اتجاهات

عمرو الشناوي : أهلاً بكم وهذه الحلقة الجديدة من إتجاهات .. يبدو إن الجدل والإختلاف أصبح من أهم سمات المجتمع المصري بعد ثورة 25 يناير الخلاف الذي نناقشه هذه المرة لا يدور حول الدستور أو الجمعية التأسيسية لكتابة الدستور أو حتي الشروط التي يجب توافرها في الرئيس القادم الخلاف هذه المرة يدور حول قضية بتتسبب كل عام في معاناة الكثير من المصريين وايضاً الإساءة لسمعة مصر في الخارج – الموضوع هو تنظيم الحج والعمرة أصبح التعامل مع عملية التنظيم كسلعة مش خدمة لغرض الحصول علي أعلي عائد ما بنبصش لتقنين الخدمة وتحسينها وتطويرها وضمان وصولها الي مستحقيها كلٌ طبقاً لقدرته المالية ولكن في ظروف أمنية وصحية وآدمية بتكفل الكرامة والحفاظ علي إنسانية كل مصري حاج أو معتمر .. يبدوا إن فيه مشاكل كثيرة في الحقيقة ستواجه موسم الحج هذا العام لإن الخلاف لا يزال محفوفاً حول أحقية تنظيم حج القرعة ما بين شركات السياحة ووزارة الداخلية – وزير الداخلية أعلن إن الموسم الحالي هو الأخير في تنظيم وزارة الداخلية للقرعة ووصلنا الي محاولات برلمانية ومقترحات مطروحة فعلاً لإيجاد شكل جديد للتنظيم بنصل لمفهوم بيطرح حالياً بإسم الهيئة المستقلة للحج والعمرة – الحكومة في الحقيقة كلفت فضيلة المفتي بإنشاء هذه الهيئة لكن شركات السياحة بتطرح تصور آخر لهيئة عليا مستقلة ثانيه خالص وفيه مقترح ثالث بإنشاء هيئة عليا للسياحة الدينية بشكل عام بتعمل بصورة مركزية مستقلة ايضاً بتضم عدد من اللجان الفرعية المتخصصة .. نناقش هذا الموضوع في حلقة الليلة وإنحيازنا بنعلنه في بداية الحلقة .. المفروض العمل الإعلامي عامةً يجب أن يكون محايد ولكن لازم ننحاز هذه المرة الي المواطن البسيط محدودي الدخل الذي يقتطع من ثوت يومه وقوت أولاده عشان يوفر مبلغ يؤدي به هذه الفريضة المقدسة .
قبل ما نبتدي في الحقيقة حلقة الليلة حآخدكم الي موضوع ناقشناه الإسبوع اللي فات وهو إغلاق مصنع مبكو للبتروكيماويات ( صدر منذ فترة حكم قضائي بفتح هذا المصنع ) وتعددت المبادرات لفتح المصنع مرةً أخري لكن أي من هذه المبادرات لم يتوصل الي نتيجة حتي الآن بنحاول نتابع هذا الموضوع وبيسبب هذا الموضوع بكل تأكيد وبشهادة كل الخبراء خسائر خسيمة للإقتصاد المصري أيضاً بيسبب مخاوف وبيثير مخاوف لدي البعض من آثار ولكن هذه الآثار حقيقةً لم يثبت صحتها .. معنا للتعليق علي ما حدث في مصنع مبكو حتي هذه اللحظة المهندس أسامة كمال رئيس مجلس إدارة الشركة القابضة للبتروكيماويات أهلاً بك يا باشمهندس
م.أسامة كمال : أهلاً وسهلاً بك
عمرو الشناوي : في الحقيقة عايزين نعرف إحنا الإسبوع اللي فات لما قعدنا كان فيه موعد وفيه إجتماع في محافظة دمياط يوم الإثنين وكنا متوقعين يسفرعن حاجة معينة إيه اللي حصل
م.أسامة كمال : هو الحقيقة إنه إحنا فعلاً كان فيه إتفاق مع مجموعة كبيرة من السادة أعضاء مجلس الشعب والشوري والسيد المحافظ والحاكم العسكري لدمياط والسيد مدير الأمن وقيادات من المجتمع المدني إن إحنا نقعد ونتفق علي الآلية عشان خاطر ننفذ الحكم اللي طلع من المحكمة بس هنا عايز أقرأ حاجتين في الحقيقة لإن أنا شايف إن هم فخر للقضاء المصري إن إحنا نقرأهم .. برغم إن هيئة المحكمة حكمت للشركة أنها تُعيد العمل في مصنعها المتوقف إلا أنها قالت في الحكم – "وتنوه المحكمة في النهاية الي أنها تحرص كل الحرص علي إرساء دعائم العدل وأن المتقاضين لديها سواء حكومةً أو أفراد متساوون أمامها لا قوي لديها ولا ضعيف فمل ترهب من أحد لقوته ولم تستخف بحق أحد لهوانه وقلة حيلته إنما هدفها الإطلاع بدليل مهامها وأن قضاتها وقد عرفوا الحق فقادوا به" .. وقالت إيه كمان " وتنوه المحكمة الي أن هذا القضاء لا يجب التوصيات التي إرتأتها كلٌ من اللجنة المشكلة بقرار وزير البيئة أو التوصيات التي إرتأتها اللجنة المشكلة بقرار المحكمة وتؤكد علي إلتزام الشركة المدعية بتنفيذ التوصيات الواردة بتقرير اللجنة المشكلة بقرار وزير البيئة ولا تتخذ من هذا القضاء ذريعة للتنصل منها " في الحقيقة هذا الحكم
عمرو الشناوي : يعني الحكم بيدي لكم الحق أن تفتحوا ولكن بتلتزموا بالتوصيات وعملتوا إجتماع يوم الإثنين اللي فات ليه الدنيا ما مشيتش
م.أسامة كمال : تمام عملنا إجتماع وإفترضنا فيه كل هذه الأشياء الجميلة التي سرد بشأنها الحكم وبدينا في صياغة بروتوكول علشان نوجد آلية لتنفيذ الحكم إن إحنا نبتدي نتكلم في تنفيذ الخطة اللي إتفق عليها المجتمع وفي نفس الوقت نعاود الشغل وقاربنا علي إن إحنا نمضي بروتوكول بعد صياغته ودا كان بناءاً علي حديث كثير من العقلاء من الجانبين إلا أن هناك في الدقائق الأخيرة سارت حالة من إن ما فيش ضمانات موجودة وإن الشركة بتضحك علي الناس وإنها مش حتنفذ الكلام ده وإن الكلام ده مجرد وعود زي ما بنسمع وعود كثيرة في حاجات كثيرة ولا توجد آلية لتنفيذ هذا الكلام مما أسفر عن حالة من الهرج وإضطرينا إن إحنا ننهي الإجتماع علي هذا
عمرو الشناوي : دا الثقة مش موجودة أصلاً
م.أسامة كمال : صحيح فإنتهي الإجتماع بدون أن ننجح في توقيع البروتوكول اللي كنا علي وشك إن إحنا نوقعه واللي بيتضمن الأربع نقاط اللي حددها السيد رئيس مجلس الوزراء في إجتماعه مع السادة أعضاء البرلمان بجانبيه الشعب والشوري ولم نكمل ولم نوقع هذا البروتوكول
عمرو الشناوي : طيب والحل .. لازم يكون عندكم تصوُّر يعني برضه زي ما ذكرت حضرتك العقلاء من الجانبين أكيد ممكن يبلوروا مشروع للحل
م.أسامة كمال : والله أنا بأشوف النهارده إننا بأبادر بطرح آلية عشان يبقي فيه جدية وعشان نثبت الجدية في تنفيذ الخطة التي إلتزمت الشركة بأن تنفذها – أنا بأدعو إن الشركة تصدر خطاب ضمان وليكن بمبلغ 10 مليون جنيه لصالح محافظة دمياط وإن اللجنة المكلف بها متابعة تنفيذ قرارات خطة التوفيق ديه تقوم بمتابعة الشركة في تنفيذ هذه القرارات إن لم تنفذ الشركة فلدي اللجنة القوة أنها تسحب من هذه الفلوس وتنفذ التوصيات
عمرو الشناوي : بس في إطار زمني برضه محدد
م.أسامة كمال : في إطار هذا الزمن وفي إطار الخطة المحددة المطروحة من جانب شئون البيئة لتنفيذ هذه الخطة في فترة محددة .. وإذا رأت اللجنة أنه ليس هناك إلتزام من الشركة تخش علي طول وتنفذ وتجبر الشركة وأنا أستطيع أن أجزم بنسبة 100% أن الشركة ستكون ملتزمة ولكن إحنا عايزين نطمن الناس أكثر – عايزين ندي آلية للناس عشان ما حدش يقول لا والله دا بيضحكوا علينا ومش حينفذوا فأنا بأقترح هذا وبأدعوا السادة العقلاء والخبراء في صياغة هذا ( خطاب الضمان ) زي الأستاذ عصام سلطان وزي الأستاذ ناصر العمري من دمياط إن هم يشتركوا في صياغة هذا الضمان بما يكفل تنفيذه بدقة عشان ما يبقاش فيه حاجه بعد كده مخاوف من الناس إن الشركة مش حتنفذ أو إن الشركة ممكن حد يقول والله لأ ديه حتنفذ حته وما تنفذش حته
عمرو الشناوي : المهندس أسامه كمال إحنا بنضم صوتنا لصوت العقلاء ونتمني إن يبقي فيه حل عشان يحفظ حقوق العمال والمواطنين أي مواطن بسيط وأيضاً يحفظ حق الدولة في آثار إيجابية علي الإقتصاد ونتمني أن تعود علي الإقتصاد المصري وعلي مصر كلها
م.أسامة كمال : إن شاء الله
عمرو الشناوي : المهندس أسامة كمال رئيس الشركة القابضة للبتروكيماويات بنشكرك علي هذه الإيضاحات .
م.أسامة كمال : شكراً جزيلاً
عمرو الشناوي : لمعرفة حقيقة ما حدث الإسبوع الماضي في دمياط شكراً جزيلاً
م.أسامة كمال : شكراً يا فندم
عمرو الشناوي : بأعزائي المشاهدين فاصل قصير ونعود بعده ونبدأ مضوعنا الرئيسي لهذه الحلقة
فاصل
تقريرعن هيئة عليا للحج والعمرة وهل تنتهي مشاكل كل عام ؟ " مع آراء أفراد من الشارع المصري
شاب : أنا من رأيي إسناد الموضوع الي وزارة الداخلية ولكن بعد التطهير – كان زمان اللواء يأخذ الموضوع من هنا ويوزعه علي المحسوبية والأقارب والأحباء ويبقي الشعب كله متهان بعد كده
رأي رجل : وزارة الداخلية ديه هي التي تنفذ هذا الموضوع من سنين ولها خبرة سابقة ولها رجالتها اللي عارفين إزاي بيسكنوا الناس والإيصالات إزاي والفلوس إزاي وبيتعاقدوا هم وذو خبرة أديهم لبتاع السياحة – السياحة دول عايزين كسب إنما الوزارة تبعنا وبتحمينا إحنا كمصريين وبتقف معانا
رجل آخر : الأفضل بالنسبة للحج والعمرة لوزارة الداخلية لتحمل تبعتها وتحمل مسؤوليتها في هذا الشأن وخاصةً أن شركات السياحة في الآونة الأخيرة بدأت تتلاعب تلاعب كبير جداً بالنسبة لموضوع العمرة وده كان في سنوات سابقة وموجود
رجل آخر : أتمني إن وزارة الداخلية هي اللي تمسك الحج لإن طبعاً لازم يكون لنا دور أساسي في الداخلية وتكون هي المشرفة علي كل حاجه لإن إحنا بنروح هناك بنتعب فعلاً في السعودية ومن غير الداخلية مش حنعرف نمشي في أي دولة ثانية
رجل آخر : وزارة الداخلية جهة تنفيذية ومش من حقها إنها تختار مين يروح والا يعملوا القرعة هم ممكن يكونوا مشرفين عليها لإنهم جهة تنفيذية – شركات السياحة لو سبناها لهم حتبقي فيها نصب وفيها مغالاة في الأسعار فإحنا بنقترح إن يكون فيه مجلس قومي أو مجلس أعلي للحج والعمرة
رجل آخر : رأفةً بالغلابة والكلام ده إن الحج ما يرتفعش أسعاره لإن إحنا لو خليناه تبع شركات السياحة – شركات السياحة حتتحكم في الأسعار وحترفع سعر الحج
رجل : أنا بأقترح إن بأقترح إن هو ما يبقاش ولا وزارة الداخلية ولا شركات السياحة أنا بأقترح إن هو نبقي زي السعودية يبقي فيه وزارة للحج والعمرة – وزارة مختصة للحج وللمعتمر
رجل آخر : سواء عن طريق وزارة الداخلية حيحصل مجاملات سواء عن طريق شركات السياحة حيحصل برضه مجاملات المفروض لجنة مختصة بموسم الحج
سيدة : أنا بأشجع إن الحج يبقي تبع الشركات السياحية المستقلة عشان ضمان الحيادية يعني وزارة الخارجية حالياً الإدارة فيها مش كويسه .
فاصل
عمرو الشناوي : بأهلا بكم مرة ثانية حنبدأ هذه الحلقة في الموضوع الرئيسي بتاعنا وهو تنظيم الحج والعمرة والهيئات والمشاريع المقترحة لإنشاء هيئات لتنظيم الحج والعمرة فيما هو قادم من ايام إن شاء الله يسعدنا أن نستضيف في هذا اللقاء الأستاذ محمد فؤاد سلطان الخبير السياحي وأحد اصحاب الدراسة المقترحة لنظام الحج والعمرة .. وأيضاً يسعدنا أن يكون معنا الأستاذ ناصر تركي نائب رئيس غرفة شركات السياحة ورئيس لجنة الحج والعمرة أهلا بك يا فندم .. أيضاً معنا الأستاذ سيف العماري عضو مجلس إتحاد الحج والعمرة بغرفة السياحة .. نبدأ مع الإستاذ محمد فؤاد إنت قدمت دراسة لإنشاء اللجنة العليا للحج والعمرة وفيه إيضاً لجنة مشكلة من قبل الحكومة بإنشاء هيئة مستقلة للحج والعمرة ليه أصلاً تقدمت بهذه المبادرة ( المشروع بتاعكم ) وإيه الفرق بينه وبين المشروع المقترح من الحكومة ؟
أ. محمد فؤاد سلطان : عشان ننفذ شيئ ونكلف ناس بمهمة معينه يبقي الناس اللي حنكلفها بالمهمة ديه لازم يكونوا أهل هذه المهمة وخبراء في هذا الموضوع اللي حيتحركوا فيه عندهم فكرة وخبرة من الألف للياء وعشان يقدر ينفذ العملية التنفيذ الأساس فيها الرجل النحاج يبقي هو محور العملية ويأخذ وضعه وكل حقوقه كاملة متكاملة في هذا الموضوع فإنطلاقاً من إننا مش عايزين نحمل الدولة مصاريف وأعداد وحاجات كبيرة نجداً عشان خاطر يعملوا هيئات فإحنا فكرنا أو أنا فكرت من مدة بأدرس هذا الموضوع لإن أنا بقالي 35 سنه في هذه الشغلة
عمرو الشناوي : 35 سنه بتنظم رحلات حج وعمرة نشاطك الرئيسي السياحة الدينية
أ. محمد فؤاد سلطان : شركتي بقالها أكثر من 25 سنه في السياحة الدينية فالمقترح أن تنشأ لجنة عليا للسياحة الدينية من خلال وزارة السياحة لإن هم دول الناس اللي عندهم الخبرة والإمكانيات ولديهم القدرة علي فهم وتفهم سيكولوجية الحاج اللي حيطلع معاهم ولهم تجارب بقالها سنين دلوقت معروف إزَّاي يتعامل مع الحاج لحاد ما يخليه يؤدي مناسكه تماماً ويرجع سعيد جداً الي بلده فقلنا الهيئة ديه تتكون من وزير السياحة كرئيس
عمرو الشناوي : دا هنا برضه إشراف مباشر من الدولة وقيادة لهذا الموضوع بس بنستبدل وزارة الداخلية بوزارة السياحة
أ. محمد فؤاد سلطان : وزار السياحة علي أساس إن دول هم اللي عندهم الخبرة وعنده هذه الإمكانيات واللي يقدر يعين الناس ويقدر يشوف ويراقب وينفذ هذه العملية بالطريقة السليمة اللي تؤدي الي إن الراجل اللي طلع يحج عمل مناسكه مظبوطة ورجع سعيد جداً بإن تم مناله وبعدها يكون معاه ممثل عن وزارة السياحة اللي هو وكيل أو وزارة السياحة وعدد من أعضاء مجلس إدارة غرفة السياحة وممثل من الجهاز المركزي للمحاسبات وممثل للرقابة الإدارية وممثل من وزارة الخارجية إدارة المراسم عشان الجوازات والإتصال بالقنصليات ممثل من
عمرو الشناوي : إيه الفرق بين هذه المبادرة وهذا المشروع وبين مشروع إنشاء الهيئة المستقلة اللي الحكومة بتجهزه دلوقت
أ. محمد فؤاد سلطان : لحاد دلوقت ما فيش هيئة ظهرت ولا أي وضع سليم
عمرو الشناوي : المفروض إن شيخ الأزهر بيدرسه ويضع المقترح بتاعه
أ. محمد فؤاد سلطان : المفتي ولسه لحاد دلوقت ما فيش حاجه وبعدين مين اللي عنده هذه الخبرات عشان يقدر يقدمها مين اللي يقدر يعرف توقيت الحاج حيتحرك الساعة كام من الحتة الفلانية عشان يقدر يروح المنسك الثاني في ميعاد مريح له
عمرو الشناوي : أستاذ سيف إحنا ليه مستعجلين علي الموضوع ده ليه ما نستناش فضيلة المفتي لما يحط المشروع بتاعه ونناقشه مثلاً
أ. سيف العماري : إحنا ما نقشناش ولا إتكلمنا في موضوع الهيئة لإن إحنا سيادتك بنلف حوالين حلقة مفرغة .. ما المقصود بالهيئة دا السؤال – إحنا نجيد الكلام المنمق ويظهر إن إحنا كل مصالحنا خلصت ومشاكل مصر إنتهت لدرجة بندور علي مشاكل الحج هو الحج ليس هناك مشاكل بالنسبة لنا كشركات سياحة إذا كان هناك حج بحج القرعة – أنا بأقول لسيادتك إيه وجود الهيئة ما هو موجود هيئة أوردي – موجودة هيئة عليا الحج إحنا نعلم إن الهيئة العليا برئاسة السيد رئيس الوزارة والوزراء المعنيين بما فيهم الصحة وبما فيهم الأزهر لما بتطلع البعثة بتطلع البعثة الرئاسية بإشراف إحدي الوزراء وجميع الجهات المنظمة للحج داخلية سياحة شئون صحة طيران دا كله هيئة – طيب إيه وجود الهيئة الجديدة هل هو عندنا فائض وفلوس وعايزين ننظم ونجيب أنا إتطلعت علي إحدي الإقتراحات لقيت حوالي 40 واحد دا غير اللجان اللي حتبقي منبثقة
عمرو الشناوي : بتشكل بشكل أساسي من 40 نفس بأربعين وظيفة في هذه اللجنة
أ. سيف العماري : آه تقريباً 40 غير اللجان المنبثقة ودا كله مصاريف
عمرو الشناوي : يعني إحنا ما عندناش مشاكل وممكن نمشي زي ما إحنا
أ. سيف العماري : لأ كسياحة لنا مشكلة واحدة – إحنا بعد الثورة وقلنا كده فجر جديد والمور خلاص حتتنظم كل واحد ياخد حقوقه أنا كشركات سياحة لي حق مكتسب بتنظيم الحج وليس الداخلية هي اللي تنظم الحج – الداخلية جهة مسؤولة عن الأمن
عمرو الشناوي : ما علهش هو ده حياخدني لقضية الأستاذ ناصر رافعها .. إنت رافع قضية – رافع قضية علي وزارة الداخلية عشان تنظيم الحج ؟
أ. ناصر تركي : لأ أنا مش رافع قضية بس علي وزارة الداخلية أنا رافع قضية علي الحكومة نفسها لإن قانون تنظيم الشركات أعطي الحق فقط لشركات السياحة للتنظيم داخل وخارج مصر وهم حاولوا يردوا يقولوا إن رحلة الحج هي رحلة دينية وزي ما تفضل الأستاذ فؤاد التحركات تختلف عن المشاعر الرحلة الدينية إنك إنت تاخد معاك واعظ ديني صح إنك تاخد توعية دينية قبل ما الحاج يسافر هل الدولة من يوم ما وعينا علي الحج والعمرة شوفت الدولة بتوعي الحج غير قبل الحج بإسبوع كده تلاقي (طالع البدر علينا ) ونقعد نعمل أحاديث ونجيب شيوخ – يعني سبنا بقه إحنا الثورة ديه قامت لتعديل شكل دولة – الدولة حتي تاريخه أنا ما شوفتش أي تعديل خالص إلا يمكن إحنا الحريات بتاعتنا في إطار الأخلاقيات طبعا – لازم يكون فيه أخلاقيات إن أبقي عندي حرية إن أنا أتكلم – طبعاً التليفزيون المصري إحنا 15 سنه بنيجي وإلتقينا قبل كده يا أستاذ عمرو الحرية زادت لإن أنا الحرية برضه إننا أحافظ
عمرو الشناوي : إهي اللي حيخليني أوقفك ما إحنا صحاب من زمان .. حد منعك تقول حاجة في اي لقاء قبل كده – دا إنت بتشرح وجهة نظرك وبتشرح المشاكل
أ. ناصر تركي : لأ قبل كده ما حدش منعني بس أنا نفسي – أنا كان عندي خط إن أنا ما كنش أقدر أقاضي وزارة الداخلية قبل الثورة – أنا بأكلمك بصراحة – ما كنش فيه محكمة حتقبلها أصلاً .. أنا قدمت قضية وقدمت بلاغ للنائب العام المحترم إن أنا بأقول إن هم إستعجلوا في تنفيذ الحج وخاصةً أنا مقدم مشروع لتنفيذ حج البسطاء قالوا والله الحج ده المفروض إنه الناحية الدينية ديه مش رحلة سياحية لأ هي رحلة سياحية روحانية لإن فيها إقامة في فنادق قطاع خاص
عمرو الشناوي :أنا مقتنع تماما باللي إنت بتقوله بس أنا عايز أرجع شوية وأشوف جذور المشكلة بدأت من اين .. يعني أنا حأسأل الأستاذ فؤاد سلطان عشان أعتقد عندك خلفية ببداية إنشاء هذا الموضوع لما إبتدي وزارة الداخلية ليه تولت من الأساس تنظيم الحج والعمرة
أ. محمد فؤاد سلطان : في الحقيقة سيادة الرئيس عبد الناصر كان فيه قيد وما كنش فيه عملة صعبة ومتوفرة في البلد فكان بيخصص مبلغ معين عشان الناس يؤدي به الحج وبناءاً عليه بدأ التفكير في حكاية إنه يعمل قرعة وعشان يعمل القرعة مش حايجيب كل الناس بتوع جمهورية مصر العربية علي القاهرة عشان يقدموا ويشوف مين فأقرب حاجه وتقدر وليها أفرع وأذرع داخل الجمهورية كلها هي وزارة الداخلية فلها أقسام ونقط وبناءاً علي هذا الكلام أخذوا هذه العملية – بعد ما جيه السادات المفروض العملة بقة سهلة وموجودة في السوق إنما هم تمسكوا بها في العهد البائن تمسكوا أكثر بها
عمرو الشناوي :تمسكوا بها معني كده إن فيه حد إقترح عليهم إقتراح وتم رفضه هل تم تقديم أي إقتراح في سحب هذه المهمة من وزارة الداخلية أيام الرئيس السادات أو حتي أيام الرئيس السابق ؟
أ. سيف العماري : أيام حسني مبارك تقدمنا بإقتراحات كسبنا القضية وبرضه زي ما تفضل الأخ ناصر ما قدرناش ننفذ لإن الوقت لإن الوقت كان أنت تعرف كويس جداً صحيح بتقول حرية لكن ما كناش نقدر ننفذ ولا حد حينفذ هو السؤال ليه الداخلية متمسكة بالحج
عمرو الشناوي :بعض النظر أنا عايزك تطرح لي تصورك لأفضل وسيلة لتنظيم الحج والعمرة عن طريق الدولة – مصر ديه عشان تطلع ولادها يحجوا ويعتمروا كيفية تنظيمها
أ. سيف العماري : أنا قلت لسيادتك إحنا نقسم الحج حزئين زي ما بنقول فيه البسطاء ودا لهم مستويات معينة وفيه الطبقة الأخري لها مستوي ما أقدرش أحرم الطبقة الأخري واللي بتصرف وتدفع وأقول له لأ ما ترحش يعني إنت سيادتك تيجي تقول لي أنا عايز الحج بس عايز عربية ليموزين ما اركبش أتوبيس علي عيني وراسي
عمرو الشناوي :أنا البسطاء يعني
أ. سيف العماري : أيوه إنت البسطاء ليموزين.. يعني أنا عايز أقول إن الحج ده يبقي مستويين – مستوي إحنا قلنا وزي ما تفضل الأخ ناصر – قدمنا مستوي الحج أقل من الداخلية ب 5 آلاف جنيه
عمرو الشناوي :هو لسه حيشرح لي المشروع ده بالتفصيل عشان الناس يبقي عندها أمل
أ. سيف العماري : إحنا النهارده برضه – بلاش نلعب علي أوتار الشفقة والعطف والحج البسيط - ما تطلبش مني شركات السياحة
عمرو الشناوي :كلمني قول لي الهيئة اللي إنت بتقترحها عشان ننظم الموضوع
أ. سيف العماري : أنا مش عايز ولا بأقترح هيئة أنا عايز كل دوري إن أنا كشركة سياحة القانون بيلزم لي أن أنظم السياحة ( داخلية خارجية حج عمرة ) أي سياحة إذن يحاسبني عليَّ أجهزة رقابية إعمل الأجهزة اللي إنت عايزها وخذ الضمانات اللي إنت عايزها زي ما حاليا أنا وزارة السياحة بأنظم
عمرو الشناوي :فيه كام شركة بتشتغل سياحة دينية ؟
أ. سيف العماري : النهارده عندك 2400 ينظموا سياحة
عمرو الشناوي :سياحة دينية
أ. سيف العماري : هو كله النهارده بيشتغل علي حج لكن هو لما تدور علي الحقيقة
عمرو الشناوي :لأ إزَّاي إذا كان كل شركة بتأخذ تأشيرتين والا حاجه
أ. سيف العماري : لأ السنه ديه ما فيش النظام ده غيرنا المفهوم ده لما دخلنا في قولت بيع وشراء وتأشيرات خرجنا من هذا الإطار إنت لو قسمت الحصة كل واحد حياخد خمسة النهارده إنت بتحاسبني كشركة سياحة أنا الدولة شريكة معايا ( شيل منِّي الضرائب – التأمينات – إدفع لي مرتبات الموظفين - أجر لي ) وتعالي قول لي ننظم وأنا حآخد ربحية بسيطة ( هامش ربح بسيط ) ما تقيسنش لا بجمعيات ولا بداخلية ليس عليهم إلتزامات ولا عليهم ضرائب وعلي عليهم تأمينات ولا عليهم إيجار وبقي الحج البسيط ( حج البيت لمن إستطاع إليه سبيلاً ) خلينا في الحقيقة أنا أوفر المسكن الملبس المأكل المشرب الصحي للحاج البسيط لكن لغير القادر دا في القرآن مش عايز أقول لا والله الحج بسيط إدفع له إنت وطلعه – أنا مش هيئة ولا جمعية بآخذ تمويل أنا شركة سياحة لكن برضه مستعدين ننظم الحج في متناول الحاج العادي أقل من حج الداخلية
عمرو الشناوي :توزيع التأشيرات ( عشان النقطة ديه ناس كتير بيسألوا عليها دائماً) توزيع التأشيرات برضه كان فيه نظام عضو مجلس الشعب وعضو مجلس الشوري - أجهزة معينة في الدولة تبقي لها حصة كده – كل نائب يأخذ عشرة تأشيرات ويوزعها بمعرفته لازال هذا النظام قائم
أ. سيف العماري : لأ إتلغي من سنتين فيه بيع وشراء من المنواب نفسهم ( بعض النوَّاب ) وكان فيه قضية قبل كده يعني
عمرو الشناوي :هنرجع لموضوع التنظيم بس أنا عايز أفهم بقه حتة حج البسطاء ممكن تشرحها لي مشروعك المقترح إيه وإيه الإختلاف بين وبين النظام اللي إحنا ماشيين عليه في حج القرعة مثلاً
أ. ناصر تركي : هي مصر حصتها حالياً 78250 تأشيرة متوزعه بين الداخلية والتضامن والسياحة وفيه هيئات حوالي 5800 تأشيرة
عمرو الشناوي :دول بيأخذوا قد إيه وبيوزعوهم إزَّاي ؟
أ. ناصر تركي : السياحة بتاخذ 30 ألف والداخلية 31 ألف
عمرو الشناوي :بيوزعوهم إزَّاي ؟
أ. ناصر تركي : الداخلية هي اللي بتنظم
عمرو الشناوي :دا حج القرعة ؟
أ. ناصر تركي : حج القرعة بتنظمه الداخلية وحج التضامن كان زمان بتنظمه محافظات مركزية في المحافظات ( يعني كل محافظة لها محافظة مركزية ) الجمعيات الدينية بتجمع في المركزية وكل محافظة بتتولي عن طريق الجمعية ديه التنفيذ وبعدين من حوالي ثلاث أربع سنين عملوا إختراع كده إسمه الهيئة القومية يعني نقوا جمعيات معينة وقالوا هم دول اللي يبقوا أعضاء في الهيئة القومية
عمرو الشناوي :دا فاد الناس اللي بتطلع تحج والا ما أفادهمش
أ. ناصر تركي : وحطوا فضيلة المفتي نائب لرئيس الهيئة ديه وكان وزير التضامن السابق هو رئيس الهيئة وحطوا بنك ناصر الإجتماعي - يعني عملوا برضه هيئة – هل نجحت ؟ أنا بأقول لك إعمل إستقصاء رأي الجمعيات المنتشرين من شرتين للسلوم
عمرو الشناوي :إن قول وجهة نظرك وعلاجها إزَّاي
أ. ناصر تركي : فاشله طبعاً – فاشلة لإن نظام الحجز – بص طالما إنت بتتعامل مع قطاع خاص في السعودية يبقي هناك شبهة أي قطاع حكومي يتعامل مع قطاع خاص دون ممارسات أو قانون مزايدات أو إعلانات أو نظام لأُسس موضوعة يقي إنت علي طول حتي لو إنت نبي أنا حأتهمك ثق تماماً إن لو ما فيش أُسس للتعاقد يبقي إنت عندك شبهة – شركة السياحة هي بتتقدم بعرض أنا المره ديه قدمت عرض كغرفة
عمرو الشناوي :قدمته لمن
أ. ناصر تركي : قدمته لمجلس الوزراء اللي هي اللجنة العليا
عمرو الشناوي :للحكومة يعني
أ. ناصر تركي : اللي هي اللجنة العليا ما هي اللجنة العليا للحج هي برئاسة رئيس الوزراء ولكن الوزارات إتغيرت كتير فكل لما ييجي رئيس وزراء أقدم له
عمرو الشناوي :طيب وإحنا قاعدين إنت بتقدم مشروعك ده برضه للناس كلها
أ. ناصر تركي : أقدم لك مشروع .. أول حاجه في مشروعي إن أنا قسِّمت الحج ( البسطاء) اللي هم ال 50ألف غير الحج السياحي زي ما قال الأستاذ سيف فيه حج سياحي للمقتدر وفيه حج لغير المقتدر اللي هو عنده إستطاعة بس ما عندوش المال اللي يقدر
عمرو الشناوي :مش لازم أدبحه يعني
أ. ناصر تركي : لأ هو عايز يحج فأنا حطيت له ثلاث مستويات – عملت له مستوي – زي ما بيقولوا إشمعني حج أوروبا أرخص إشمعنا أندونيسيا أرخص – عملت له نفس التجربة
عمرو الشناوي :الحج المصري اللي بييجي من أمريكا بيبقي ارخص
أ. ناصر تركي : لأ أنا عملت له نفس التجربة ديه بنفس التنظيم ده بنفس الفنيات ديه ( فنيات يعني إيه يعني ما فيس حد يقدر يعملها غير محترف تنظيمي ) ما فيش حد في مصر كلها عنده إحتراف تنظيمي إلا شركة سياحة يعني ما تقنعنيش لو جبت لي مين من ال 80 مليون عنده فنيات إلا شركة سياحة أقدر أقول لك آه أقيم الشركة ديه وأقول آه تقدر تنفذ البرنامج ده لإن إحنا حتي لو 2400 مش كل الشركات يعرفوا ينفذوا برامج معينة
عمرو الشناوي :طيب إنت برضه ما أقنعتنيش عايزك تقنعني – تشرح لي الموضوع لإن أنا جايز أطلع أحج معاك
أ. ناصر تركي : حاآقول لك عملت أول حاجه جبت دراسة الداخلية في الثلاث سنوات بتعمل إيه وقلت أنا المفروض أعمل إيه أول حاجه الداخلية كانت بتعمل بسعل واحد اللي بيسكن قدام الحرم زي اللي بيسكن علي بعد كيلو ونصف نفس السعر – طبعاً دا ما فيش عدالة أول حاجه – الرحلة بدون تغذية – اللي بيطلع يحج مع القرعة ما عندوش تغذية – ما فيش أكل ولا شرب ولا حاجه هو بس إقامة طبعا فيه الإنفاق هناك الراجل بيصرف فأنا وفرت له حاجتين عملت له ثلاث اسعار حسب الدوائر عشان أوفر عدالة حسب العبد ( قسمت مكمه وبعدها عن الحرم ثلاث دوائر – الدائرة الأولي لها مسافة والثانية لها مسافة بخدمات والدائرة الثالثة اللي هي البرامج زي ما كل الناس تقول لك التجربة الماليزية – التجربة الأندونيسية بس هم ما يعرفوهاش هم ممكن يعرفوا التجربة الدانمركية إنما التجربة الماليزية والأندونيسية أنا حافظها
عمرو الشناوي :طيب كلمني عليها
أ. ناصر تركي : التجربة الماليزية عبارة عن إن برنامج الحج عبارة عن عمرة إن إنت بتعتمر في الأول ثم بتطلع عرفة اللي هي المناسك فأنا عشان أوفر له خدمة بسعر رخيص عملت له برامج في توقيتات لوسيزن بحيث أقعده قدام الحرم أطول فترة ممكنة في افضل فنادق بالتغذية حتي لو حتكون ابراج مكة اللي هي الفنادق اللي قدام الحرم ديه ثم بأنقله لمنطقة المشاعر يبقي جنب مني وعرفه يتعبد بدل ما يقعد في خيمة كل حاج له 70 سنتي إزأل أقعد ثلاثة ايام في خيمة 70 سنتي لا أكل ولا دورات مياه ولا نظافة ولا حاجه بحيث إنه يمكث جزء من الليل ثم يروح في الإستراحات بتاعته – الرحلة ديه عملتها ب 14500 جنيه
عمرو الشناوي :ديه عمرة والا حج ؟
أ. ناصر تركي : ب 14,500 بدون التذكرة حطينا 4 آلاف جنيه تذكرة بقة ب 18,500 أنا أتحدي إن السنه ديه – القرعة السنه ديه حتفوق ال 22 ألف ومن غير تغذية أنا بالتغذية وبزي موحد ( بعلم مصر ) بإشراف شركات وتوعية من الأزهر حآخد علي كل 500 شيخ من الأزهر وحاخد معايا بعثة طبية بس مش زي العدد اللي بياخدوه 500 دكتور – هي السعودية مافيهاش دكاتره – عندي حأعمل له تأمين صحي إنما حآخد بعثة طبية يعني ناس تمثل مصر وحاخد معايا ناس من الخارجية
عمرو الشناوي :طيب إيه دورهم
أ. ناصر تركي : يعني يبقي فيه تنسيق بينهم وبين وزارة الصحة السعودية يعني حآخد مثلاً 10 دكاتره كبار من وزارة الصحة
عمرو الشناوي :ل 80 ألف ؟
أ. ناصر تركي : ما هو فيه وزارة صحة سعودية - أنا رايح أعمل رعاية صحية
عمرو الشناوي :فيه مراكز صحية سهل إن هي .. طيب إيه لزمتهم العشرة
أ. ناصر تركي : السايح اللي بييجي مصر – فيه سياح بييجوا من ألمانيا ومن روسيا بيجيبوا معاهم وزارة الصحة الروسية ووزارة الصحة الألمانية يعني ياجماعة إنت بتنفق علي البعثات اللي بتطلع في الحج في حين إن أنا كشركات سياحة بأطلع في رمضان بس 300 ألف
عمرو الشناوي :السعودية بتتكفل بالجانب ده
أ. ناصر تركي : بأقول لك أنا بأطلع في رمضان بس 30 يوم 300 الف وإحنا بنطلع في ال 80 ألف عارف كام واحد فوق الألفين – فوق الثلاث آلاف واحد
عمرو الشناوي :لخدمتهم
أ. ناصر تركي : إحسب لي بقه بدل سفرهم كام إقامتهم كام – إحسبها إنت بقه
عمرو الشناوي :الألفين دول بيبقوا علي نقفة الدولة كلها
أ. محمد فؤاد سلطان : علي الحاج نفسه
أ. ناصر تركي : يا استاذ عمروا أنا عايز أقفل بس معاك وأقول لك حتة واحدة لو إنت عايز المنطق إنت عارفه ولو عايز الصح إنت عارفه إنما إحنا مش عايزين نروح للصح إحنا دائما بنلف حواليه عايزين نلف وحنقعد في الساقيه ديه كتير خلي بالك فأنا لجأت للقضاء – أنا لجأت للقضاء ليه – أنا دخلت صح وماحدش سمعك ولا إجتمع معاك فقلت مين القضاء العادل المصري اللي كلنا بنحترمه أنا واثق إنه حيجيب حق البسطاء لإن إحنا مش حنجيبه غير بالقضاء
عمرو الشناوي :إنت رافع القضية بإسمك ولا بإسم الغرفة ؟
أ. ناصر تركي : لأ بإسم الشركات كلها ( الغرفة هي الممثل الشرعي للشركات ) إنما أنا كشخص حأرفعها ليه غرفة شركات السياحة هي اللي ترفعها هي الممثل الشرعي
عمرو الشناوي :بس ده حينقلنا للأستاذ فؤاد سلطان إنت في الدراسة اللي إنت عاملها كنت كاتب في المقدمة إن الهدف هو هو ضع نهاية لنظم التحايل والأساليب الملتوية التي ظهرت في الأعوام الأخيرة إنت بواسطة شبكات الوسطاء والسماسرة للحصول علي اي عائد ( الكلام كده خضنا شويه ) ممكن تشرحها لي
أ. محمد فؤاد سلطان : حأشرحها لحضرتك في الفترات اللي فاتت كلها الكام سنه اللي فاتت اللي بيحصل بالظبط إن أنا شركة ساعات عشان أروح أحجز القي إن الفندق واخده سمسار أو شركة أو حاجه فتضطر تروح تاخد منه هذه واحد نمرة إثنين الطيران أنا قعدت زمان مع الأخ اللي إسمه جلال اللي كان مدير مصر للطيران فقال لي تاخد طيارة بحالها أهلاً وسهلاً فيه شركات أنا بأديها الطيارة بحالها فتضطر كشركة ما عندكش الماليات الكبيرة إنك تروح للشركة الثانية ديه عشان تاخد منها تذكرة
عمرو الشناوي :يعني إيه الشركه بحالها أنا مش فاهم
أ. محمد فؤاد سلطان : بتاخد طيارة
عمرو الشناوي :عشان تاخد سعر كويس يعني للتذكرة ولا عشان مجرد تحجز
أ. محمد فؤاد سلطان : لأ عشان تاخد الطيارة بالسعر نفسه
عمرو الشناوي :طيب ما عشرين كرسي ما ينفعش عشر كراسي ما ينفعش
أ. محمد فؤاد سلطان : ما أنا سألته قال لي حأقعد وأوزع – أقطعها ما أنا واحد جالي زي فلان ودفع لي علي الترابيزه بتاعتي ال 300 راكب ما ياخد ال 300 راكب أضطر أروح أنا للراجل ده عشان خاطر العدد اللي أنا عايزه ويديني جواب
عمرو الشناوي :هل بيبقي فيه إلتزام بتوقيت معين الطياره ديه تقطع تذاكر قبل الموسم مثلاً بشهرين والا بثلاث شهور والا المشكلة ديه بتقابلك لو رحت قبل الموسم بإسبوعين مثلاً
أ. محمد فؤاد سلطان : لأ من الأول علي طول إتحجزت للناس اللي محتكره هذا السوق
عمرو الشناوي :يعني عندنا في حجز الطيران فيه مشكلة وحجز الفنادق والإقامات فيه مشكلة وبالتأكيد في النقل برضه نفس المشكلة
أ. محمد فؤاد سلطان : وفي تدبير الحجاج يعني ما يعرفش كل الشركات فبيضطر يروح لواحد سمسار يوديه لشركة
عمرو الشناوي :للتأشيرات والا عشان تسويق خدمتك نفسها – إدارة مبيعات يعني
أ. محمد فؤاد سلطان : آه حاجات بهذا الشكل إختصارا لكل ده التفكير اللي جيه معايا ومنفذ يعني فيه جزء كبير إتنفذ منه – يعني إيه المانع إن إحنا كجمعية ( الجمعية العمومية بتاعة شركات السياحة بتتشكل منها لجان لإيجار هذا المساكن للمجموع كله ما إحنا دلوقت برضه بنتجمع 25 شركة – 30 شركة ونروح نأجر مرة واحدة فيه ما يأجر لل 400 أو 500 شكرة مرة واحدة زي ما كان بيحصل
عمرو الشناوي :ما هو ده المقترح اللي كان بيقول عليه الأستاذ ناصر
أ. محمد فؤاد سلطان : وده المقترح اللي أنا بأقول عليه
عمرو الشناوي :إن إنت تعمل الدوائر ديه وتنزل تحجز كميات من الغرف لل 80 ألف
أ. محمد فؤاد سلطان : علي قد العدد – إزَّاي بيحصل أنا كحاج بأروح لشركة – الشركة ديه عامله برنامج – البرنامج بتاع الشركة ديه – عايزه فنادق كذا وكذا – فيه بقه لينك مربوط بحيث إن الهيئة الموجودة والمجموعة ديه بيصل لها كل الشركات بتقول له أنا عايز موفمبيك وأنا عايز هيلتون ودا عايز كذا ودا عايز كذا غرفه ودا عايز كذا غرفة فبتتعمل بتتفرغ كلها في الاخر قدامه شيت بياخد الشيت وتطلع لجنة وتأخذ مقدمات من هذه الشركات وتروح تتعاقد مع الفنادق مباشرةً
عمرو الشناوي :كأنها شركة سياحة واحدة كبيرة
أ. سيف العماري : لأ هو الوضع يختلف إحنا قطاع خاص زي ما الأخ ناصر إتفاقياتنا مش محكومة مع القطاع الخاص النهارده بالنسبة لنا كسياحة بأتكلم في ميدان السياحة 30 ألف كل واحد له طريقته في الحجز مع الفنادق اللي بيتعامل معاها ربما أنا بأتعامل مع فندق طوال السنه كعمرة فبيديني اسبقية في حجرات الحج ومتعود عليهم وعلي خدمتهم وعلي نظامهم يمكن لنا شركات عشرة 15 سنه مع فنادق معينة الكلام اللي بيقوله الأخ ناصر لو إحنا قدَّر ربنا وشاء وأخذنا حصة مصر كلها لازم حيكون فيه
عمرو الشناوي :مين اللي أخذ حصة مصر كلها اللي هم مين ؟
أ. ناصر تركي : كوزارة السياحة يعني – الوزارة ديه للحكومة أنا أنفذ
أ. سيف العماري : إحنا تنفيذيين وهي جهة رقابية أنا عايز أقول لما ناخد حصة مصر كلها فيه جزئين جزء خاص بالسياحة دا منفصل والجزء الخاص بالحكومة دا يتعمل له كيانات وماحدش حيشتغل فيه إلا الناس اللي فاهمة وعارفة كل 10 – 15 شركة حيتجمعوا علي برنامج زي ما بيقول الأخ ناصر كل 10 – 15شركة حيتجمعوا علي برنامج ثلاث مستويات أنا ممكن أطلع المستوي الأول مجموعة شركات ومجموعة ثانية علي الثالث علي الرابع اللي عنده قدرة لإن إحنا اللي يهمنا إن لازم ينجح وما يقالش علينا إحنا كنا بنقول وبنسرخ وبنقول عايزيز بالعكس دا إحنا حيبقي حمل أكبر وكنا واخدين عهد عن نفسنا السنه ديه بلا مكسب ننظم بلا مكسب بس نثبت للعالم ونسبت لمصر إحنا مواطنين وناس بنحس وناس بنحب بلدنا وناس عندنا قدرة إن ننظم وبعدي زي ما قال الأخ ناصر هي فنية – أنا بأنظم 700 الف معتمر في السنه مش حنظم 80 سيادتك ؟
عمرو الشناوي :ما هو ال 80 دول بيبقوا في فترة زمنية محدودة جداً
أ. سيف العماري : عارف الفترة الزمنية ديه سيادتك ديه أسهل .. ديه أسهل زي رمضان 300 ألف ديه أسهل وبعد كده هي العملية إيه هي عملية فنية أنا عندي الناس اللي بتشتغل وعندي نظام عندي هناك إتفاق شركات النقل هنا حيبقي فيه كيانات مش ممكن الأستاذ فؤاد وأنا والأخ ناصر خمسة ستة حناخد عدد معين زي ما النهارده بتقسم علي المحافظات محافظة الأقصر أسيوط سوهاج كل واحد له عدد – إحنا حنعمل برضه كيانات بحيث الكيانات ديه كل واحد ياخد مجموعة مش حيبقي قاصر علي شركة ولا إثنين ولا عشرة وكمان الشركات لها خبرة يعني حتتحط ضوابط
عمرو الشناوي :الكلام اللي حضرتك بتقوله ده ممتاز جداً بس إحنا عايزين علي شاشة التليفزيون المصري وقاعدين بنتناقش مع بعض النقاش لازم يصل الي مستويات معينه للحكومة ووزارة السياحة وما الي ذلك إحنا مع مين لغاية دلوقت ؟
أ. سيف العماري : إحنا بنوصل رسالة
أ. ناصر تركي : فيه لجنة السياحة والثقافة والإعلام بمجلس الشعب واللجنة الدينية إحنا لغاية دلوقت – يعني بكرة عندنا إجتماع برضه إن شاء الله الصبح إيه إللي إقترح – اللي أقترح حاليا - مجلس الشعب حاليا هو إتجاهه فعلاً مقتنع بالمشروع بتاعنا بل بالعكس هو عايز يدينا السنه ديه تأشيرات تتسحب بحيث إنها تتنفذ بالنموذج ده – يعني بشرط تنفيذها بالسعر ده بالتنظيم ده
عمرو الشناوي :التأشيرات بتيجي علي فين
أ. ناصر تركي : التأشيرات بتيجي لمصر – للدولة
عمرو الشناوي :بتيجي للدولة للحكومة
ناصر تركي : آه بتوزع علي الوزارات المعنية بالتنفيذ زي وزارة السياحة فيه شركات سياحة – التضامن فيه الهيئة القومية - الداخلية فيه القرعة وفيه بقه الهيئات والنقابات فيه 5800 تأشيرة ببتوزع علي وزارات وهيئات ونقابات وما نعرفض السنه ديه أعضاء مجلس الشعب حييجي لهم والا
أ. محمد فؤاد سلطان : دول برضه بيلجأوا لشركات سياحة تنفذ لهم
عمرو الشناوي :يعني مش حيروح لنواب مجلس الشعب ما إنت بتقول الموضوع إتلغي من سنتين
أ. ناصر تركي : العرض اللي إحنا إتكلمنا فيه في مجلس الشعب وبعض النواب أيدونا فيه كتير يعني فيه أغلبية مؤيدة حالياً إن التنفيذ هي تنفيذ شركات سياحة بس بحيث يبقي فيه شرائح يعني الغالبية العظمي من العدد يبقي لمحدودي الدخل ويتوسط محدودي الدخل
عمرو الشناوي :لو وزير الداخلية جاء لك وقال لك أنا عندي30 ألف واحد نظموها لي يتكلم مع من
أ. ناصر تركي : يتكلم مع وزير السياحة ووزير السياحة ووزيرالسياحة يجيب الغرفة لإن أنا جزء من من اللجنة العليا بتاعة وزارة السياحة – هي الغرفة ديه مين – هي الجهة الفنية الوزارة الجهة الرقابية – لو إنت جبت الرقابة وخليته فني مش حيعرف والنقطة اللي أنا عايزه أقولها لك إن مجلس الشعب الحالي إحنا طلعنا معاه بعثة السعودية علي الطبيعة وورينالوا آلية التنفيذ وجم نقلوا الصورة فعلاًَ للنواب كلهم شافوا إيه وشافوا إحنا حنعمل البرنامج إزاي فالنقطة إن التخصص مطلوب يعني إنت ما ترحش لواحد دكتور وتقول له تعالي إبني لي عمارة وماترحش للمهندس وتقول له تعالي إعمل لي عملية جراحية
عمرو الشناوي :طيب ومش حاأروح لوزارة الداخلية وأقول لها
أ. ناصر تركي : إنت عايز تعمل هيئة
عمرو الشناوي :إستني أنا حأروح لوزارة الداخلية عشان أقول لها عايز أحج فحتيجبك إنت – إنت المتخصص طيب تعالي نسمع رأي برضه وزارة الداخلية ومعانا اللواء رفعت قمصان مساعد وزير الداخلية .. مساء الخير يا فندم
اللواء رفعت قمصان : مساء الخير يا أستاذ عمرو وتحياتي لحضرتك وللسادة الضيوف الأستاذ فؤاد سلطان والأستاذ سيف والأستاذ ناصر خالص التقدير
عمرو الشناوي :تصور سعادتك لموضوع تنظيم الحج والعمرة وأفضل طريقة ( هل نفضل ماشيين زي ما إحنا والا عندك تحفظ حتي علي المشاريع اللي مقدمنها السادة
اللواء رفعت قمصان : إطلاقاً ما فيش اي تحفظ وفيه ترحيب كامل بكلما يُطرح من آراء والسادة المتحدثين كلهم في مقام والدينا وهم ذو خبرات كبيرة لابد أن تكون محل تقدير وإحترام كبير .. أنا بس بأحب أوضح كام نقطة كده أثيرت في كلام السادة الضيوف إنه ليس هناك تمسك من جانب وزارة الداخلية بتنظيم الحج كما قِيل الوزارة ويمكن البعض أضطلع من خلال وسائل الإعلام ومن خلال تصريحات السيد وزير الداخلية إن من الأولويات الواردة في مشروع إعادة هيكلة وزارة الداخلية احد البنود الرئيسية فيها ما يتعلق بالإستغناء عن تقديم خدمة الحج للسادة المواطنين اللي كنا بنحرص علي تقديمها تصحيحاً لمعلومة أثارها الأستاذ فؤاد سلطان إن هي من عهد عبد الناصر وزارة الداخلية متولية – وزارة الداخلية بتتوالي تنظيم الحج منذ عقود طويلة قبل هذا الموعد لما كان المحمل بيتحرك من مصر في طريقه الي المملكة السعودية حاملاً كسوة الكعبة ومصحوباً بقوات تأمين من الشرطة المصرية وعدد من الحجاج حتي توصيله الي الكعبة وكسوتها من خلال مصر
عمرو الشناوي : للإشراف علي قافلة الحج كلها
اللواء رفعت قمصان : بالظبط مرافقة وتأمين ومنذ هذا التاريخ ووزارة الداخلية بتتولي وأيضاً أوأكد علي أننا لا نتمسك بتنظيم الحج وأثير أيضا موضوع الحكم القضائي والقضية اللي غرفة شركات السياحة بتستند إليها في طلب تنظيم الحج – هذه القضية تحمل رقم 40/63 لسنة 42 قضائية حكم فيها في 20/2 سنة 90 إعتراضاً علي قرار وزير الداخلية بتنظيم موسم الحج 1408 هجرية – كان قرار وزير الداخلية بقصر التعامع مع السلطات السعودية علي وزارة الداخلية فقط فالحكم إنصب علي إلغاء قرار وزير الداخلية بقصر التعامل مع السلطات السعودية لإنه لا يستند الي سند قانوني في القانون المنظم للشركات السياحية – وزارة الداخلية قامت بتنفيذه علي الفور وسمحت لشركات السياحة بالتعامل مباشرةً مع القنصليات السعودية المختصة
عمرو الشناوي : بس فيه تحفظ يا فندم علي الموضوع ده – فيه تحفظ صغير اعتقد السادة الضيوف يحبوا يقولوه
اللواء رفعت قمصان : أستاذ عمر أستأذنك أوضح بقية كلامي وأرد علي السادة الضيوف في كل الإستفسارات
عمرو الشناوي : إتفضل يا فندم
اللواء رفعت قمصان : القضية القادمة طبعاً أي حكم قضائي يصدر النهج الدائم لوزارة الداخلية تنفيذ أي حكم قضائي نهائي فور صدوره دون تردد فاياً كان منطوق الحكم إحنا ملتزمين بتنفيذه إن شاء الله
عمرو الشناوي : طيب أهم من تنفيذ الحكم يا فندم إسمح لي – يعني لو إحنا شايفين المنطق بتاع القضية سليم ليه نستني لغاية لما الحكم يصدر وجايز يصدر قبل الموسم مباشرةً فيسبب إرتباك لو إحنا مقتنعين إن وجهة النظر ديه سليمة ما نتكاتف ونقعد نناقش مع بعض ونصل لحل سليم من بدري
اللواء رفعت قمصان : أنهي وجهة نظر يا أستاذ عمرو هو دلوقت فيه عدة وجهات نظر بتدور حول هذا الموضوع – أنا قلت لحضرتك الجانب التاريخي فيه – يمكن في كلام الأستاذ سيف العماري في منتصف كلامه وبين سطوره اشار الي إن الحج عبء شديد وإن وإن وإحنا تعهدنا السنه ديه إن إحنا ممكن نخسر فيه أو نعمل هل ممكن أتحمل خسارة
عمرو الشناوي : هو قال مش حيخسر هو قال ممكن نتنازل عن المكسب
اللواء رفعت قمصان : إطلاقاً .. جميل جداً وقال ممكن السنوات القادمة – أنا أرجوك أنا مش عايز أخش في تفاصيل قد يكون الإخوة قيادات غرفة شركات السياحة محقين تماماً ولكن إحنا جهاز تنفيذي بيعمل في منظومة قانونية فيه لجنة إسمها اللجنة الوزارية العليا بيرأسها السيد رئيس مجلس الوزاراء وديه أجتمعت يوم 28 يناير 2012 وأصدرت قرار من شقين ( الشق الأول الإستمرار في تطبيق ذات الآلية الخاصة بالأعوام السابقة بتوزيع الأنصبة ما بين وزارة السياحة ووزارة الداخلية وهي تكاد تكون متساوية وتحديداً العام الماضي وزارة السياحة أخذت 30 ألف تأشيرة والداخلية 30 الف و500 فقط
عمرو الشناوي : دا اللي حيتطبق السنه ديه يا فندم الموسم اللي جاي ؟
اللواء رفعت قمصان : حتي الآن القرار صدر من اللجنة الوزارية العليا صدر بتاريخ 28 يناير وبناءاً عليه الوفد سافر تنفيذاً لهذا القرار ما يُعقد من إجتماعات للجان النوعية بمجلس الشعب بيصدر عنه توصيات – كنا نتمني أن تتحول هذه التوصيات الي قرارات تنفيذية أياً كانت آلياتها سواء بإصدار تشريع جديد ينظم بمخاطبة رئيس الوزراء لتعديل قرار سابق أما نحن فنسير
عمرو الشناوي : ما هي الحكمة اللي بتطلع القرارات التنفيذية يافندم
اللواء رفعت قمصان : تخاطب الحكومة بهذا اللجنة العليا برئاسة السيد رئيس الوزراء .. كنت عايز أوضح نقطة كان أثارها الأستاذ سيف كان أشار أو الأستاذ فؤاد أعتقد إن هي فين الهيئة العليا – الهيئة العليا المقترحة اللي هو الشق الثاني من قرار رئيس الوزراء عقدت بالفعل برئاسة فضيلة مفتي الجمهورية يوم 14/3 عقدت أول إجتماع لها ضم ممثلين لكل الوزارات والجهات المعنية في الدولة ومنها وزارة السياحة اللي بتتكلم بإسم غرفة شركات السياحة وهذا الإجتماع أسفر عن تشكيل لجنة تشريعية من مجموعة من القانونيين المتخصصين وضم لها عدد من الإخوة الفنيين المتخصصين وذوي الخبرة في تنظيم الحج ولوضع تصورات لكيفية تشكيل الهيئة – هذه المجموعة الفنية المتخصصة عقدت حتي الآن 6 إجتماعات آخرهم اليوم الساعة الواحدة ظهراً – فالعمل علي قدمٍ وساق
عمرو الشناوي : غرفة شركات السياحة يا فندم الدينية هل ساهموا في هذه الإجتماعات أي ابدوا وجهة نظرهم
اللواء رفعت قمصان : وزارة السياحة ممثلة من خلال وكيل وزارة السياحة
عمرو الشناوي : إسمح لنا سيادة اللواء رفعت قمصان خليك معانا بس ندي فرصة برضه للأستاذ سيف يرد علي ديه وأستاذ ناصر عنده ملحوظة وخليك معانا
اللواء رفعت قمصان : يا أهلاً وسهلاً
أ. سيف العماري : أنا مع إحترامي لسيادة اللواء أنا شايف سيادة اللواء بيدافع عن الحج ووزارة الداخلية أكثر ما بتدافع شركات السياحة صاحبة المصلحة أولاً أنا كونت القول إن إنتهي العصر اللي إحنا كداخلية ننظم حج لإن إحنا عندنا مهام أخري ولهذا نحن نسمع كل يوم في هيكلة في الداخلية كان المفروض من ضمن الهيكلة والعاتق الكبير اللي عليهم تنظيم الداخلية – وإسأله سؤال قول له كام واحد بيطلع ينظم الحج وبيبقي فيه فراغ أمني
عمرو الشناوي :بعثة رسمية
اللواء رفعت قمصان : يا أستاذ سيف أنا أول كلامي قلت أول بند
أ. سيف العماري : أكمل كلامي بس
عمرو الشناوي :إحنا بنتكلم مع بعض بنستعرض وجهات النظر بس
أ. سيف العماري : أنا برضه عايز أقول لسيادتك حاجه إني كنت أود من الداخلية السنه ديه – أولا الداخلية معزورة في حالة واحدة – لإني لا أعاتب الداخلية أعاتب الحكومة لإنها جزء من منظومة الدولة اللي بيفرض عليها تنظيم الحج لإحنا كان لنا لقاء مع السيد وزير الداخلية وتفضل وزير الداخلية (الراجل قال أنا أساساً شبه مفروض عليَّ أو الدولة بتسنده إليَّ فأنا لازم أنظمه ) فإذا كان هناك عتاب فالعتاب علي الحكومة مش علي الداخلية
عمرو الشناوي :حرصاً علي مصلحة المواطن
أ. سيف العماري : وإحنا المواطن بنعمل له إيه .. أحنا جايين من اليهود ببنظم – ما أحنا مواطنين 30 – 700 ألف مواطن بننظم له عمرة
عمرو الشناوي :طيب أنا قدامي دقيقة محتاج .. لحظة واحدة بس – الوقت حيداهمنا – إسمح لي
اللواء رفعت قمصان : أستاذ عمرو هو الأستاذ سيف كده رد علي سؤاله لإن هو نفسه سيادته قال إن سيادة الوزير أكد لهم – وأنا قلت في كلامي إن أول بند في بنود الهيكلة إن الوزارة تستغني عن خدمات الحج وأنا أكد كده لحضرتك وحضرتك قلت إن السيد الوزير في لقاؤه معاكم قال نفس هذا المعني وأنا بأتكلم علي تنفيذا للتوجه اللي السيد الوزير متبنيه .
عمرو الشناوي :سيادة اللواء رفعت قمصان بنشكرك شكراً جزيلاً علي كل هذه الإيضاحات
اللواء رفعت قمصان : شكرا يا فندم
عمرو الشناوي :وإسمحوا لنا قبل النهاية تعليقك إيه يا أستاذ ناصر
أ. ناصر تركي : اللجنة اللي تفضل الدكتور الجنزوري بتشكيلها برئاسة فضيلة المفتي بتضم وزارات معنية – الوزارات المعنية أنا مش مسؤولة عني وزارة السياحة غير رقابياً علي الشركات إنما رأيي كقطاع خاص فنياً أنا اللي بأنفذ أنا مش في اللجنة وفوجئنا إن هم حطوا خصيات من الجمعيات العامة كقطاع خاص – ما هي الجمعيات الأهلية ديه إيه يعني حكومة ؟ بمن باب أولي – إحنا طلبنا من وزير السياحة إن إحنا كده بنتعرض لظلم إن إحنا مش جوه اللجنة اللي بتحط رؤية ليه لإن أنا عندي خبرة أكثر من ( مع أحترامي ) وزير السياحة تفضل مشكوراً ووافق وقال الكلام ده المفروض إن إنتوا تتحطوا لإن إنتوا في الأول مصريين – وفي الأول شركات مصرية زي ما قال الأستاذ سيف أنا مش شركة جاية من الخارج بننفذ - أنا حأتعامل مع قطاع خاص في السعودية خلي بالك - مش حأتعامل مع حكومة – وزارة الحج في السعودية أوردي مش هي اللي بتنظم الحج للسعوديين في حاجة إسمها شركات حج داخلي .. طبعاً إحنا بنشكر اللواء قمصان بس في نفس الوقت إحنا مش بنتكلم علي وزارة الداخلية في أشخاصها حنا بنتكلم علي وزارة الداخلية إنها جزء من الحكومة اللي الدكتور الجنزوري عايز الوضع هو زي ما هو
عمرو الشناوي :طيب إيه المقترح النهائي يعني عايزين نناقش عشان نقعد بكره مثلاً نناقش مقترح لهيئة مستقلة لها ضوابط
أ. ناصر تركي : حأقول لحضرتك في كلمتين إفصل الرقابة عن التنفيذ – التنفيذ شركات سياحة مصرية هي التي تنفذ وهي التي لديها القدرة علي عن التنظيم سواء داخل أو خارج مصر والرقابة رقابة دولة ( اللجنة العليا ) وتمثل وزارة السياحة في الرقابة إنما فيه لجنة عليا برئاسة رئيس الوزراء إنما هيئة وفلوس وزير ما قال فؤاد بيه فلوس وتضييع وقت
عمرو الشناوي :نتمني أن نصل الي هذا التصور وهذا الكيان
أ. ناصر تركي : دا تضييع وقت ومال وربنا حيحاسبهم علي المال اللي حينفق
عمرو الشناوي :ربنا يحاسب أي حد يتصرف تصرف
أ. ناصر تركي : آه علي إهدار المال العام ده
عمرو الشناوي :أستاذ محمد فؤاد سلطان الخبير السياحي وأحد أصحاب الدراسات المقترحة لنظام الحج والعمرة بنشكرك شكراً جزيلاً يا فندم .. وأيضاً نشكر الأستاذ سيف العماري عضو مجلس إتحاد الحج والعمرة بغرفة السياحة .. الأستاذ ناصر تركي الشكر موصول إليك نائب رئيس غرفة شركات السياحة ورئيس لجنة الحج والعمرة .. وأيضاً كل الشكر لكم أعزائي المشاهدين ونتمني أن نصر في النهاية الي تصور يخدم المواطن المصري أينما كان حاج أو معتمر .. شكراً والي اللقاء في حلقة جديدة من إتجاهات .