طريق النور

وداع ياشيخ عماد.. وداع يا مينا دانيال

العرض مستمر.. تعالوا بينا الي حيث التشويق والإثارة.. فصول المسرحية المصرية.. بها مشاهد زيادة.. المشاهد ساخنة.. تحت الركبة حبتين.. ذروة الاحداث.. البطل لم يصعد حتي الآن علي خشبة المسرح.. مسرح العبث.. كرسي العرش شاغراً.. والعسكر أكلونا كشري.. ولسه الكمالة.. والزباين.. يعني الجمهور اللي هو إحنا.. بعضهم متشائمون.. والبعض نائمون.. وشوية عندهم تلبك معوي من الكشري.
فلاش باك.. المشهد الاول.. عيش.. حرية.. عدالة اجتماعية.. ثورة.. ثورة.. حتي النصر.. ثورة في تونس بكره في مصر.. تونس خلصت.. ومصر مستنية الخلاص.. الخلاص لسه مجاش.. الولادة متعثرة.. امي بتولد.. ومصر ولادة.. وعتريس لفؤادة.. فؤادة رافضه تلبس فستان الفرح.. والمأذون مستني موافقة أهلها.. نجوم السما أقرب لك.. إدبح يا زكي ياقدرة.. الانقلاب قادم يا سادة.. تعالي بقي يا بكرة.. بكرة نشرب قهوة سادة.
المشهد الثاني.. قهوة سادة.. شربناها في يوم.. في شهر.. في سنة.. لسه الجراح صاحية.. وعمرها ما تنام.. ودم الشهدا عمره ما يضيع مع الايام.. وداع يا شيخ عماد.. وداع يامينا دانيال.. وداع ياكل الشباب.. الحزن عمره ما غاب.. الصدق كان في القلوب.. وفي عيون البعيد كداب.
المشهد الثالث.. وردة رحلت.. والثورة كمان رحلت.. عام وشوية شهور وأيام.. واحنا ولا عارفين.. فين وازاي.. ماشيين بخطوة عسكرية للخلف وللأمام.. شفاعات ساحبه إمام.. شباب إمرأة.. لسه وردة.. الوردة إن دبلت ريحتها فيها.. قالت لنا احضنوا الأيام.. حكايتي مع الزمان.. لو الأيام بتتكلم كانت قالت عملنا إيه.. الكل كان في الميدان إنسان.. الإيد في الإيد.. والعزم شديد.. رحل الجاني.. وساب التاني.. الرجل التاني هو الكسبان!.
المشهد الرابع.. العدالة الاجتماعية.. والعيش والحرية صبحوا الجاني في كل ميدان.. والثورة البيضا.. ماشية تكلم بعضيها.. الناس ملهية في البنزين.. والبوتاجاز.. والعيش واللحمة والجاز.. والعتبة جزاز.. والسلم نازل بينا.. راجع بينا.. من أول السطر يا حلوين.. بإسم الأمة.. بإسم الشعب.. بإسم الشوري.. ياللا يا كابتن فين الشايب والسنيورة.. ويامحني ديل العصفورة.. وبلدنا ح تفضل أمورة.. أحلي بلد.. حسدوها.. وحسدونا!.
المشهد الخامس.. حسدوني وباين في عينيهم.. الثورة شاهدها العالم.. فرحنا معاهم.. ورناهم.. ثقافتنا.. نضافتنا.. كنسنا الميدان برموش العين.. وايدينا شاهدة علينا.. إنما جانا إللي ما يتسمي.. سرق الفرحة.. ودبح الفرخة.. دمها ساح.. يافرحة ما تمت.. مات وارتاح.. ناس واتلمت.. عيونها اتغمت.. استغماية.. وكلابشتهم قبضوا علينا.. يا عيني.. يا عيني.. يا عيني ع الولد.
المشهد السادس.. النداهة.. شيء من بعيد ناداني.. وبدل الولد.. جانا 31 ولد .. صفصفوا علي ولدين.. واحد لمون.. والتاني مجنون.. ماشي بضهره.. وماشي معدول.. قول يا قلم قول.. إجعل كلامي سنابل.. قنابل.. ومولوتوف.. وطوف وشوف.. اللعب ع المكشوف.. كل شيء انكشف وبان.. المسرحية لسه شغالة بين العريس والخيالة.. نزل ياعم السقالة.. هونها يارب علينا.. نشنت يا فالح.. أهي جابت جاز ومعاه بنزين.. الاتنين فايزين في عنيا الأتنين.. شافي الصبح .. ومرسيه بالليل !
المشهد السابع.. لسه الجيم شغال.. علي الربابة والموال.. والدستور عند البقال.. والبقال بيبيع جبنة.. والجبنة فيها شطة.. الليلة عسل عسل.. وبكرة بصل بصل.. واللي خدتوا القرعة.. تأخده ام الشعور.. لسه يا اخونا العصمة في ايدينا.. وكمان الكرسي.. والدستور.. إلعب غيرها يا أمور!!.