اتجاهات

محمد المغربى: طابت أوقاتكم بكل الخير مشاهدينا الكرام أينما كنتم المخابرات العامة المصرية ملحمة وطنية فى حب مصر أبطالها دائما يعملون فى صمت تام وسرية مطلقة هم رجال صدقوا ما عاهدوا الله عليه فمنهم من قضى نحبه ومنهم من ينتظر وما بدلوا تبديلا ولكن سوف يأتى يوما نسمع فيه حكايات هؤلاء الأبطال من عازف ربابة يمشى فى الشارع والأسواق يحكى لنا قصص بطولات وتضحيات لأشخاص قدموا أروع نماذج التضحية والتفانى فقط فى خدمة الوطن إنهم رجال المخابرات العامة المصرية وفى هذه الأيام الجهاز يحتفل بمرور 57 عاما على إنشائه منذ أن أصدر الرئيس الراحل جمال عبد الناصر قرارا عام 1954 بإنشاء جهاز استخبارات وأسند رئاسته حين ذاك إلى زكريا محيى الدين أحد ضباط ثورة يوليو لحماية الأمن القومى المصرى إلا أن الانطلاقة الحقيقية للجهاز كانت مع تولى صلاح نصر رئاسته عام 57 مع اختلاف تقدير البعض لشخص صلاح نصر والجهاز منذ ذلك الحين قام بالأعمال البطولية العظيمة التى لم يكشف عنها الستار بعد أهلا بكم فى حلقة جديدة من اتجاهات .
تقرير
وفى عام 1955 أصدر الرئيس ناصر قرارا بإنشاء جهاز المخابرات العامة وكان زكريا محى الدين أول مسئول عن المخابرات ليخلفه على صبرى عام 56 يعقبه صلاح نصر عام 57 ولمدة 10 سنوات ، ولأنها ولدت عملاقة فقد نجحت المخابرات المصرية فى زرع العميل المصرى 313 رأفت الهجان أو رفعت على سليمان الجمال كانت من أهم عمليات المخابرات فى التاريخ احتوته أحضان المخابرات المصرية وأبرزت بخبراتها قدرات الهجان الفائقة استطاع النفاذ لأعلى دوائر صنع القرار السياسى والعسكرى فى إسرائيل زود القيادة العليا فى المخابرات العامة المصرية بخرائط مفصلة عن تحصينات خط بارليف قضى عمره كله ينقل لنا التفاصيل الكيان الصهيونى واعتزل وعاش حياته ومات ولم تكشف إسرائيل أمره ، العام 1960 مخابرات مصر تحكم قبضتها على أكبر شبكة من عملاء إسرائيل حاولت تجنيد الفنان سمير الإسكندرانى خارج البلاد ولكن الشرفاء لا يبيعون الذهب بالتراب الفنان المصرى يبلغ المخابرات العامة بالتفاصيل وتدور واحدة من أذكى معارك العقول التى أدت بعد عامين الكشف عن 5 شبكات تجسس كانت تتلقى تعليماتها من كبار ضباط الموساد وتم القبض على عشرات الجواسيس وإقالة رئيس جهاز الموساد وكانت فضيحة مدوية لإسرائيل ، جمعة الشوان أو أحمد الهوان نموذج لعبقرية أداء وانتماء المواطن المصرى فى تفاعله مع مقتضيات الأمن القومى رفض الشوان أن يفرط فى أرضه أو أن يقايض على وطنه حين حاول الموساد تجنيده كان طبيعيا أن يلجأ لجهاز المخابرات العامة المصرية كما يليق بمواطن شريف ، كان سفره إلى إسرائيل وحصوله على أثمن جهاز للتجسس دليلا دامغا على قدرة المخابرات المصرية وقوتها فى ملحمة صراع العقول .
محمد المغربى: بطبيعة الحال ما تابعناه فى سياق التقرير التالى هو جزء قليل للغاية من كل كبير للغاية ما تابعناه هو رأس الجبل الذى يظهر بعد الغيم وبعد السحاب ولكن هذا الجبل أو هذه الرأس لها قاعدة لها وديان ولها رواسى ما تابعناه ربما هو المسموح أن نتحدث فيه إنما هنحاول دلوقتى أن نخترق حاجز المسموح معنا فى الاستديو سيادة اللواء سامح سيف اليزل رئيس مركز الجمهورية للدراسات الاستراتيجية وبالطبع أحد ضباط جهاز المخابرات العامة المصرية فيه كذا حاجة يعنى واجب إنى أبدأ بفكرة الاحتفاء السنة دى أول مرة نحتفل بمرور 57 سنة على إنشاء جهاز المخابرات عدى 56 سنة دون احتفال إيه اللى جد السنة دى ؟
ل.سامح سيف اليزل: اللى جد هو ثورة 25 يناير الحقيقة يعنى هو لم يحدث قبل كده أجهزة المخابرات فى العالم كلها بيكتنفها السرية والغموض ما بيبقاش لها وجه إعلامى الحقيقة وهذا ليس اختراعا مصرية ولكنها القاعدة العامة فى جميع أجهزة مخابرات العالم يعنى لكن السنة دى الحقيقة رؤى أنه من المناسب لعدة أسباب أحد الأسباب أنها احتفالات ب25 وهناك ثورة جديدة ، هناك جمهورية ثانية تبدأ بالانطلاق ، هناك شعب فرح بثورة ، هناك رأى عام يريد أن يستمع إلى بعض عن هذا الجهاز الغامض فوجدوا أنه من المناسب حقيقة البدء فى إعطاء جرعة معقولة من المعلومات والبيانات إلى الرأى العام يعرف هذا الجهاز إيه أهدافه بيعمل إيه بما لا يكسر من سرية العمل نفسه لأن طبعا العمل كما تعلم وفى كل العالم عمل مخابرات وعمل مش بس سرى هو سرى للغاية وبالتالى فيه حساسية شديدة عايز تكتب إيه وتعمل إيه وتقول للناس إيه وفى نفس الوقت عايز تحافظ على سرية هذا العمل بما لا يكسر القاعدة بتاعت العمل بتاعته وهى السرية المطلقة
محمد المغربى: البعض ربط ربما بين هذه المظاهر الاحتفالية وبين الوضع الآن للجهاز البعض بيقول أن الجهاز يحتاج الآن إلى دعم شعبى ، يحتاج إلى تكاتف القوى الشعبية يحتاج أن ننأى به يعنى عن صراعات بعض المؤسسات وشفنا يعنى حتى زج بالجهاز وبأفراده فيما يعرف بقضية قتل المتظاهرين هل توافق أم تختلف مع هذا الرأى ؟
ل.سامح سيف اليزل: لا أنا أتفق فى جزء منه وأشرح الباقى مش أعترض ولكن أشرح الباقى هو أولا أحد الأسباب الرئيسية برضه للإعلان عن هذا الفيلم هو بعض الأقاويل التى قيلت عن الجهاز بشكل غير مناسب وده الحقيقة زعل العاملين فى الجهاز وضباط الجهاز بشكل كبير لإن انت عشان تنتقد جهاز يجب أن تعلم الجهاز ده بيعمل إيه مين اللى فيه بيشتغلوا إيه بيشتغلوا ساعتين ويروحوا وللا شغالين 24 ساعة ما بيروحوش بيوتهم وللا ما لهمش مطالب خالص ويتفانوا فى عملهم ومالهمش غير حاجة واحدة مصر بس الناس دى مالهاش أى لا بيت ولا أب ولا أم ولا ابن أنا بتكلم بأمانة أنا قعدت عشرات يعنى مدة طويلة فى هذا الجهاز والله ما كنت أعرف حاجة عن بيتى ولا عيالى إطلاقا المسألة كلها هى عندما تنتقد أحد عشان أنتقدك لازم أبقى عارف انت مين عشان أنتقدك فهناك نقد بلا معرفة وهذا الحقيقة شئ جرح وألم الكثير من العاملين فى الجهاز هذه واحدة ، الشئ الثانى الهام أيضا أن هناك بعض السياسيين الموجودين على الساحة اللى بدؤوا فى الانتقاد مش بس فى الانتقاد ؛ الانتقاد بعنف شوية مش عايز أقول كلمة أكثر من كده لكن يمكن السادة المشاهدين عارفين أنا عايز أقول إيه بشكل الحقيقة جارح جدا وبشكل مهين يعنى خلينى يعنى يمكن لفظ مهين ده برضه وده يمكن مش صحيح الحقيقة هذا الجهاز عدده أولا قليل جدا يعنى ما هواش بالآلاف ولا بالكلام ده خالص عدد محدود اختياره عشان تشتغل فيه بتمر بعشرات الاختبارات والتأهيل لسنوات عشان بس تبتدى تقول أنا ضابط مخابرات المسألة مش بهذه البساطة
محمد المغربى: بس ما بيقولش طبعا
ل.سامح سيف اليزل: لا عشان هو يقول لنفسه أنا ضابط مخابرات يبص فى المرايا كده يقول آه أنا ضابط مخابرات ده ما يقدرش يعملها لإن انت بتاخد سنوات طويلة جدا من الجهد والعرق بتشتغل مساعد لضباط أكبر منك ومساعد لخبراء أكثر منك يعلموك تعمل إيه زى انت بالضبط تبقى ماسك إبنك الصغير اللى أول ما يبتدى يكتب تمسكه القلم وتبتدى تمسك إيده عشان يبتدى يكتب ألف وباء بتبقى كده العملية فالمسألة إنك تنتقد ناس بهذا الجهد وبهذا العمل وبهذا الشقاء وناس لا حول لها ولا قوة لا عايزة منك حاجة ولا طالبة منك حاجة بيخدموا البلد فده الحقيقة بتبقى أحد الأسباب برضه
محمد المغربى: طيب سيادتك يا فندم كنت فى الجهاز إبان ما سمى بعملية سمير الاسكندرانى أو ملف سمير الاسكندرانى
ل.سامح سيف اليزل: لا أنا رحت بعد كده
محمد المغربى: طيب يعنى ربما برضه كان الناس كلها بتتكلم عن إن الفنان سمير الاسكندرانى هو ربما ضابط مخابرات أو كلف بأشياء هو الآن معنا على الهواء مساء الخير يا فندم
سمير الاسكندرانى: يا أهلا وسهلا
محمد المغربى: منورنا
سمير الاسكندرانى: أنا متابع على التليفون حديثكم الجميل وأسلوب وحديث اللواء سامح سيف اليزل الذى أنا أحد المعجبين بثقافته وبوطنيته وبدفقه الإنسانى وهو يتحدث إلينا
محمد المغربى: يعنى سيادتك كويس إن سيادتك بتشوفنا معانا بس كده فاصل فيه شوية صور لحضرتك نشوفهم مع بعض وبعد كده هبدأ أسألك بكذا سؤال لو تسمح لى يعنى
سمير الاسكندرانى: من عينى اتفضل
فاصل
عبارة عن بعض صور لأخبار عن سمير الاسكندرانى ومحاولة تجنيده من الموساد الإسرائيلى
محمد المغربى: طيب الفنان سمير الاسكندرانى شفنا يعنى الجرائد نفسها كتبت إنما كتبت فى وقت احنا لسه ما كناش متابعين شوية فنود بس ننتهز فرصة وجودك معنا وتقول لنا على اللى احنا مش عارفينه والذى ربما لم يقال فى الإعلام من قبل عما تعرضت له عندما كنت فى إيطاليا
سمير الاسكندرانى: أقول لك عن اللى انت مش عارفه
محمد المغربى: يا ريت
سمير الاسكندرانى: لو اللواء سامح سيف اليزل معاك تبقى كل حاجة عارفها مش كده وللا إيه
محمد المغربى: تمام
سمير الاسكندرانى: أأمر يا محمد باشا
محمد المغربى: لا عاوزين بس كده نعرف تفاصيل احنا ما نعرفهاش احنا عرفنا إن سيادتك كنت فى إيطاليا وهناك تم محاولة تجنيدك
سمير الاسكندرانى: أنا فى فترة من الفترات وأنا فى باقورة شبابى كنت مفتون بأوروبا وبإيطاليا بالذات لإن أنا فنان تشكيلى وبرسم وبعلم فى كلية الفنون الجميلة الأساس والتصميم والديكور والعمارة الداخلية وهكذا وسافرت إلى إيطاليا بالفعل وفتنت بجمال أوروبا بالفعل ورجلى وقدرى قادنى إلى ولاد عمنا ورجال الموساد تصوروا أنهم جندونى فى فترة معينة وأنا بره ورجعت مصر طبعا أنا بختصر صفحات وصفحات بتكلم يا أستاذ محمد فى مناطق مركزة جدا وبألغى أى تفاصيل المهم إن أنا تدربت على الحبر السرى وكانت حاجة جديدة فى وقتها وتدربت على الشفرة وتدربت على أساليب التخابر هم تصوروا إن هم جندونى وأنا بقيت طوع بلدهم رجعت مصر ، ثم رجعت مصر فى نفس اليوم مساءً يعنى أنا راجع بمركب على اسكندرية الساعة 8 صباحا الساعة 2 الظهر كنت فى بيتى فى شارع عبد العزيز بيت الأسرة مش فاكر وللا عبد الخالق ثروت حاجة كده وبعد ذلك الساعة 9 بالليل كنت فى مكتب أحد الرجال الكبار فى المخابرات العامة والذى أوصلنى إلى بابه ومكننى وأبويا رحمة الله عليه الأستاذ فؤاد الاسكندرانى أو الحاج فؤاد الاسكندرانى الرجل الوطنى اللى رضعت منه تفاصيل ثورة 19 أنا وأخويا الدكتور سامى الاسكندرانى دكتور مهندس وقدمنى أبى وأنا أصريت بعد شوية كده صغيرة إن أنا أقابل حد أعرفه أنا بكل التقدير لحضراتكم أنا ما اعرفكوش قالوا لى ما تقولش لأبوك إن فيه حاجة على الإطلاق واحنا رتبنا معاه وأن هذه الأشياء تحدث لمعظم الشباب والاتصالات دى بتحدث يعنى إنما أنا ما قلتش حاجة أنا طلبت أن أرى الزعيم جمال عبد الناصر ليه لإنى أعرفه كما قلت لهم قالوا لى تعرفه منين قلت لهم من الجرانين ولكن كان هذا كان هناك ارتباط بين الشباب وبين الأمة جمال عبد الناصر أنا ما بتكلمش فى السياسة ما بتكلمش إن احنا فى سنة 67 هزمنا أنا بتكلم عن الكاريزما الجذب الهائل الذى كان يستمتع به هذا الرجل العظيم والذى يعنى شعرت به مصر والأمة العربية والعالم هو زعيم عالمى مش مصرى المهم أنا طلبت أقابله قالوا لى هو مش فاضى ده احنا عندنا المارشال فيتو بيزور مصر قلت لهم تمام أنا مش عايز أشوفه أكثر من إنه يبص لى ويقول لى يا واد يا سمير يا ابنى خليك معاهم فخلاص أنا مش عايز أضيع وقت ولكن الحدوتة ثمنها حياتى يا جماعة سابونى فترة طويلة حوالى تربو على شهر وحاجة وبعدين اتصلوا بى ما هم لما كنت معاهم وما إديتهمش عقاد نافع يعنى ما اتبسطوش ودونى نمرة تليفون لو غيرت رأيك اتصل بنا وفعلا ما حدث إن هم اتصلوا بى مش أنا اللى اتصلت بهم والتقينا وخدونى وقابلونى بالزعيم عبد الناصر بعد شوية خلاص واستمرت الحياة مع المخابرات العامة الجماعة بتوع المخابرات دول أنا جربت حياتى معاهم وفترة من عمرى مهمة وانطبعت فى وجدانى وفى أحشائى الناس دى بتصنع الأعمال أنا مش بقول لهم هم مش محتاجين تقليظ أو احترام أو تقدير هم محترمين وهم مصريين حتى النخاع وهم أساتذتى فى عملية التخابر يعنى أنا جوناسين شميث علمنى فى أوروبا وسائل التخابر المختلفة جوناسين شميث لما علمنى اللى علمه لى أنا بقيت استخدم تعاليمه فى التهرب منه داخل مصر لإن الشبكات كانت موجودة داخل مصر عاملة زى العنكبوت فعايز أقول لك اللى عملنى ازاى أفطن إن مفيش حد بيتتبعنى
محمد المغربى: طب كام واحد يا فندم كام واحد تم القبض عليهم من الشبكة العنكبوتية الجاسوسية دية
سمير الاسكندرانى: ده فيه 6 شبكات وقعت 6 شبكات الشبكة ممكن تربو على 10 أو 15 يعنى انت خدت دولة
محمد المغربى: طيب الفنان سمير الاسكندرانى يعنى فى عجالة عشان الوقت ووقتك برضه تحب تقول إيه للمخابرات فى عيدها ال57
سمير الاسكندرانى: بقول لهم إذا فيه حد حاول أن ينال منكم زى ما اللواء سامح سيف اليزل قال فلا تبتئسوا انتوا بتشتغلوا مع ربنا أنا شفتكم عن قرب وعن كثب وعرفت إنكم بتربوا ولادكم بالتليفون انتوا مش موجودين معاهم انتوا عايشين مع مصر واحد يتم الاتصال به الساعة 4 صباحا فينزل وياخد أشيائه وينطلق الست بتاعته ما تعرفش هو رايح فين وما تعرفش جاى امتى أو مش جاى الناس دول يصنعون الأعمال الضخمة الهائلة ويقفون وراءها ما يطلعوش يقولوا أنا عملت وأنا سويت
محمد المغربى: ده ربما كمان لو سئل يقول لا ده مش أنا ده أنا ما اعرفش حاجة عن الموضوع ده
سمير الاسكندرانى: الأنا والكلام ده دى حاجة وضيعة حقيرة انت عارف ويؤثرون على أنفسهم ده هم كده على العموم القصة علشان تتحكى بتفاصيل عايزة 4 ساعات
محمد المغربى: سيادتك تيجى تشرفنا فى يوم بقى ، نرجو إنك تيجى تشرفنا فى يوم يا فندم
سمير الاسكندرانى: أنا بأحييكم وبأحيي سامح بيه وبقول له مرة ثانية زى ما أنا لى معجبين وأنا بأغنى هو له معجبين بيحبوا يسمعوا فكره
محمد المغربى: شكرا جزيلا يا فندم ، شكرا جزيلا للفنان سمير الاسكندرانى على مداخلتك وأيضا نقول كل سنة وانت طيب لإن انت كان لك برضه دور فى هذه المنظمة الدقيقة ، سيادة اللواء سامح ربما واحنا بنتكلم عن بداية عصر المكاشفات زى ما سيادتك استخدمت فى الأول احنا نطلع بعض الأجزاء المسموح بها أعتقد إن احنا كمواطنين فى حاجة إن احنا نعرف برضه يعنى شوية معلومات احنا إلى الآن عندنا خلط فى الجهات الأمنية المخابراتية عندنا خلط ما هو الأمن القومى مثلا ، عندنا خلط من يرؤس من هل المخابرات العامة هى فوق الأمن القومى وللا العكس ، هل فيه تنسيق سمعنا ربما إن كان قبل 30 يونيو قبل تسليم السلطة كانت المخابرات الحربية واخدة الشق الأكبر من عملية الإدارة سمعنا الكلام ده كله وضحه لنا يا فندم
ل.سامح سيف اليزل: أولا أنا عايز أقول إن الفترة الماضية فى السنوات الماضية طرح بعض المسلسلات ، طرح بعض الأفلام أيضا دى كانت بتخطيط من المخابرات العامة هو كان فى الفترة دى يعنى اختيار التوقيت اختيار الجرعة اللى انت عايز تقولها للناس رفع معنويات الناس لعدة أسباب الناس بتبقى محتاجة إنك ترفع معنوياتها فى هذا الوقت ، الناس متعطشة لحاجة وطنية حتى تتلاحم القوى الوطنية كلها مع بعضها فإذاعة مسلسل وطنى فيه أعمال مخابرات ضد عدو بيخلى الناس تتكاتف وبيخلى الناس تزيد حبها لمصر أكثر وتخلى الناس تشعر بالانتماء فهى دى التوقيتات المختلفة اللى بيتم فيها الموضوع الذى يطرح على الناس وكيفية طرحه بشكل مناسب يمكن فى خلال السنوات الماضية شفنا حاجات كثير فعلا لكن أول مرة فعلا يحصل منذ بداية عمل المخابرات العامة أن يطلع فيلم بهذا الكلام منتج بواسطة المخابرات العامة
محمد المغربى: كلمة وطن
ل.سامح سيف اليزل: كلمة وطن ده إنتاج المخابرات العامة
محمد المغربى: طيب عندنا وقفة كثير عند كلمة وطن بس عندنا الآذان آذان العشاء حسب التوقيت المحلى لمدينة القاهرة يعنى يرفع الآذان ونعود لاستكمال الحوار مع حضرتك
فاصل
آذان العشاء حسب التوقيت المحلى لمدينة القاهرة
محمد المغربى: عدنا إليكم مرة أخرى مشاهدينا الكرام ومازال معنا فى الاستديو سيادة اللواء سامح سيف اليزل رئيس مركز الجمهورية للدراسات الاستراتيجية وأحد ضباط جهاز المخابرات العامة المصرية سابقا كنت بتتكلم سيادتك عن فكرة الفيلم التوثيقى أو الوثائقى كلمة وطن وهنا بس قبل ما أسمع رد سيادتك أقول لك إن فيه ناس ربما أشادت بالفكرة إنما فيه آخرون شافوا إن هو يعنى ينقصه الكثير يعنى كنا نتمنى أن نرى أشياء لم نراها إنما احنا اللى حصل شفنا حاجات مجمعة من أفلام اتذاعت على فترات
ل.سامح سيف اليزل: هقول لحضرتك أولا الفيلم 41 دقيقة فالفيلم مش عايز برضه تعمل فيلم كبير يمل الخلق والناس يبقى عندها ملل فانت ما بين حاجتين عايز تدى للناس جرعة كويسة تفهم الناس إيه اللى بيحصل بشكل لا يكسر قاعدة الأمن اللى هى القاعدة الرئيسية لعمل المخابرات فى نفس الوقت انت بتختار الموضوعات اللى هى كشفت قبل كده ولكن ممكن يبقى فيها جرعات زيادة يعنى مثلا ولا مرة فى بعض القضايا اللى انكشفت قبل كده تتذاع أشكال الأجهزة السرية التى كان يستخدمها الجاسوس نفسه هتبص تلاقى فى الفيلم فيه تركيز على أول مرة على بعض المعدات السرية التى كان يستخدمها الجاسوس
محمد المغربى: جهاز الإرسال الذى كان فيه متفجرات
ل.سامح سيف اليزل: واللى فى الجذمة واللى فى الكاميرا وفى أماكن مختلفة والطرق السرية بتاعت حفظها فى الشنط وخلافه طبعا هذا الكلام فى توقيته كان تكنولوجى عالية جدا يعنى ممكن حد دلوقتى يقول إيه ده الكلام ده لا يستخدم دلوقتى فيه حاجات أخرى بتستخدم ولا يمكن نشرها يعنى ولكن المسألة كلها هى إن زى ما حضرتك تفضلت الناس كانت عايزة تعرف حاجات كثير ولكن فى نفس الوقت انت ما بين عدة عوامل العامل الأول ما يبقاش فيه ملل الفيلم 40 دقيقة معقول قوى ما كانش فيه ملل لو زاد عن كده ممكن الناس تزهق نمرة اثنين الحاجة المهمة جدا القاعدة العامة وهى قاعدة السرية ، نمرة ثلاثة إن انت فيه بعض الحاجات اللى ممكن تستخدمها فى فترات قادمة أو أسلوب قد يكون موجود فى فترة قادمة انت محتاج إن انت ما تقولوش فانت بتلمح دون تفصيلات
محمد المغربى: اسمح لى أنا مش عاوز طبعا نخش فى تحليل الفيلم ولكن باخد من كلام سيادتك ولكن ربما آخر جزء فى الفيلم تعرض لحاجة منقوصة مبتورة فكرة إن يمكن فيه محاولة للإيقاع بالجيش فكرة إن كان فيه الصليب اللى داخل لسيناء أيضا كان فيه قضايا مبتورة احنا كمشاهدين أو مستمعين ما عرفناش ناخد معلومة كاملة
ل.سامح سيف اليزل: لا هو فيه قضية واحدة بس اللى هى بعد الصليب ، الصليب كان بندقية آلية ومعاها طلقات صناعة مصرية فيه بعدها على طول الفيلم جاب صورة كده لبندقتين قناصة متطورتين جدا هاى تكنولوجى وفيها جهاز رؤية بالليزر متطور قوى يعنى دى بيستخدموها القناصة القضية ما اتقالش مين فيها ولا أسامى الناس لإن القضية دى هى ما زالت يعنى حولت إلى المحكمة خلال الأيام الماضية يعنى النيابة خلصت فيها تحقيقات وحولت إلى المحكمة خلال الأيام الماضية خلينى أقول لك ويمكن هنذيع حاجة بقى لأول مرة هم اثنين متهمين فى هذه القضية واحد ألمانى الجنسية وواحد نمساوى الجنسية وجاؤوا فى عام 2011 أثناء قصة محمد محمود وماسبيرو ومش عارف إيه والحاجات دى وكانوا تابعين فيه معلومات واصلة تعتبر قضية هى حاليا فى المحكمة فأنا برضه بين قصة إن أنا أقول لك شوية حاجات والسادة المستمعين والمشاهدين يشوفوها وفيه فرق إن احنا نحترم
محمد المغربى: المسموح به
ل.سامح سيف اليزل: هقولها يعنى القصة كلها إن كان فيه متابعين للمتهمين دول وفيه معلومات وصلت لجهاز المخابرات العامة عن احتمال إن فيه أفراد جايين عشان يدخلوا أجهزة قناصة عالية التكنولوجيا قوى لاستخدامها لقصة بقى كان فيه موضوع ماسبيرو ومحمد محمود والحاجات دى وحاولوا إن هم يجيبوها عن طريق مطار القاهرة فمعلومات كانوا متابعين من الخارج وتم وصولهم والمخابرات العامة كانت متابعاهم من الخارج وعند وصولهم إلى مطار القاهرة قبض عليهم متلبسين فى مطار القاهرة بالبنادق وحولوا إلى النيابة العامة والنيابة العامة حولتهم إلى المحكمة خلال الأيام الماضية والقضية لم تنظر بعد هى هتنظر خلال الفترة القادمة
محمد المغربى: يعنى هم لسه قيد التحقيق المفروض
ل.سامح سيف اليزل: لا خلص التحقيق وانتهت النيابة واتحفظ عليهم من ساعتها حاليا النيابة العامة بعتت القضية إلى المحكمة والمحكمة هتتحدد لها جلسة خلال الفترة القادمة
محمد المغربى: ممكن بقى سيادتك تقول لنا ببساطة كده المسموح برضه آلية تكوين الجهاز إيه ومن يرؤس من يعنى هل هناك أقدميات فى الجهاز ، هل معروف إن الوكيل بيبقى رئيس الجهاز بعد كده ، الأمن القومى إيه دوره مع جهاز المخابرات هو يتبع وللا تابع التنسيق مع المخابرات الحربية
ل.سامح سيف اليزل: جهاز المخابرات العامة بلا أن نخش فى تفصيلات كثير لكن حضرتك ركزت على الأمن القومى ، الأمن القومى هى هيئة داخل منظومة جهاز المخابرات العامة ، المخابرات العامة فى داخلها عدة هيئات أحد هذه الهيئات هى هيئة الأمن القومى اللى هى مسئولة عن مقاومة التجسس دى شغلها
محمد المغربى: الداخلى
ل.سامح سيف اليزل: لا مش داخلى
محمد المغربى: خارجى
ل.سامح سيف اليزل: وطبعا الخارجى بيبقى له داخلى يعنى هو اللى جاى يتجسس ده جاى يتجسس على مصر جوه مصر لكن بيتم متابعته من الخارج ثم يبتدى يكمل معاه هنا فى مصر فإذن هيئة الأمن القومى أحد هيئات المخابرات العامة المصرية وبالتالى المخابرات العامة ترؤس يعنى الهيئة دى أحد أفرعها يعنى
محمد المغربى: من يعين رئيس المخابرات
ل.سامح سيف اليزل: رئيس الجمهورية
محمد المغربى: بناءً على
ل.سامح سيف اليزل: بناءً على مواصفاته الشخصية وقدراته وولاؤه وثقته وحاجات كثير جدا طبعا
محمد المغربى: قيل فى الفترة السابقة أن المخابرات العامة غلت أيديها وحولت الإدارة إلى مخابرات حربية ما صحة ذلك ؟
ل.سامح سيف اليزل: لا طبعا الكلام ده مش مضبوط كل واحد له تخصصه فيه فى مصر 4 أجهزة أمنية المخابرات العامة وفيه المخابرات الحربية وفيه هيئة الرقابة الإدارية وفيه الأمن الوطنى اللى هو كان أمن الدولة زمان هى دى ال4 أجهزة الأمن فى مصر يعنى الأمن الوطنى يتبع وزارة الداخلية وحاليا بيعمل فى مجاله خلاف بقى القصة القديمة بتاعت أمن الدولة يعنى ، الرقابة الإدارية تتبع رئيس الوزراء بتقدم تقاريره إلى رئيس الوزراء ، المخابرات الحربية تتبع وزير الدفاع وعملها هو تأمين القوات المسلحة ولها أذرع خارجية لإن مكاتب الملحقات العسكريين اللى موجودين فى السفارات المصرية فى الخارج التمثيل العسكرى فى السفارات المصرية والمخابرات الحربية تعمل لصالح القوات المسلحة ولا تعمل لأى صالح آخر
محمد المغربى: مفيش تنسيق
ل.سامح سيف اليزل: لا فيه تنسيق طبعا بس هقول لسيادتك ولكن هى تتبع وزير الدفاع أو القوات المسلحة ، المخابرات العامة تتبع رئيس الجمهورية مباشرة وتقاريرها كلها تذهب إلى رئيس الجمهورية ده التسلسل يعنى أما التعاون بين هذه الأجهزة تعاون يومى دائم ويومى ولا يوجد منافسة لما تيجى تبص كل واحد بيشتغل فى حاجة ثانية خالص يعنى الرقابة الإدارية لها شغلها محدش فى الجهات الثانية له دعوة به المخابرات الحربية بتشتغل على الجيش ومحدش لها دعوة بها برضه لإن المخابرات العامة ليس لها علاقة بالقوات المسلحة ولا عمرها هتشوف حاجة عن القوات المسلحة لكن المخابرات الحربية قادرة أنا اشتغلت مع المخابرات الحربية وتشرفت بهذا قبل أن أذهب إلى المخابرات العامة اشتغلت سنوات فى المخابرات الحربية وبالتالى أنا أعلم كويس قوى اللى أنا بقوله لحضرتك ليه لإن أنا اشتغلت فى الاثنين وعارف كويس قوى بيشتغلوا ازاى المخابرات الحربية بتعمل على منظومة القوات المسلحة بكفاءة عالية جدا يعنى المخابرات الحربية فيها عناصر فاخرة من الضباط الحقيقة
محمد المغربى: طيب احنا للأسف وقتنا انتهى ولكن أنا لازم أسأل سيادتك سؤال عشان بكرة وأرجو إن إجابته تكون فيها بعض التفاصيل فكرة إن احنا ظللنا لعقود طويلة نتباهى بأن فى البلاد فيه مؤسستان ربما لم يدب فيهم الفساد كان الجيش وكذلك كانت المخابرات العامة أيهم ونحن نحتفل بمرور 57 سنة على إنشاء هذا الجهاز وما له من دور ممكن تصنفه لى
ل.سامح سيف اليزل: هو جهاز غير مسموح به فى الخطأ يعنى أى حتة فى الدنيا ممكن تغلط المخابرات العامة مافيهاش غلط الغلطة فورة زى ما بيقولوا خلاص انتهيت لو غلطت تنتهى وهناك حساب عسير داخل الجهاز يعنى اللى بيخطئ يعنى لا يرحم بأمانة ولكن نادر جدا إن يحصل أخطاء لإن دى ناس كلها عارفة كويس قوى هى بتعمل إيه
محمد المغربى: وضعه يا فندم فى الإقليم إيه لإن الجهاز ده مش وحيد ده فيه حواليه 22 جهاز مثلا فى الوطن العربى
ل.سامح سيف اليزل: أنا هقول لحضرتك فيه كتاب طلعته المخابرات الإسرائيلية الموساد مش الموساد واحد كان بيشتغل فيها وقايل فى آخر صفحة مش فى آخر صفحة فى آخر مجموعة إن الجهاز الوحيد اللى أزعج إسرائيل هو جهاز المخابرات العامة المصرية
محمد المغربى: نتمنى إن انتوا كده إن شاء الله تكملوا إزعاج
ل.سامح سيف اليزل: هو جهاز محترم وياريت الناس تحبه أكثر من كده
محمد المغربى: لا إن شاء الله طبعا ، سيادة اللواء سامح سيف اليزل رئيس مركز الجمهورية للدراسات الاستراتيجية وأحد الضباط السابقين فى جهاز المخابرات العامة المصرية شكرا جزيلا لك كل سنة وانت طيب والشكر لكم مشاهدينا الكرام على حسن المتابعة ودمتم فى أمان الله وحفظه