عمر طاهر يكتب: أن تودّع الجيش كما استقبلته

كان السؤال موجهًا للأصدقاء بكل بساطة..
«إيه اللى ممكن يحصل ويخليك تودع الجيش بنفس الطريقة اللى استقبلته بيها؟».
لم أكن أبحث عن إجابة صحيحة قدر ما كنت أدرس إن كان السؤال نفسه صحيحا بالأصل.
كانت الإجابات كثيرة سأنشرها دون أى تجميل.. وأحتفظ باسم صاحب كل إجابة لنفسى، لأن الواحد برضه مايضمنش إيه اللى ممكن يحصل لأى حد الأيام دى.
أنشر إجابات من كان يرى أن الفكرة قابلة للدراسة، وهناك إجابات أكثر كانت كلها تصب فى استحالة أن يحدث هذا لأن «دخول الجيش مش زى خروجه».
ماذا قال الأصدقاء؟
«الجيش يرفع يده عن كل السلطات التى يتحكم فيها المحافظون وشركات القطاع العام، ويتخلى عن آماله فى مادتى رقمى 9 و10 فى وثيقة السلمى، ويترك سلطة الإعلام من الآن، ولا يزج باسم مرشح للرئاسة مدعوم منه، ويعمل الانتخابات بعد انتهاء (الشورى) مباشرة، عشان أضمن أنه لن يلحق فى الدفع بمرشح رئاسى يأخذ شعبية خلال هذه الفترة القليلة، يعمل كل ده واحنا ممكن فى الآخر نكرم من ال19 واحد دول 10 ولّا حاجة ونطالب بمحاكمة الباقين محاكمة عادلة (أهمهم حمدى بدين والروينى وإسماعيل عتمان)».
«يحاكموا مبارك وأعوانه محاكمة عسكرية دون رأفة ولا استئناف، وبعدين يعملوا انتخابات رئاسة الجمهورية ويرجعوا ثكناتهم».
«إنهم يحسسونا ولو لمرة بصدقهم وبخوفهم على مصر وثورتنا، محاكمة مبارك والمجرمين اللى معاه محاكمة حقيقية مش صورة كده وخلاص، والله لو حق الشهداء رجع، الناس هترتاااح وهتحترمهم.. زى أول لما مسكوا ورفعوا تحية للشهداء، كلنا طيرنا بيها وقلنا حقهم مش هيضيع.. دم الشهداء لو رجعوه هنشيلهم على راسنا».
«إنهم يجيبوا القتلة أيا كانوا على ميدان التحرير والناس كلها تشوفهم».
«الجيش يسلم السلطة والمجلس يسلم نفسه».
«يطلع المجلس العسكرى يقول هنسلم السلطة بعد شهرين، ويفتح الباب لانتخابات الرئاسة، ويعلى دولة القانون، ويسيطر على الدعاية الدينية، والتليفزيون المصرى يرجع بتاعنا تانى، ويحل المجلس الاستشارى».
«يقدم كشف حساب كامل للمرحلة الانتقالية يوم بيوم، موضحا الظروف التى أدت لتسلمه السلطة، ثم يكشف ما حدث فى ماسبيرو ومحمد محمود ومجلس الوزراء، ويعتذر عن كل أخطاء المرحلة، ويفتح باب الترشح للرئاسة فورا ويؤجل انتخابات الشورى».
«يرجع عيون أحمد حرارة عشان مش هيقدر يرجع الشيخ عماد عفت».
«اعتذار.. قصاص.. محاكمات سياسية.. محاكمات للمجرمين من الجيش.. تسليم فورى للسلطة».
«ظهور المشير ومعه مجموعة من المجلس فى خطاب رسمى يعتذر فيه عن كامل التجاوزات التى تمت، يعلن فيه بشكل واضح عن الضغوط اللى مورست عليهم من الخليج والخارج والنظام السابق، يعترف فيه بسوء إدارة المرحلة الانتقالية، يعلن موعد الانتخابات الرئاسية فى توقيت مبكر وعاجل، يعلن انسحابه من كتابة الدستور أو الإشراف عليه أو محاولة وجود امتيازات خاصة للقوات المسلحة، الانسحاب الفورى».
«حق الشهدا يرجع بمحاكمات عادلة........... الجيش يبين حسن النية ويبادر فى تسليم السلطة، ويعلن أن الدستور بعد الرئاسة استجابة لمطالب الثوار».
«تسليم السلطة فعلا، مش يبقى نوع من تسليم سلطة بكرفان. تحقيق فى انتهاكات العسكر ومحاكمتهم. التوقف عن تشويه الثورة والثوار. بعده عن الإعلام وإنه يبقى زيه زى أى هيئة أو وزارة فى الدولة».
«قيادة جديدة تركل المجلس العسكرى كله أو أنضف من بداخله -لو فيهم- يتولى الأمور، يفتح انتخابات الرئاسة فورا، ويسلم البلد فى أسرع وقت، ويؤمن التسليم ده، ولا يضع الجيش فى حسابات الدستور».
«محاكمة اللى قتلونا، والمحاكمة السياسية لمبارك. تقديم اللى داسوا علينا فى ماسبيرو بمدراعاتهم ودباباتهم فى ماسبيرو للمحاكمة، ويقولولنا سبب تركهم للداخلية يضربونا 6 أيام فى محمد محمود، يعتذروا عن موت الناس فى العباسية».
«أن المجلس يعمل أول بيان ليه يكون مباشر مش مسجل، يقولوا فيه إننا بنعتذر عن سوء إدارتنا للمرحلة الانتقالية ومسؤولون مسؤولية تامة مع من قام ونفذ، ومسؤولية واجبة تجاه من قُتل من أبناء الشعب خلال فترة إدارتنا للبلاد، وعليه نعلن تسليم السلطة إلى مجلس الشعب وإلى رئيسها المنتخب وعودة القوات إلى ثكناتها، ومن هذا التاريخ يصبح مجلس الشعب هو المسؤول عن إدارة البلاد حتى إعلان تاريخ الانتخابات».
«يعمل حاجة عظيمة ماحدش عملها قبل كده من كل حكامنا......... يعتذر عن سوء إدارته لمصر... مع تأكيده أن أحلامنا فى رؤية بلدنا متقدمة متطورة، ده حلم قابل جدا للتحقيق على أيدى إدارة مدنية ذات خبرة حقيقية مش ذات صوت عالى».
«يِحِب على إيد الشريفة صاحبة العباية اللى عرّت رجالته ويطلب منها السماح... تسمح».
أنت أيضا يا صديقى مدعو للإجابة عن هذا السؤال.. إذا كان له إجابة أصلا.