تحرّك أبا الهولِ .. هذا الزمان .. تحرّك ما فيه ، حتي الحَجَر ! (أمير الشعراء) حاجات شبه الحاجات من كتر ما كدبنا علي روحنا, ما بقيناش عارفين روحنا, نبص في مراياتنا نلاقي ملامحنا هيه هيه ملامحنا, بس احنا مش احنا, عايشين حياة شبه الحياة اللي بيعيشها البني آدمين في كل بلاد الله, بس ما هيش نفس الحياة, بنعمل حاجات شبه الحاجات, بس مش هيه الحاجات نفسها, وزمان في السبعينيات من القرن اللي فات, كان عندنا نظرية هزلية, انا وصاحب عمري الفنان صلاح السعدني واخونا الكبير بهجت قمر, اشمعني يعني آينشتين عنده نظرية النسبية !, احنا كمان كان عندنا النظرية الشبهية, يعني تشوف مثلا قصيدة لشاعر بيقولوا عليه كبير, مليانة ألفاظ بيقولوا عليها شاعرية, وصور مالهاش دعوة ببعض إنما توهمك ان ياما هنا وياما هناك, وعروض وقوافي ومزيكا داخلية ولا مزيكة حسب الله, بس ان دققت شوية فيها, لا ح تلقي تجربة شعورية تعايشها وتصحي مشاعرك المنسية, ولا رؤية تنور لك حياتك المطفية, يعني باختصار شعر شبه الشعر, بس مش شعر بصحيح, وده اللي كنا احنا التلاتة نقول عليه حاجة شبه الحاجة بس مش حاجة, وتأكيد لنظرية الشبهية اللي شايفينها حوالينا ف كل مكان, في الخطابات التاريخية اللي بره التاريخ, والزعامات السياسية اللي لاهي زعامات ولا سياسية, والحياة الاجتماعية اللي لاهي حياة ولا اجتماعية, والاقتصاد اللي مفروض يبقي ف خدمة المجتمع, وبقي – بحكم نظرية الشبهية – بيسرق المجتمع ويهدمه, والحقيقة ان نظرية الشبهية والحاجات اللي شبه الحاجات مش بتنطبق بس علي الناس اللي فوق, لأ.. دي سرحت زي السوس في البلد وناسها, وبعد ما كان العمل عبادة, بقت البلادة عادة, ووقعنا من قعر قفة الإنسانية ! والشيء العبقري ف ثورة 25 يناير, انها دقت جرس الحقيقة, والناس صحيوا وعرفوا ان الحياة اللي كانوا عايشينها شبه الحياة ومش حياة, وان النظام اللي بيحكمهم مش نظام طاله الفساد, لأ ده فساد عمل لنفسه نظام, وان الكبار اللي حاكمينهم لا هم كبار ولا أد حكم بلد أد مصر, وبعد ما عاش الشعب المصري عقود أو قرون راضي بدور الرعية, غاية ما يتمناه ان ربنا يولّي من يصلح, أدرك انه الشعب السيد في وطن سيد, وانه هوه اللي بيولّي وهوه اللي بيعزل, والمشكلة دلوقت ان رباية الزمن القديم, من الناس اللي فوق, مُصِرِّين يرجّعونا نعيش في إطار نظرية الشبهية, ويبقي عندنا تغيير كده وكده, وديمقراطية نص كم, وعدالة ظالمة, ومجتمع متناحر, وإعلام يشوه الوعي ويكويه, وثقافة بزرميط (ضلامي علي تنويري), بس علي مين يابا ؟! جرس الحقيقة مش ح يبطّل دق, ومش عايزين حاجات شبه الحاجات, وتسقط نظرية الشبهية. كام وقفة.. وكام سؤال الوقفة الأولي, مع منع النشر في قضايا قتل وتعذيب, المتهم فيها بعض عناصر الشرطة!! والسؤال : ليه ؟! وايشمعني ؟!, هيه الداخلية وشرطتها علي راسهم ريشة ؟!, ما احنا عارفين ان خطأ أي حد أو حتي خطيئته, حاجة ما تمسش الجهة أو الفئة أو الطايفة اللي بينتمي لها الحد ده, وعارفين كمان ان الداخلية وشرطتها ارتكبوا أخطاء وخطايا في حق الشعب المصري قبل يناير وبعد يناير, ولازم يتحاسبوا عليها من غير ما نهدهم, ولازم نلاقي الصيغة الصحيحة اللي نعيد بيها تأهيل هذه الأجهزة, ومن غير كده تبقي الأخطاء والخطايا دي جريمة في حق المستقبل اللي عايزينه لبلدنا. والوقفة التانية, مع قصرإحالة قضايا الرشوة والاختلاس وإهدار المال العام, لرئيس الوزراء أو من يفوضه ! والسؤال : مش ده يحمي الفساد, ويدي حصانة للفاسدين ؟!! وتالت وقفة مع حديث الرئيس من حوالي عشر أيام, ووعده بالإفراج عن أول مجموعة من الشباب الأبرياء المحبوسين ظلم, والسؤال: آدي اسبوع فات وداخلين ع التاني, والرئيس قال خلال أيام, لا قال أسابيع ولا شهور, إيه يا تري اللي أخّر الإفراج عن الشباب ؟ ومين اللي بيعطّل تنفيذ أوامر الرئيس وقراراته ؟!!! والوقفة الرابعة مع لقاء رمضان عبد الله شلح مع القيادة السياسية ف مصر, بعد اعتبار حماس منظمة إرهابية, ورجوعه لغزة واجتماعه مع هنية وكلام هنية الطيب عن مصر وجيشها, هل اللقاء ده له علاقة بإعادة حماس تموضعها ف قلب المقاومة وحلفها المعادي للمشروع الصهيو أمريكي في المنطقة ؟ وهل ح نشوف تغييرات قريبة في المكتب السياسي لحماس تسمح بعودة علاقاتها مع مصر وإيران ؟! والوقفة الخامسة مع قانون الكيانات الإرهابية الأخيرة ؟! ايه لزومه ؟ ! ما احنا عندنا ترسانة قوانين بتعالج الحكاية دي ! ويا خوفي لا يودينا تطبيق القانون ده لمزيد من التضييق علي الحريات العامة ومنظمات المجتمع المدني. أوراق قديمة سنة 2009.. بعت لي الصديق المخرج الأستاذ أحمد صقر مسلسل الأشرار, اللي كتب له السيناريو والحوار الأستاذ مصطفي ابراهيم عن قصة للدكتور عمرو عبد السميع, وكتبت له أشعار المقدمة والنهاية, ولحنها فنان شاب موهوب هو خالد جودة, وآدي أشعار الغنوتين : (1) زي الندي وبنتخلق أطهار وبنتولد أخيار كما النوّار زي الهوا ...................وبننطلق أحرار وندور في دوامة زمن دوّار وليل يجر نهار ...............يشدنا التيار ومجبورين نختار يا نبقي ناس أبرار.......يا ناس أشرار واسترها يا ستار
بالحب والخير الحياة تِغْتني ولو فسادنا ساد ..........وجودنا عدم ! دي الناس قيمتها.......مش بما تِقتني من مال وجاه..........ولّا جواري وخدم الناس قيمتها في اختيار ومسار واسترها يا ستار
ياللي انت أعماك الطمع .....تاخد ايه اذا كسبت الدنيا...وخسرت روحك؟! ح تعيش تخاف...من أي شيء تشتهيه وتزيد جروحك....كل ما زاد طموحك ويعلا نوحك....................والبنا ينهار (2) واسترها يا ستّار يا توهة المشوار ! امتي الزمن يندار؟! ويكشف الأسرار ويبان لنا الأبرار من الأشرار استرها يا ستّار
يا ويلنا..........................يا سواد ليلنا.. .. لما الوطن .................يصبح فريسة.. ..للفساد والعَطَن !! ما تصدقوش دِيب مهما غنّي ورَطَن وما تحبسوش النور..........ورا الأسوار واسترها يا ستّار
لا الكدب له رجلين..........ولا للفساد.. إيدين ولا احنا معروضين في المزاد بس ان سكتنا عن الفساد.. .. زاد وساد وان قلنا : لأ.. .. يطلع لليلنا نهار واسترها يا ستّار
