نهى البلك تكتب: فعل مضارع ..!

أنا كنت بانط الحبل ,
وكنت اتنطط ع المراجيح
فستاني خفيف وقصير ,
كان بيطير لو هبت ريح
كنت اجري ف وسط الشارع ,
فعل مضارع , مش مرفوع !
أستأذن , ما استأذنش ,
مافيش في حياتي كتير ممنوع ..
كل الأبواب مفتوحة
لا عين سحرية ولا مفاتيح !
أطلع من باب واللا ادخل
يوم أو ليلة , ويمكن ابات
دا يا جار يا قريب
وبيوتنا , الكل حبيب
عايشين في تبات
والبوسة ماهياش عيب من أيها حد
مادام ع الخد
وان قال لي : باحبِك
قصده : الرحمة
وقصده : الألفة
وقصده : الود
لو نمت بانام مش خايفة
ولَو مش شايفة ,
مافيش عفاريت !
وان حسيت برد انا عارفة
فيه ميت إيد حالفة
تمد الستر
ترد غطايا لو اتعريت
ليه فجأة الباب اترد
وأول مرة باحس الخوف
شباك البيت اتسد ,
وكان لعيوني الكون مكشوف
وان عين بصت وضحِكْت
ألاقي كلام في النظرة غريب !
والدلع الحلو زمان بقى حَيَا
بقى خِشا
بقى وش كسوف !
ليه أمي بقت تداريني
بقت تخفيني عن الأنظار؟
وكأني بقيت العيبة
بقيت التهمة
بقيت العار !
إيه ذنبي يا أمي ؟! تقول لي : كبرتي
تقول لي بقيتي عروسة
وانا يوم ما اكبر , تصغر دنيتي بيّا
ويضيق الدار !!