طريق النور

قنديل أم هاشم!

صبح وقول يا كريم.. يجعلها بيضا علينا.. وسودة ع اللئيم.. أول ما نبدي القول.. نقول.. الدنيا زمان.. كانت أمان.. قلوب أهلها كهرمان.. وعيون ولادها.. ما تعرف الكدب.. ولا التوهان.. والإيدين.. تحضن بعضها بالسلام.. والإبتسامة علي الوشوش تلقاها عنوان.. وقناديل البيوت منورة.. بالدفء والألفة ومعاهم حبة حنان.
قناديل هذه الأيام.. نورها.. أسود غطيس.. وقلوبها صبحت مليانة غل.. وحقد.. لا فيها الكرم.. ولا فيها السلام.. والكلام أصبح أشد.. واقسي من الحجر الصوان.. يخرج من اللسان اللي زي المبرد.. ما يعرف أدب.. ولا حياء.. ولا حتي حنان.. وكل ده بيحصل من بني الانسان.
يا تري ده.. حال الدنيا.. ولا قلوبنا بقت عتمة.. لا بتحب خير للغير.. والمصلحة والمنفعة... والسبوبة والفهلوة والدروشة.. والدراما التليفزيونية المؤسفة والسلوكيات العنيفة الناسفة.. لكل القيم والاخلاق والادب.. هي السبب.. وأدينا في شهر رمضان.. تشوف عيون البشر تلاقي الكل كسلان.. تعبان.. زهقان.. وكمان قرفان.. فين سماحة شهر القرآن!
الحدوتة يا اخونا.. بقت بايخة حبتين.. قلنا الثورة المصرية أزالت من قلوبنا الخوف.. بدايتها كانت مبهرة.. ودلوقتي صبحت سافرة.. أزلنا الخوف صحيح.. لكن قلوبنا طفحت.. وأخرجت اسوأ ما في الجوف وكل ده بفعل البشر.. من بني الانسان!
ريسنا مرسي.. وضع خطة للعلاج في مائة يوم.. قلنا ماشي الكلام.. خلينا صابرين.. عدي من الأيام.. شوية كتير.. وحالنا كما هو الحال.. ميه مقطوعة.. وكهربا ممنوعة.. واكوم زبالة مزروعة في كل مكان.. ومستشفيات مجهزة للاموات.. ومواصلات اللي يركبها يروح ما يرجعش.. وقطارات معطلة وممنوعة من السفر.. وصحافة مقطوعة اللسان.. بفعل مجلس الشوري.. ورجاله الجدعان.. طيب نعمل ايه يا اخوان دلوني علي خطة طموحة.. مشروع قومي ياخدنا لقدام.. ونبقي زي خلق الله.. اللي بتحترم آدمية الانسان.. فين مشروع النهضة.. يا اخوان.
وعمنا قنديل.. زينة شباب الحكومة.. رئيس الحكومة المزعومة.. فرش المنديل.. وساب الميه والري.. وجاي يعلنها.. صريحة.. مريحة.. اخوانية.. اخوانية.. طيب فين البشر من الاطياف العلمية.. والاقتصادية.. وشئون الاسرة المصرية.. يا تري كل مصر.. ح تبقي اخوانية.. وان قلنا اختلاف في الرأي.. يقولوا علينا اصحاب اتجاهات ليبرالية.. وعلمانية.. ويلبسونا الكفر.. ويأكلونا مهلبية.. بركاتك يا أم العواجز.. يا أم هاشم.. ويكرم عمنا قنديل ويفتح ميه الهويس!!
واخرتها نروح فين.. قلنا نشيل مبارك وأعوانه من الفاسدين.. جالنا المرشد.. ومعاه حبايبنا الحلوين الشاطرين.. المهذبين.. ومعاهم عمنا هنية ومشعل والاخوة الحمساوية.. واخوان العالم من المسلمين.. وإن كانوا هما اخوان مسلمين.. إحنا نبقي مين؟!