طريق النور

العسكر بالزيت والسكر!

مبروك لمصر.. مرسي صبح رئيس.. وعريس.. عتريس.. وفؤادة مستنية.. المباراة النهائية.. أنتهت في الدقايق الأخرانية.. إخوانية. وأعلنت فوزه بالأدلة والبراهين.. وقالت وصالت وجالت.. أنه الأصلح.. وربنا يولي من يصلح.. يصلح أي شيء.. تلاجة.. غسالة.. بوتاجاز.. كرسي.. إنما إصلاح البلد.. والولد.. أهو ده اللي مش ممكن.. ابدا.. حذرونا من الشفقة.. وجابولنا الرحمة.. رحمة ونور علي روح المرحوم.. مدني.. وعلماني.. ويساري.. وناصري.. وضلع مكسور.!
عناوين الصباح.. زفت لنا البشري.. بفوز فارس العصر والأوان.. السيد مرسي القبطان.. وابن المرشد والقرصان.. والشاطر والعريان.. بأنه سيكون خادما للشعب.. وأجيرا عند المواطنين.. الفلاحين والعمال.. والفئات والفتات.. والفتة والعكاوي والكلاوي.. سيكونوا بديلا عن أكل عظام وأجنحة الفراخ.. وسقط الجاموس والأبقار.. وعرق التمساح.. وأهو كلام بنقوله بالليل.. تطلع عليه شمس النهار تلاقيه ساح.. وبكرة ح تبقي سداح مداح.. وأنا ماشي سواح!!
وقد قال العريس للرعية.. بعد ماصبح أمير المؤمنين.. ليس فقط في ميدان التحرير.. ولكن في كل الميادين.. أعينوني إذا قلت الحق.. وإقيلوني.. أو سلموني لاقرب قسم شرطة.. إن خرجت عن طاعتكم وطاعة المرشد وطاعة اخواني.. وزيادة في طمأنة الشعب الغلبان.. أعلن المجلس العسكري الموقر أن النتائج كلها مباهج.. وافراح وليالي ملاح.. وكل ده بفضل أصالة قواتنا المسلحة.. أما أصالة تبعنا.. ح تغني معانا أجمل أغانيها.. وتقول لنا.. ع اللي جري من مراسيلك.. ع اللي جري.. واللي جري مع أمريكا.. وتل أبيكا.. والمعونة سارية مع المزيكا.. والفرح فرحنا.. في الشيكابيكا.. وهيلاري حلوة يا ماريكا.
أما ماريكا بنت بلدنا.. في حكومة الجنزوري.. طول عمرها فايزة.. كانت سايبة التعاون الدولي.. ودخلت علي النادي الدولي وغنت ع الشعب.. القصد.. اهي الحكومة قدمت استقالتها.. يا ست.. عملتي اللي عليكي واكتر.. وفجرتي أزمة البنزين.. والبوتاجاز.. والجاز.. يللا حكومة وعدت.. زي حكومة شرف.. وأحلي من الشرف مفيش.. والحكومة اللي جاية ح تكون من نصيب عمنا الكبير مفجر الثورة النووية.. أنا البرادعي يا رشدي.. رشدي صاحب عتريس.. حكومة البرادعي مدنية.. جاية من تحت الحجاب.. والعباية الدينية.. الأمريكانية.. وكوندليزا رايس قالت فوضي خلاقة.. في صالون حلاقة.. مصدقناش.. وعملنا طناش.. لغاية ماصبح الربيع العربي.. برد.. ورعد وأمطار غزيرة علي السواحل والشوارع العربية.. والدم ساح يا عنيه!
دبلة الخطوبة في الايد اليمين.. والعريس عايز يحلف اليمين.. قدام اخوانه البرلمانيين.. المفكوكين.. المنحلين بأمر الدستورية العليا والمحلفين.. إنما تقول لمين.. ناس واصلين.. شاطرين.. عارفين سكتهم من تمانين عام ويومين.. وعلشان كده راجعين للدستورية لحلف اليمين.. علشان عريسنا ينقل الدبلة لليد الشمال.. ويتجوز المحروسة النانوسة.. بس خللي بالك عقد جوازك.. دستورك.. معاك الدستور.. العربية المصرية ماشيه بالمقلوب.. والبنزين فيها يادوب.. يا صبر أيوب.. الحمل كاذب يا اخوانا.. مفيهاش بيبي..
وإليكم آخر العناوين من أصحاب الشاشة الغشاشة.. ظهور مع زووم إن.. لنجوم التوك شو.. بنيلوك جديد.. حيث قرروا جمعاء.. ارتداء توب العفة.. مع لسعة مكوة علي الجبهة لعمل زبيبة علي الواجهة.. لزوم الغزل في الحبيبة.. لحد ما ييجي حبيب تاني ويشربوا معاه كؤوس الطلا.. في الخلا بعد الصلا.. وصلاة التراويح وجبت.. ورمضان علي الأبواب.. وعلشان الأيام دي مفترجة.. السلع التموينية ح تبقي بنص التمن.. في شهر رمضان وبس.. اما باقية الشهور فستعود بعون الله بضعف التمن.. الحق العرض.. العرض العسكري.. أدخل برجلك اليمين.. وإسمع مارشات عسكرية وقرآن في كل الميادين.. وعريس بلدنا ح يحلف يمين طلاق.. قبل الزفة..أنه واد تقيل وشد المنديل.. قولوا أمين!!