ننشر قصائد شعراء "الدستور الأصلي".. في حب جهاز أمن الدولة..!!

استمرارا لحملة «الدستور الأصلي» في نشر مشاركات القراء من مقالات وأعمال أدبية ورسوم كاريكاتورية، ننشر اليوم خمس قصائد لخمسة موهوبين من قراء «الدستور الأصلي»، على وعد بنشر باقي المشاركات تباعا في أقرب فرصة..
نور محمد يكتب: صباح الورد والقطران
صباحك ايه صباحك حان
صباح الورد والقطران
صباح الورد عالنيمان
ومن قهره يبات تعبان
صباح الضحكة والبسمة
لكل فقير يبات غلبان
صباح الفل عالمهزوم
صباح الورد لما يزوم
ولما فيوم يفوق ويقوم
بشوكه ويجرح السلطان
صباحك ايه صباحك حان
صباح الورد والقطران
صباح الزفت في الميادين
صباح العسكر البايتين
فوسط ميدان صبح مسجون
بايد المنصر السجان
صباح الطين يا زفت الطين
بسببك ورد في الزنازين
عرفنا خلاص مين اللي يصون
عرفنا خلاص مين الخاينين
عرفنا خلاص بتوفي لمين
عرفنا كمان لمين خوان
صباحك ايه صباحك حان
صباح الورد والقطران
صباح معرفتلوش الوان
يروح وبيوصل الاخوان
يقوموا يطالبوا بالتغيير
ومره يمارسوا في التكفير
كتير حوارات وسر ف بير
مع العسكر سلام وامان
صباحك ايه صباحك حان
صباح الورد والقطران
صباحه ولسة ناس نايميين
صباحه الاخوة سلفيين
فوسط مكان بيشغي دقون
صباحه اختى راحت فين؟
واخته التانية بالبيدات
فمصر في كل يوم تتهان
صباحك ايه صباحك حان
صباح الورد والقطران
صباحكم ايه يا مصريين
قولولي لسه ليه نايمين
ولما بقول يجوز خايفين
وافكر تاني في يناير
واقول ما الشعب كان ثاير
ومهما يطول علينا الليل
مسير الصبح بكرة يبان
ونرجع تاني الميدان
صباحك ايه صباحك حان
صباح الورد في الميدان
محمد النجار يكتب: إلى من يهمه الأمر
للخلف در
كلمة كانت عايشة ع الأرض الحبيسة في جوف نفوسنا
للخلف در
كلمة شلناها بمناجل من قاموسنا
للخلف در
كلمة حالفين إننا ما نقولها تاني
حبيت أقولك
وأنت حر
يا أي حد فاكر أن صوتنا كان خيال
أو كلمة لحظة انفعال
راحت خلاص وطفيتوا نارها
اسمحلي أقولك
يا سيدي في دم سال
في دم سال
في عيون حزين بتبكي لسه لجل تارها
في زهور بريئة اتمزعت من أرضها
وطيور كانت ملك السما والحلم دارها
وحبسها كان اختيارك
مع إنك أنت وشلتك كنتوا اختيارها
في عيون وشايفة حلمها
مش ناوية تسمع كلمة واحدة باقية
من العهد اللي مر
مش ناوية تنسى حقها
مش ناوية حد يقولها
للخلف در
للخلف در
كلمة سامعينها بتدوي في ودننا واضحة وجلية
إن كان صحيح أو مش صحيح
أو حتى نية
فالسكوت عنها في عرف الحالمين زيي
خطية
والعبر موجودة وواضحة للعيان
والكل شاف الجبن غار ويا الجبان
وإن كنتوا دارسين اللي كان بعيون بيان أو مدارية
حاتعرفوا إن الحدود اتكسرت
وان الغضب لا يشترط
طالبين حقوق أو ثورجية
الغضب ساعة الغضب قادر يجر
مش نفر ولا كام نفر
لا مليونية
والهتاف حيقول محال إن البلد تاني تكون
للخلف در
ولا راح تكون
لا ليك ولا لغيرك
تكية
معتز منير يكتب: في حب جهاز أمن الدولة
يا جهاز أمن الدولة
لو حتداولني مداولة
وتحاول 1000 محاولة
برضو بحبك يا جهاز
يا جهاز تعالي كلمني
لو اعارضك ليه بتسيبني
من غير كدة ما تئدبني
علي الاقل احرئني بجاز
يا جهاز يا منعنشني
و لو ضاربني و مدشدشني
مانت كل يوم تدهشني
انجاز ورا انجاز
مين احن منك مين؟
اللي عندك معتقلين
كانوا برة متبهدلين
يا سلام علي الإحساس
يا جهاز طيب و برئ
بُحبَك ايدنا حريق
و حاطط علينا.... الابريق
و اهو اوفر من البوتاجاز
دانت الوكيل و القاضي
و سياسي و اقتصادي
و ونبي لو عملوك نادي
تاخد الدوري و الكاس
محمود محمد الشافعي يكتب: بطاقة خوف
منكام سنه وأنا مالينى خوف
خوف عارف إن أنا خايف
وأناعارف بإن الخوف عارف
وعامل نفسى مش شايف
....
- خوف كان بيتكتب فى بطايق -
إسمك. عنوانك . محل ميلادك . جنسك . دينك
وصوره ليك . تبين قهرك وإن كنت عايق
- خوف كان بيتكتب فى بطايق -
وكود الخوف تلاقيه تحت .... (أرقام)
أصله يخاف يبقا كلام
لأنهلو إتكلم. هتدايق
- خوف كان بيتكتب فى بطايق -
وأرقامك مليانه حروف
لكن م الخوف بتتدارى ورا أرقام ماليها الخوف
ومن خوفك تداريها في جيب تايه فى محفظتك
ومحفظتك تداريها في جيب تانى فى بنطالك
وبنطالك برجلين . ورجلينك بتتفارق
- خوف كان بيتكتب فى بطايق -
..
تاريخ ميلادك
تاريخ سجنك .. رقم زنزاتك
تاريخما صادروا الفكر فى عقلك
تاريخما قتلوا الكلمه فى حلقك
تاريخ أبوك .. تاريخ أمك
وكل فرد فى عيلتك
عدد أصحابك
عدد كرات الدم فى جسمك
عدد أعصابك
عدد صلواتك وركعاتك وسجداتك ودعواتك
حييتكام مره فى مماتك
ومتكام مره فى حياتنا
ووحياتك
لا نعرف حتى تاريخ وفاتك
وكام واحد مشى في جنازتك
وكام ميت عاش في قبرك
وحسابك
ومينحاسبك ؟؟
ولوسابك
هنحاسبك
.........
وأناماشى في شارع مره
قابلنىواحد وقالى بطاقتك
خدالبطاقه وبص فيها من بره
وأكنهعرانى فى صحرا
وسابالبرد يتفرج
سألت نفسى . إيه التهمه ؟؟
بصوته قالت: تهمتك إسمك !!
قرا إسمى وعنوانى وبص في صورتى ودقق
وبصلى بيتحقق
ساعتها خفت . فقلت أجرى
فخفت أجرى . يقوم يسبق
وخفت أسبق . يقوم خوفى يتصدق
ولو صدقته هتدايق
- خوف كان بيتكتب فى بطايق -
حاتم إبراهيم يكتب: الجدار
تايه ورا خطوتك
يا ارض عارفه اللى خان...
هيه الآهات ضحكتك!!
واللا الألم عنوان
ليه تفرحى بدمعتك.
ليه تحمى كل جبان
ماتفوقى من غقلتك.
هيّ الجراح إدمان؟!!
مش اللى راح إنسان؟!!
ذنبى إنى رحت ميدان
ذنبه إنه لبى أّذان
يا أرض فين حكمتك.
يا أرض ليه قوتك ديماً فى إيد سجان
يا أرض. ليه ضربتك متصبش غير غلبان
ياأرض ليه جنتك مسكونة بالغِربان
يا أرض يبقى عدوك! وتسلحيه بجدران
يا أرض ليه عزتك بتقدميها قربان
يا قبر لكل غازى.. تشهدلك الأزمان
ليه تدي عدو غازى.. وبأرخص الاثمان!
قومى هبى هدي السور..
قومى هبى هدي السور مبنى لسلام خَسران
يا أرض شربت دم.. إبنى.
يا أرض شربت دم.. إبنى الشهيد عطشان
لكل نقطة دم..تجرى فى عروق غضبان
يشرب يزيحلك همّ. تطرحلك الأغصان
يا أرض جدرى جدار
يا أرض جدرى جدار
خدى منى وابنى الدار
ده أنتى الحره الجريئة.. ليه صابك الغثيان
وأنتى الصابره البريئة..مين لبّسك أكفان
يا أرض مسروقه. منسيه ع الصلبان
يا أرض. فيكى النور مسكونة بالعِميان
جالك بحق الدور
جالك بحق الدور قومى أقهرى الطغيان
يا أرض مظلومة. يا أطهر الاوطان
شفتك. سفينه وتايهة محتاجه للربان... يا أطهر الاوطان