اتجاهات

الاحد*30/10/2011
مسعد أبو ليلة : أعزائى المشاهدين وأهلا بحضراتكم إلى حلقة جديدة من برنامج اتجاهات ، مصربكل أوجاعها وآلامها وبكل همومها ومشاكلها لم تبخل يوما بجهد فى سبيل قضايا الأمة العربية وخاصة القضية الفلسطينية فهل يتصورأن تبخل مصر بجهد مهما كان فى سبيل أبناءها فى الأيام القليلة الماضية حققت مصر إنجازا مثل فى الإنجاز التاريخى بين إسرائيل وحركة حماس برعاية مصرية خالصة وفى سرية تامة ، هذا الاتفاق يقضى بالإفراج عن ألف أسير فلسطينى مقابل الجندى الإسرائيلى جلعاد شاليط اللى تم اختطافه من 5 سنين مصراستطاعت وعبر جهاز مخابراتها انجاز الصفقة لتخرج بهذا الشكل المشرف اللى أجمع الكثيرون على إنه يشكل انتصار كبير للشعب الفلسطينى ثم كان الإنجاز الثانى واللى تمثل فى الاعتذار الإسرائيلى الرسمى والصريح لمصرعن حادث استشهاد عدد من الجنود المصريين على الحدود ودى بالتأكيد المرة الأولى فى تاريخ إسرائيل اللى بتقدم فيها مثل هذا الاعتذار فى الوقت اللى رفضت تقديم اعتذار لتركيا عن حادث السفينة اللى كانت متجهة لغزة هذان النجاحان فجرآمال وطموحات كثيرة بأن تنجح مصرأيضا فى تحقيق إنجاز مماثل لإطلاق سراح كل المحتجزين المصريين فى سجون إسرائيل ، القضية الآن بدأت تأخذ مسار جاد للإفراج عن كل المصريين بما فيهم الأطفال الثلاثة الذين لم تتعد أعمارهم 14 سنة بعد أن تجاوزوا الحدود بطريق الخطأ عندما كانوا يبيعون الدخان لمساعدة أسرهم ، القناة العاشرة للتليفزيون الإسرائيلى ذكرت إن مصر اللى بتتكتم حتى الآن على الصفقة ستوافق على إطلاق سراح الجاسوس الإسرائيلى إيلان جرابيل والذى يحمل الجنسية الأمريكية أيضا وده مقابل كل الأسرى المصريين بل وأشارت القناة أن مصر تسعى فى إطار الصفقة أيضا لإطلاق سراح عدد من أبنائها فى سجون الولايات المتحدة مصر سوف تسترد كل أبنائها المحتجزين فى السجون الإسرائيلية وبالتأكيد لن تترك أسراها ولن تنساهم حتى يعودوا كراما معززين مرفوعى الرأس موفورى الكرامة فاصل ونعود
فاصل
عبارة عن لقطات لحلقات برامج إخبارية عن الأسرى المصريين فى إسرائيل
مسعد أبو ليلة : أهلا بكم مرة ثانية ونرحب بضيوفنا فى هذه الحلقة بداية نرحب بالخبيرالأمنى والاستراتيجى سيادة اللواء سامح سيف اليزل أهلا بحضرتك يا سيادة اللواء وبنرحب بالكاتب الصحفى توحيد مجدى أهلا بك يا أستاذ توحيد ونرحب أيضا بالناشط السيناوى مصطفى الأطرش أهلا بك يا أستاذ مصطفى بداية ونحن نتناول هذا الموضوع ، موضوع الأسرى المصريين فى إسرائيل بعد أن نجحت مصر فى إتمام صفقة تبادل الأسرى أو ما يعرف بصفقة شاليط بين حماس وإسرائيل سيادة اللواء هذا النجاح ، نجاح الوساطة المصرية فى إتمام هذه الصفقة كيف يكون أساس ومنطلق فى نجاح أيضا صفقة تشمل الأسرى المصريين فى إسرائيل
ل / سامح سيف اليزل : هو كان أمر إن المخابرات العامة المصرية كانت منذ فترة طويلة تحاول وتصر على إتمام صفقة شاليط بالتعاون مع الفصائل الفلسطينية المختلفة وليست فقط حماس وليست فقط السلطة الفلسطينية أو فتح ولكن على جميع الفصائل الفلسطينية اللى لهم أسرى داخل السجون الإسرائيلية خاصة اللى كان عددهم حوالى 310 اللى كانوا 25 سنة مؤبد وبعضهم 33 سنة مرتين يعنى هناك حكمين بثلاثين سنة كل مرة كانت هذه المجهودات مستمرة ولم تتوقف رغم محاولة بعض الدول الأخرى سواء كانت عربية أو أوروبية حل هذه المشكلة بالتوسط لدى الأطراف لكنها لم تنجح ، لم تتوقف المخابرات المصرية عن هذا واستمرت فى هذا العمل إلى أن نجحت والحمد لله فى إرجاع 1027 إلى أوطانهم وإلى عائلاتهم منهم جميع السيدات الفلسطينيات الموجودين أو الموجودات داخل السجون الإسرائيلية أيضا المباحثات التى تتم الآن فى مجال عودة ال78 أسير مصرى أو مسجون مصرى داخل إسرائيل
مسعد أبو ليلة : قبل أن نتطرق لهذه الجزئية أيضا كيف كان الاعتذار الإسرائيلى يعنى أيضا مهيأ لهذا المناخ سواء فى اتمام صفقة شاليط أويكون فى إتمام أى صفقات أخرى خاصة ما يخص الأسرى المصريين
ل / سامح سيف اليزل : كما تفضلت سيادتك فى المقدمة الأولى هذه أول مرة من تاريخ إسرائيل 68 عام منذ إنشاءها عام 48 تتقدم باعتذارلأى دولة فى تاريخها وهذا يعتبرأيضا انتصارللمخابرات العامة المصرية وللسياسة المصرية ، المخابرات العامة المصرية كانت فيه ناس تقول هو الاعتذارمتأخر ليه إيه السبب ؟ هقول لحضرتك بعض الأسباب أو السببين الرئيسيين أولا مصر كانت تصرعلى إن الاعتذار يكون من وزير الدفاع الإسرائيلى ليه لإن من قام بإطلاق النيران على جنودنا وعلى شهدائنا يخص وزارة الدفاع فمصركانت تصرعلى ضرورة الاعتذارمن المسئول عن هؤلاء الضباط الذين قاموا بهذا الفعل وبالتالى وزير الدفاع الإسرائيلى هو اللى اعتذر ، نمرة اثنين مصر رفضت الأسف لما تأسف رئيس الوزراء الإسرائيلى مصر رفضت الأسف وقالت أن هناك فرق كبير بين الأسف والاعتذار؛ الاعتذار يعنى إيه إن أنا قد أخطأت فى حقك وأنا أعترف بهذا الخطأ وأعتذر لك نيابة عن الدولة بتاعتى وهذا هو الشئ الرئيسى فى الموضوع
مسعد أبو ليلة :ده صحيح أيضا أخيرا قبل أن نتحول للأستاذ توحيد لماذا يعنى تفسير كما ذكرنا فى المقدمة إسرائيل اعتذرت لمصر ولم تعتذر لتركيا على الرغم من العلاقات الدبلوماسية اللى كانت موجودة اللى كلنا عارفينها ما بين إسرائيل وتركيا ؟
ل / سامح سيف اليزل : لازم نقول سريعا أيضا أن إسرائيل لها علاقات حدودية مع مصر ومصر لها ثقل عسكرى ، مصر هى الدولة الوحيدة فى العالم التى قامت بانتصارات عسكرية ضد إسرائيل أما تركيا فلا تربطها حدود جغرافية معها هناك فاصل مساحى جغرافى كبير بين البلدين وأيضا العلاقات باستمرار بينهما كانت جيدة ولكنها توترت أخيرا لكنها لم تدخل حروب مثلا على سبيل المثال مع إسرائيل الوضع مختلف تماما
مسعد أبو ليلة: أتحول إلى الكاتب الصحفى الأستاذ توحيد مجدى ماذا ما يجرى يعنى فى كواليس صفقة تبادل الأسرى المصريين فى السجون الإسرائيلية وإطلاق سراح الأسير الإسرائيلى إيلان جرابيل ؟
أ / توحيد مجدى : صفقة الجاسوس إيلان جرابيل صفقة معقدة وصفقة ستكون إذا تمت صفقة غير مسبوقة وإسرائيل نفسها قالت عنها حاليا إن هى هتبقى صفقة تاريخية وأطلقوا عليها اسم صفقة الموسم ليه لإن التبادل بتاع إيلان جرابيل مش هيبقى فقط بين مصر وإسرائيل احنا
مسعد أبو ليلة : حضرتك وصفت الصفقة دى بحاجتين أنها معقدة وأنها الموسم يعنى إن هى صفقة الموسم ليه بقى معقدة ؟
أ / توحيد مجدى : معقدة لإن فيها 3 أطراف وليس طرفين زى كل مرة يعنى فيه كل مرة بيبقى فيه طرفين هم اللى بيتبادلوا الجواسيس مصر مثلا وإسرائيل أو إسرائيل وأى طرف أو أى دولة عربية المرة دى فيه طرف ثالث وطرف قوى اللى هو الولايات المتحدة الأمريكية لإن الجاسوس بيحمل الجنسية الأمريكية والجنسية الإسرائيلية
مسعد أبو ليلة : على اعتبار إن هو برضه جنسية أمريكية ؟
أ / توحيد مجدى : بالضبط فى البداية عايزين نقول إن الموساد فى الفترة الأخيرة ابتدى يدفع بالعناصر التى تحمل جنسيات مزدوجة وده لسبب لتوريط الدول الأخرى التى يحمل الجاسوس الجنسية بتاعتها فتضطر سياسيا ودبلوماسيا بسبب الضغط الشعبى من الداخل أو بسبب ضغط الرأى العام أو الدولى إن هى تتدخل من أجل الجاسوس فده اللى حصل فى صفقة جرابيل إن هو إسرائيل هى اللى بعتته يتجسس ويتجسس لحساب إسرائيل فى حين أن أمريكا وجدت نفسها متورطة فى التفاوض على إطلاق سراح إيلان جرابيل وهى تقريبا اللى هتتحمل الجانب الأكبر فى التنازلات التى ستقدم لأن إسرائيل فى النهاية ستقدم مجموعة من المصريين محتجزين لديها بشكل إن هم ممكن نطلق عليهم أسرى مش إن هم مجرمين زى الأطفال ، الأطفال لم يجرموا فى حق إسرائيل الأطفال خطفوا من على الحدود وأصبحوا ورقة ضغط فى أيدى إسرائيل
مسعد أبو ليلة : وكان وزير الخارجية يعنى اتحفظ على كلمة أسرى وهم ليسوا بالمعنى الدقيق للأسرى هم محتجزون أو مسجونين
أ / توحيد مجدى : محتجزين
مسعد أبو ليلة : نتحول إلى الناشط السيناوى مصطفى الأطرش ، أستاذ مصطفى ما التهم التى كثيرا ما تتهم بها إسرائيل يعنى من تعتقلهم من المصريين على الحدود أو غيرها ويتم اعتقالهم على أساسها ؟
أ / مصطفى الأطرش : هوأغلب النمط ده هو التسلل
مسعد أبو ليلة : تهمة التسلل ليه التهمة دى مشهورة ؟
أ / مصطفى الأطرش : متسلل لإن هى أصلا تجارة السجائر والمعسلات والحاجات دى
مسعد أبو ليلة : والدخان والحاجات دى
أ / مصطفى الأطرش : آه
مسعد أبو ليلة : منتشرة الحاجات دى على الحدود ؟
أ / مصطفى الأطرش : هى كانت منتشرة لكن دلوقتى متحجمة جدا الفترة دى هو بيتسلل لإن هو بيودى الكارتونة ويرجع مقابل إن هو ياخد 150 جنيه عشان خاطر يوصلها للشق الثانى لعرب 48 اللى هم أصحاب الأرض الأساسيين دى بالنسبة للشق الجنائى ، الشق السياسى اللى هو بيكون فى الأغلب سلاح ده بيكون فى الأغلب
مسعد أبو ليلة : يبقى احنا عندنا دلوقتى تسلل تهم تسلل وتهم إيه ثانى ؟
أ / مصطفى الأطرش : تهم تسلل وتهم
مسعد أبو ليلة : هل فيه تهم قتل مثلا ؟
أ / مصطفى الأطرش : لا مفيش أى تهم تدين
مسعد أبو ليلة : إقامة غير شرعية ؟
أ / مصطفى الأطرش : إقامات غير شرعية توجد إقامات غير شرعية دى موجودة فعلا بس الأكثر تسلل
مسعد أبو ليلة : كم عددهم ؟
أ / مصطفى الأطرش : والله أنا أمس جاءنى تليفون من شقيق أحد هؤلاء الأسرى فقال أنا أخويا اتصل بى بعد ما طلبت إن انت تعمل إحصائية كام مصرى فى السجون الإسرائيلية وحسبوا لقوهم 157 شخص
مسعد أبو ليلة : 157
أ / مصطفى الأطرش:157
مسعد أبو ليلة : يبدو إن سيادة اللواء متحفظ على هذا العدد كام بالضبط ؟
ل / سامح سيف اليزل : الرقم المحصور تماما والمتفق عليه
مسعد أبو ليلة : أنا قرأت على حسب معلوماتى 78 و3 أطفال يبقى 81
ل / سامح سيف اليزل : 81 شخص وتقسيم الجرائم أنا هقول لحضرتك عليهم
مسعد أبو ليلة : هنرجع لحضرتك يا سيادة اللواء سامح بعد ما نتصل بسيادة المحامى محمود سعيد المحامى المصرى وأمين عام اتحاد المحامين الأفروآسيوية لحقوق الإنسان أيضا رئيس حملة المطالبة بالإفراج عن الأسرى والمحبوسين والمعتقلين المصريين الموجودين فى المعتقلات والسجون الإسرائيلية مساء الخير أستاذ محمود
أ / محمود سعيد : مساء النور يا أستاذ مسعد
مسعد أبو ليلة : يعنى كلمنى عن آخر الجهود اللى قمتم بها للإفراج عن الأسرى والمعتقلين فى السجون الإسرائيلية ؟
أ / محمود سعيد : فى الواقع أنا بتكلم فى منظومة قانونية بدأت فى شهر 7
مسعد أبو ليلة : فى شهر 7 اللى فات ده ؟
أ / محمود سعيد : فى 7 اللى فات آه بدأنا نتحرك لما نزلت قضية ال3 أطفال للمحاكمة أمام محكمة جنائية للكبار الراشدين البالغين فى محكمة جين بالاس الإسرائيلية اتصل بى أصدقائى نشطاء حقوق الإنسان ازاى انتوا ساكتين على ال3 أطفال اللى هيتحاكموا بعقوبات تصل إلى 15 سنة استوقفنى الموضوع ده بدأت أعمل هيئة دفاع عن هؤلاء الأطفال والمعتقلين فى السجون الإسرائيلية وتم التصديق مع الأستاذة نورهان عبد الهادى ناشطة إسرائيلية شهيرة من عرب إسرائيل اللى موجودين فى عرب 48 وبالفعل بدأنا ننسق عشان نحول محاكمة ال3 أطفال من محكمة الراشدين إلى محكمة الأحداث ظهرت عملية توافق بين رئيس المحكمة ورئيس النيابة بنية الاتجاه على حبس الأطفال 15 سنة بعتنا الموقف ده بمذكرات متبادلة على الإنترنت وعن طريق الإجراءات القانونية المتبادلة ونجحنا إن احنا نخلى المحكمة منمحكمة البالغين إلى محكمة الأحداث ونجحنا أيضا فى إقالة القاضى اللى كان بينظر القضية وتعيين مكانه قاضية انتهى الأمر إن ربنا كلل جهودنا بالنجاح وصدر حكم بشهرين اللى هى مدة الحبس الاحتياطى اللى قضوها هؤلاء الأطفال وكمان أصدر الحكم قاضية للمحكمة المركزية فلما صدر هذا القرار رئيس النيابة العسكرية رئيس النيابة الإسرائيلية استأنف هذا القرار واتحدد له جلسة ونظرت المحكمة المركزية هذا القرار ورفضته والحمد لله ربنا كرمنا إن الأطفال ال3 خدوا الحكم الشهرين دول واللى هى كانت مدة الحبس
مسعد أبو ليلة : هو حصل إفراج لحد وللا انتوا تنفذوا ؟
أ / محمود سعيد : آه القرار صدر من القاضى بالإفراج
مسعد أبو ليلة : نعم ؟
أ / محمود سعيد : القرار صدر من المحكمة المركزية ورفض استئناف النيابة وبالتالى بيتم الإفراج خلال 24 ساعة ودلوقتى بيتم بالتنسيق مع وزارة الخارجية والحمد لله والقنصلية المصرية هناك لها دور مشرف وبشهد لهم شهادة تقدير وشهادة حق إنهم لم يلوا جهدا منذ تاريخ صدور هذا القرار لأنهم فعلا على قدم وساق يقوموا بعمل دؤوب للإفراج عن هؤلاء ال3 أطفال ، المفاجأة اللى احنا سعداء بها إن ربنا يكلل مجهوداتنا إن احنا بنسعى دلوقتى لتطليع ال 78 سجين مصرى موجودين فى السجون الإسرائيلية فى سجن كافتيعات فيه 18 واحد ، سجن رفلة فيه 25واحد فى نفلة فيه 10 فمتوزعين على أكثر من 3 سجون
مسعد أبو ليلة : طب فرصة يا أستاذ محمود تكلمنا عن أحوال الأسرى هناك ازاى بتكون المعاملة من إسرائيل تجاههم كيف تكون حياتهم
أ / محمود سعيد : للأسف الشديد يا أستاذ مسعد هناك مفيش أى مبدأ من مبادئ حقوق الإنسان فى العقوبات الجنائية والمصرى بيطبقوا عليه القانون رقم 54 الخاص باختراق الأجانب الحدود المصرية – الإسرائيلية فيتم معاملة المصريين داخل حدود الدولة وهو فرد من جهة معادية ده المبدأ القانونى فى القانون 54
مسعد أبو ليلة : يعنى إيه الكلام ده ؟
أ / محمود سعيد : يعنى بيعتبروا المصرى ده جاى من دولة معادية مش جاى من دولة فيه سلام بينه وبينها وده كلام خطير جدا جدا
مسعد أبو ليلة : يعنى بتشير إلى إن المعاملة ليست على ما يرام ؟
أ / محمود سعيد : بالتأكيد يا فندم احنا ازاى أمريكا لما مضت على معاهدة السلام بيننا وبين إسرائيل وحفظت هذه الاتفاقية قالت إن لازم يكون فيه علاقات تطبيع بين البلدين بين مصر وإسرائيل على إنها دول صديقة وازاى عملنا اتفاقية الكويز وازاى بنعمل اتفاق زراعى وصناعى بناء على كامب ديفيد انت ازاى بتطبق على كامب ديفيد فى الحاجات اللى فيها مصلحتك والحاجات اللى فيها ولادى محبوسين بتعذبهم وبتحرمهم من الزيارة وبتحرمهم من أبسط حقوق الإنسان بتقييد حريته فى إن هو يمارس حق دفاعه عن نفسه وتحطه تحت محاكمات ظالمة وعادلة أعتقد إن أبسط حاجة لازم نعملها مع الناس دى إن احنا نخلى لجنة دولية من هيئة الأمم المتحدة والولايات المتحدة الأمريكية تروح تشوف الحاجات دى هيومان رايتس ووتش بتعمل تقرير عن كل دولة عن تطبيق حقوق الإنسان إسرائيل اللى بتطلع تتشدق بإنها الدولة المحافظة على حقوق الإنسان بتنتهك هذه المواثيق والأعراف وخاصة حقوق الإنسان جهارا نهارا
مسعد أبو ليلة : هل ترى أن إتمام الصفقة مقابل إيلان جبرايل يمكن أن يحل المشكلة
أ / محمود سعيد : يا أستاذ مسعد أنا المتحدث الرسمى ل 78 مسجون ومعايا توكيلات من أسرهم فى مصر اللى بقوله على لسان المسجونين المصريين فى إسرائيل هم بيقولوا احنا مش عايزين نطلع ونروح بيوتنا إلا لما السجناء العرب كلهم يروحوا الناس دى عندها إيثار ، الناس دى ممكن تضحى بنفسها
مسعد أبو ليلة : أستاذ محمود سعيد أمين عام اتحاد الأفروآسيوية لحقوق الإنسان أيضا رئيس حملة المطالبة بالإفراج عن الأسرى المحبوسين والمعتقلين المصريين فى سجون إسرائيل شكرا جزيلا ، سيادة اللواء سامح اتفضل بالتعليق عليه
ل / سامح سيف اليزل : هو ال78
مسعد أبو ليلة : احنا دلوقتى بنؤكد إنهم 78
ل / سامح سيف اليزل : آه
مسعد أبو ليلة : معتقل مصرى فى إسرائيل بالإضافة ل3 أطفال يعنى لا تتعدى أعمارهم 14 سنة
ل / سامح سيف اليزل : ايوه واستكمالا لموضوع الأطفال عايز أبشر حضرتك وأبشر السادة المشاهدين إنهم قد يستمعون إلى خبر سار قريبا بخصوص الأطفال
مسعد أبو ليلة : احنا بننفرد به فى اتجاهات
ل / سامح سيف اليزل : ايوه
مسعد أبو ليلة : نبشر الأطفال ونبشر أهاليهم ببشرة سارة
ل / سامح سيف اليزل : قريبا جدا ومش هيكونوا مرتبطين بموضوع الصفقة بتاعت جرابيل هيكونوا صفقة لوحدها وأعتقد أن هذا الخبر السار سيكون قريبا يعنى مش هيطول يعنى وده أول مرة يتذاع على فكرة ، ال78 واحد اللى موجودين مقسمين إلى 3 أقسام ؛ قسم ما أخدش أحكام ولازال تحت التحقيق رهن التحقيق ، القسم الثانى زى ما تفضل الأخ مصطفى بإنهم متهمين باتهامات شخصية تحديدا يا قلت فيه 6 جرائم قتل حكم عليهم وفيه بعض الآخرين شروع فى قتل وفيه بعض آخرين تسلل والتواجد داخل الأراضى الإسرائيلية بدون إذن وبدون إقامة البعض الآخرين تزوج من داخل السيدات الإسرائيليات عرب 48 ورفعوا عليهم قضايا أحوال شخصية وحكم عليهم فى قضايا أحوال شخصية دى القضايا اللى هى الشخصية أما القضايا اللى هى السياسية أو الأمنية فهى حمل سلاح أو قضايا خاصة بالأعمال الأمنية ودول ال3 تقسيمات المقسمين بها ال78 والحقيقة الإفراج المصرى عن ال78 قائم هناك بعض الأقاويل من الجانب الآخر اللى رهن التحقيق لسة ما اتحققش معاه هو ده اللى يمكن مطول فترة المناقشات والمفاوضات يعنى
مسعد أبو ليلة : أستاذ توحيد البعض بيربط تلك الصفقة اللى هى بتشمل المسجونين المصريين فى السجون الإسرائيلية و الجاسوس الإسرائيلى إيلان جرابيل أيضا هناك جاسوس إسرائيلى آخر يسمى عودة ترابيل ، ترابين ، هل يمكن أن يدخل فى الصفقة ؟
أ / توحيد مجدى : أولا أنا هاجى لحضرتك للنقطة دى بس تعليقا على اللى قالوا الأستاذ مصطفى فيه حاجة مهمة جدا مصر فى خلال ال10 سنوات الأخيرة أعادت إلى إسرائيل 40 مواطن إسرائيلى ضلوا طريقهم إلى سيناء سواء سيناء ناحية طابا أو سواء نواحى أكثر قربا من العريش 40 مواطن إسرائيلى مصر قدمتهم لإسرائيل بلا ثمن بلا أى مقابل مجرد إن هم ضلوا الطريق منهم 6 طلبة ضلوا الطريق فى مؤسسة دينية تسللوا ، قالوا إن هم ضلوا الطريق لكن هم فى حكم القانون المفروض إن احنا نقول عليهم تسللوا ومصر أعادتهم أثناء حكم النظام السابق دون أى ///
مسعد أبو ليلة : سنة كام ده يا أستاذ توحيد ؟
أ / توحيد مجدى : فى سنة 2010 فى حوالى مايو 2010 وفيه حادثة مشهورة يعنى 40 مواطن رجعتهم مصر كل ما بيخشوا بترجعهم مصر دون أن تطبق عليهم القانون دون أن تأخذهم أو تعتقلهم دون أن تأخذهم رهائن دون أن توجه إليهم أى اتهامات دون أن تحبسهم زى ما حصل مع الأطفال اللى عندهم 14 سنة فيه مواطن إسرائيلى مريض نفسيا مشهور قوى إسمه ديفيد فى قلب إيلات دائما بيحب يعوم من إيلات لحد طابا ومشهور جدا للسلطات المصرية فى الحدود وبياخدوه يرجعوه لإنه مجنون طابا فهل المفروض دلوقتى إن احنا نطالب السيد محافظ شمال سيناء والسيد محافظ جنوب سيناء بل نطالب السلطات المصرية بشكل عام فى القاهرة وأعلى سلطة إن أى مواطن إسرائيلى من هنا ورايح يضل طريقه إلى الحدود يفضل إن يقبضوا عليه ويطبقوا عليه القانون
مسعد أبو ليلة : يعامل نفس المعاملة احنا اتعاملنا معاهم معاملة إنسانية لم تقابل بنفس المعاملة
أ / توحيد مجدى : بالضبط زى ما بتحكموا بال15 وال20 سنة من فضلكم احكموا عليه بال30 وال40 سنة علشان إسرائيل ترتد عن اللى هى بتعمله لإن إسرائيل لا تفهم غير منطق القوة لا تفهم غير منطق القوة دية حاجة ، بالنسبة لعودة ترابين عودة ترابين هو شرط من شروط إيلان جرابيل ؛ إيلان جرابيل جاسوس عودة ترابين محكوم عليه فى مصر بالسجن ينتهى فى ديسمبر سنة 2015 وهو جاسوس وبصراحة والده كمان جاسوس يعنى والده سليمان ترابين هو كمان تجسس على مصر
مسعد أبو ليلة : يعنى عائلة جواسيس
أ / توحيد مجدى : وبدليل إن أبوه ما بيقدرش يزوره فى مصر اللى بتزوره فى مصر والدته بتقدر تزوره فى المناسبات معينة وهو لا يمكن إنه يخش مصر الجاسوس سليمان ترابين هو كمان مطلوب للسلطات المصرية ومحكوم عليه بالمؤبد
مسعد أبو ليلة : طيب على ذكر الأطفال واللى بشرهم اللواء سامح بالخبر السعيد وليس مرتبط بالصفقة مع إسرائيل معنا والد أحد الأطفال والد محمد وهو الأستاذ سليم صرب مساء الخير أستاذ سليم مساء الخير ، كان المفروض منين كان المفروض من العريش وللا منين ، كان المفروض من العريش على العموم احنا نحب إن يتم الاتصال بسأل الأستاذ مصطفى يعنى ممكن يكون فيه أهلك ، فيه قرايبك فيه ناس بتتصل بهم من الأسرى المصريين الموجودين فى إسرائيل كيف يطلعوك على المعاملة بالنسبة لهم ؟
أ / مصطفى الأطرش : هم بيطلعونى إن المعاملة سيئة أكيد بس
مسعد أبو ليلة : هل بيطلب حاجة مثلا بطريقة أو بأخرى بيتصلوا بأهاليهم ؟
أ / مصطفى الأطرش : هم بيتصلوا بأهاليهم يعنى ده متاح ، متاح إنه يتصل بس له أوقات تقريبا أو مواعيد أو شئ زى كده محجمة يعنى هم دائما بيشكوا بيعانوا بيقولوا احنا مستعدين ناخد مؤبد فى السجون المصرية ذل وطن ولا ذل صهيونى إسرائيلى على الأقل احنا هنشوف نفسنا فى مصر مهما كانت المعاملة ده اللى بيعاملنى أخويا أما ده قتل أخويا
مسعد أبو ليلة : هل حصل على حسب رؤيتنا أو ما تردد فى الفترة الأخيرة قضايا تسلل علشان كثرتها بيبالغوا وللا دى فعلا حقيقة إن القوات الإسرائيلية هى اللى بتتوغل يمكن بعض الأمتار وبتقبض وللا هناك فيه خطر إن هم فعلا بيخترقوا الحدود الإسرائيلية ؟
أ / مصطفى الأطرش : أكيد هناك فيه أخطاء من الجانبين سواء من الجانب الإسرائيلى أو من الجانب المصرى حقيقة بس طالما هناك يراد من هذا الخطأ لابد أن نضع حلا لهذا الخطأ أو نعلم ما هو سببه ونضع له حل طبعا اللى بيتسلل ده بيتسلل من أجل إيه من أجل 150 جنيه من أجل يعدى الكارتونة أو 200 جنيه
مسعد أبو ليلة : يعنى هناك خطأ ؟
أ / مصطفى الأطرش : آه
مسعد أبو ليلة : طب مفيش توعية يا أستاذ مصطفى يعنى على أساس إن ده خطأ ؟
أ / مصطفى الأطرش : أنا حضرتك لما أوعيه هيقول لى هات أنا بشوف إن الطريقة هذه خاطئة أنا مش مع أنا ضد ولكن طريقة أفضل من إن هو يفضل قاعد فى سيناء لا عمل ولا وظيفة ولا مأكل ولا أى دخل يصرف على عائلته بالتالى بيتجه الشباب فى الأغلب هم اللى بيتجهوا لهذه الطريقة مقابل إن هو يجيب مبلغ بسيط من المال يقضى به حياته كشاب وهو فى الأغلب يعنى للأسف يعنى
مسعد أبو ليلة : على العموم خلونا نشوف مع بعض هذا الفيلم أو هذا الفيلم التسجيلى اللى أذاعته القناة العاشرة الإسرائيلية للصفقة المحتملة لمبادلة الأسير الإسرائيلى الجاسوس الإسرائيلى إيلان جرابيل ببعض أو بالأسرى المصريين فى إسرائيل
فاصل
عبارة عن لقطات للبرنامج الذى أذاعته القناة العاشرة الإسرائيلية بخصوص الأسرى المصريين فى إسرائيل
مسعد أبو ليلة : إذا نعود لسيادة اللواء سامح بعد البشرى اللى انت بشرت بها أهالى الأطفال وبشرت بها المصريين إن هم هيسمعوا خبر سار ليس مرتبط بصفقة أو بغيره إفرض سيادتك لو حصل زى ما سمعنا إن إسرائيل بتستخدم اعتقال واحتجاز هؤلاء ال3 أطفال كوسيلة ضغط فى صفقات قادمة لن نحل الآن بعد هذا الخبر
ل / سامح سيف اليزل : ايوه كان فى الأول الحقيقة كان ضمن المفاوضات الأولى
والقيادات المصرية الحقيقة عملت مجهودات جامدة جدا خلال الأيام الماضية ولا تزال وهناك فى الفترة القادمة إن شاء الله هنسمع خبر كويس قريب بس أنا عاوز أعقب فى الحقيقة على اللى قاله الأستاذ مصطفى إذا كان فيه حد فعلا محتاج فلوس 150 جنيه أو 200 جنيه هذا هو العرف اللى موجود تسلم كارتونة السجائر الناحية الثانية تاخد 150 جبت 5 تاخد على كل واحدة 150 جنيه وهذا هو الشائع حاليا المشكلة دى
مسعد أبو ليلة : التجارة المزدحمة
ل / سامح سيف اليزل : هذه هى وجهة نظرهم ولكن هذا يضع مصر فى مشاكل مع طرف ثانى أيضا
مسعد أبو ليلة : أكيد
ل / سامح سيف اليزل : فاحنا نتكلم بقى على الناحية القانونية والناحية اللى بتضع مصر فى حرج مع دولة أخرى وهى أساسا العلاقات ليست على ما يرام أو يعنى بشكل عام وبالتالى هذا العمل الذى يراه بعض الناس إنه عمل مشروع وإن هو أكل عيشهم فى الجانب الآخر هو عمل غير قانونى وفى نفس الوقت احنا لن نشجع أحد على عمله على الإطلاق بل بالعكس إحنا بنرجوهم يتوقفوا عن هذا
مسعد أبو ليلة : لا يعنى فيه حد بيشجعه إن هو بيقوم بده ؟
ل / سامح سيف اليزل : يعنى هم بيبقوا مدربين على هذا والأهالى هناك بيعتبروا دية هى الحرفة يعنى ما اسمهاش تسلل ولا تهريب ولا حاجة دى صنعته إن هو يعمل هذا يعنى فاحنا الحقيقة بنحذر من هذا الكلام بيضع نفسه فى مشكلة إن هو بيروح يتحاكم مش بس كده ده بيتحكم عليه ب 10 أو 15 سنة سجن فدى مشكلة كبيرة الحقيقة ومصر النهاردة فى موضع تفاوضى مع الجانب الإسرائيلى ونقعد بقى نتفاوض وعايزين مين وعايزين إيه ويحطنا فى مشكلة يعنى
مسعد أبو ليلة : أستاذ توحيد ليس الأمر قاصر على المعتقلين المصريين فى داخل السجون الإسرائيلية إنما الأمر أيضا يطال المعتقلين المصريين المسجونين فى بعض السجون الأمريكية ليس هذا فقط أيضا لكن هناك أيضا الإخوة الفلسطينيين بعد صفقة شاليط بيتطلعوا إلى أى صفقة بتتمها مصر طبعا كأمل فى مصر أيضا وامتداد لدورها فى هذا الصعيد يأملون فى أن تشمل الصفقة القادمة أيضا الأسرى الفلسطينيين داخل إسرائيل من هم لم تشملهم صفقة شاليط تعليق سيادتك
أ / توحيد مجدى : هو بصراحة المخابرات المصرية فى موضوع صفقة شاليط حققت عدة ميزات وعدة مكاسب لمصر هنا زى ما قال سيادة اللواء الاعتذار الإسرائيلى المكتوب ده اعتذار ما يتقالش بالبق الاعتذار الرسمى لا يقال بالفم زى ما أنا بعتذر لك ده بيبقى اعتذار موثق وممضى عليه من الحكومة الإسرائيلية أو المفوض باسم الحكومة الإسرائيلية وده تاريخ جديد يضاف إلى تاريخ مصر ، فى قلب صفقة شاليط مصر حققت عدة حاجات منها مثلا فيه مواطن أردنى حكومة الأردن طلبت من مصر برجاء إن مصر تضغط لكى يفرج عن المواطن الأردنى وبالفعل المواطن الأردنى هيروح بيتهم فى إطار صفقة شاليط ، فى إطار صفقة شاليط مصر حققت أشياء كثيرة منها معروف وحاجات لا زالت سرا للجهات المصرية لا يصح الإفصاح عنه
مسعد أبو ليلة : يعنى تبعات الصفقة
أ / توحيد مجدى : هى صفقة كبيرة بصراحة وحاجة كبيرة وعظيمة شئ عظيم يعنى اللى احنا نعرفه ده جانب من الصفقة وكان جانب منهم الأطفال يعنى ده جانب منها
مسعد أبو ليلة : تعقب على الكلام ده يا سيادة اللواء
ل / سامح سيف اليزل : الأطفال ما لهاش علاقة بالموضوع ده
مسعد أبو ليلة : لا ما أقصدش الأطفال
أ / توحيد مجدى : كانت وعد
ل / سامح سيف اليزل : كان وعد ولا يزال يعنى الأطفال مش هيطلعوا بكرة
أ / توحيد مجدى : لا احنا ما بنتكلمش إن هم هيطلعوا بكرة احنا بنقول إن ده كان وعد من الوعود لكن لم يذكروا إن هم هيطلعوا بكره لكن هو وعد من الوعود بالنسبة لموضوع إيلان جرابيل والموضوع بتاع السجون المصريين فى أمريكا الكلام عليه موسع شوية لإن إسرائيل لم تتفاوض حتى الآن على مجموع الأسرى الموجود فى إسرائيل ، إسرائيل عايزة تحصر التفاوض على 25 مصرى مش فى الرقم الكامل عايزة تحصرهم فى 25 مصرى فقط وإذا طالعنا الإعلام الإسرائيلى نجد إنهم بيتكلموا على 25 مصرى وده وسيلة من وسائل الضغط ووسيلة من وسائل التفاوض إسرائيل عاوزة تحقق منها عاوزة تفرج عن الجاسوس جانيسون بولارد المسجون فى الولايات المتحدة فى قضية أخرى ليس لها علاقة بمصر كان بيتجسس على أمريكا لحساب إسرائيل وإسرائيل عايزة تتضمنه ضمن الصفقات
مسعد أبو ليلة : لا يعنى مصر ليس لها طرف فى هذا
أ / مصطفى الأطرش : مصر ليس لها طرف فى هذا إنما إسرائيل
مسعد أبو ليلة : إسرائيل عايزة تقحمها ؟
أ / مصطفى الأطرش : عايزة تقحمها ما الصفقة علشان كده ما أنا بقول لحضرتك علشان كده الصفقة معقدة فيها مواطن إسرائيلى – أمريكى
مسعد أبو ليلة : على اعتبار إن جرابيل أمريكى الجنسية
أ / مصطفى الأطرش : آه إذن دخل فيها حاجات كثيرة وهناك تكهنات لم تتضح بعد لم توثق ولم تذكر فى وسائل الإعلام سواء من الطرفين الشيخ عبد الرحمن فيه تحدث وكلام عنه
مسعد أبو ليلة : هنيجى للشيخ عمر عبد الرحمن فى موضوع الصفقة وهسأل أستاذ مصطفى سمعت كلام اللى قاله سيادة اللواء سامح يعنى يبدو إن التوعية هناك على الحدود إخواننا هناك اللى ممكن يخطئوا سواء كبار أو صغار زى ما شفنا فى غيبة التوعية يعنى فى غيبة إن احنا نوجههم الوجهة السليمة بحيث ما تتكررش أخطاء بسيطة ينتج عنها زى ما احنا شايفين عواقب تكون أكبر من هذه الحوادث خاصة الطرف الآخر زى ما بنقول يعنى بيتلكك
أ / مصطفى الأطرش : بداية لا يجب ألا نجعل المناطق الحدودية بطل وهو يعانى ويفكر قبل أن ينام من إين سيأتى بالماء غدا فعلينا قبل أن نجعله بطل علينا أن نوفر له سبل المال
مسعد أبو ليلة : طب احنا شايفين دلوقتى انت رأيك فى التوجه ما بعد ثورة 25 يناير توجه نحو سيناء
أ / مصطفى الأطرش : والله هو حقيقة حتى اليوم أول حاجة احنا سمعنا كلام كثير فى عهد العصر البائت وحتى من بعد ثورة 25 احنا حتى اليوم كل ده على الورق يعنى أنا عايز حاجة واقعية على أرض الواقع مش كثير أنا طلباتى بسيطة النهاردة زيتون أنا فى موسم الزيتون عندى الزيتون حاليا مش لاقى اللى يشيله الكيلو كان ب 5 جنيه وب 6 جنيه النهاردة الكيلو بجنيه ومش لاقى اللى يشتريه فده على الأقل اسمه سوق ده لو احنا يعنى
مسعد أبو ليلة : احنا خلينا مع الأستاذ مصطفى الأطرش فى حلقات احنا خصصناها لتنمية سيناء المستقبل القادم وواعد بالنسبة لسيناء
أ / مصطفى الأطرش : احنا نتمنى كده
مسعد أبو ليلة : على العموم احنا هنستكمل لقاءنا لسة حلقاتنا ممتدة نستكملها فى الحلقة القادمة بقى أن نتوجه بالشكر لسيادة اللواء سامح سيف اليزل الخبير الأمنى والاستراتيجى وأيضا الشكر للكاتب الصحفى الأستاذ توحيد مجدى شكرا يا فندم والشكر أيضا للناشط السيناوى السيد مصطفى الأطرش والشكر والتحية لكم أعزائى المشاهدين ونستكمل هذا اللقاء فى الحلقة القادمة من اتجاهات إلى اللقاء