نفسك".. أخذتينى فى الكلام يا أمى، ونستينى أسال عن الحاج، "هنا أهو خده معاك".. إزيك يا حاج؟.. أخبارك إيه؟.. إدعيلى يا حاج أوى، "الحمد لله يا محمد يا حبيبى.. قلقتنى عليك يا ابنى".. يا حاج أنا الحمد لله وما تقلقشى.. ابنك راجل ولو مت هكون شهيد وعريس فى الجنة، إن شاء الله، وهتكون أنت أبو الشهيد اللى ضحى بنفسه علشان مصر، وأمى هتكون أم البطل.. بس أمانة عليك يا أبويا لو مت ما تخليش أمى تعيط أو تزعل.. خليها تفرح وتزغرد وتزف جثمانى إلى مثواه الأخير.. "يا إبنى ما تقولشى كدا".. يا حاج هو أنا أطول أكون شهيد.. ياريتها تتحقق علشان أكون فخر ليكو ولمصر.
العيال أصحابى.. بتشوف حد فيهم.. سلملى عليهم أوى وقولهم محمد بيسلم عليكو يا ولاد.. وهتشوفوا راجل دفعتكو ال قاعد بيحرسكوا على الحدود وأنتوا نايمين فى بيتكم، الخميس القادم .
بالفعل جاء يوم الخميس، ولم يخلف محمد وعده لوالدته أو لأصدقائه، ونزل قريته لكى يشاهده الجميع ليس فقط عائلته أو أصدقاؤه، حيث خرجت القرية عن بكرة أبيها لاستقبال محمد، أقصد الشهيد، أقصد العريس، لكى يزفوا جثمانه إلى مثواه الأخير وسط زغاريد سيدات القرية اللاتى خرجن ليرافقن أم البطل أثناء زفها لجثمان ابنها المغطى بعلم مصر .
الشهيد لم يترك لوالده أو لوالدته وصية أو جوابا فى "أفروله"، ولكنه ترك شهادة أحد الجنود، الذى أخبر والده ووالدته بأن ابنهم شهيد وهذا يظهر فى العلامات، التى ظهرت عليه من النور الذى يخرج من وجهه والدماء، التى استمرت فى السيل من جسده حتى تسليم جثمانه والرائحة الطيبة، التى تخرج منه، لدرجة أن الجندى خشى على جثمان الشهيد من الحسد، هذا إلى جانب أنه دفع بحياته ثمنا فى الدفاع عنه وعن وطنه والتضحية بنفسه حتى يعيش زملاؤه وأنه رغم إصابته فى بداية هجوم الأعداء عليهم، إلا أنه قام وتقدم الجنود لملاحقة الأعداء حتى انتهت الذخيرة، وسقط أثناء تأمين زملائه وفاضت روحه إلى بارئها.
افرحى يا أم الشهيد، ابنك مات بطل، مات راجل، استشهد وهو بيدافع عن أرضه وعرضه وإخواته، افرحى يا أم البطل ابنك مات صايم، الشهيد دخل قبره والمؤذن بيقول الله أكبر، افرحى يا أمى ابنك عريس فى الجنة، اصبرى وافرحى بمنزلته عند الله، إنه ورفاقه من الشهداء عن ربهم فى أعلى منازل الجنة مع النبيين والصديقين، افرحى بأن التاريخ سيذكره دائما وكل الشهداء فى صفحاته بأنهم لقوا ربهم أثناء دفاعهم عن أوطانهم.