خربشة

فعلا حاجة غريبة وعجيبة من عجائب ام الدنيا.. المنتخب - علي رأي مدربه ضياء السيد - طلع السما.. او قل طلع القمر بعد ما فاز علي غينيا.. الجماعة النقاد الرياضيين المحترفين والخبراء الاستراتيجيين قالوا ان خلاص احنا طلعنا الي القمر قبل ما نطلع الي كأس العالم.. وايه الحلاوة دي يا خواجة برادلي.. ايه يا عم الفنان فريقك اللهلوبة ده.. جايبه منين في ظروفنا المنيلة بستين نيلة..
الصحف كلها اتكلمت عن العبقري برادلي والولاد اللعيبة الجدعان اللهاليب اللي شرفونا وامتعونا وخلونا نحلم حلم شكسبير في ليلة صيف.. والصحف برضه حذرت كل كام يوم اتهزمنا من افريقيا الوسطي واللي طلع للقمر جابوا رأس اللي خلفوه تحت سابع ارض.. وطلع ان برادلي مبيعرفش رغم انه كان من اسبوع بيعرف.. وطلع ان اللعيبة كراكيب مش لهاليب.. وطلع ان اتحاد الكورة بيدرس احوال برادلي والاقالة الي امريكا مش الاقامة في الجبلاية.. وكام يوم والكابتن عزمي يطلع بيان عن عزم الكابتن انور تسريح الجهاز الفني الامريكي الذي يتدخل في شئوننا الداخلية المفضوحة بالفريق الاوليمبي والمنصوص عليها في الدستور الجبلاوي: افضحني تريحني!