الفيسبوك ينفجر في الضحك: المشير سرق الثورة.. والشعب سرق الجزمة..!!

انتشرت منذ أول أيام العيد أخبار على صفحات الفيس بوك تفيد بسرقة حذاء المشير طنطاوى عقب اداءه لصلاة العيد صباح أمس وكعادة المصريين امتلأت الصفحات بالتعليقات الساخرة على موضوع سرقة الحذاء بينما ظهرت اكثر من 4 صفحات على الفيس بوك تعلن مسئوليتها عن حادث سرقة الحذاء :
كل سنة وانتم بخير ونترككم مع بعض تعليقات الفيس بوك الساخرة من سرقة جزمة المشير ......
-الرويني: مدرعات تجوب القاهرة ليلا في سرية تامة بحثا عن جزمة المشير
-ضياء رشوان: سرقة جزمة المشير بتثبت إن لا بديل عن الأحكام العرفية
-منصور العيساوى:المشير معندوش جزمه اساسا
-العيسوى : أساساً مفيش مشير عشان يبقى فيه جزمه
-العيسوي : احنا معندناش جزم في مصر
-عمرو مصطفى .. الجزمة فوتو شوب
-سبايدر : المشير جزمته اتسوقت ،، واقسم بالله ياشعب ما انت عارف جزمة المشيو رايحة فين
-عمرو مصطفى : اسم الفيلم الجديد بتاع أحمد حلمى ( اكس لارج ) هو كلمة سر عملية سرقة جزمة المشير
-خبير استراتيجى : سرقة جزمة المشير مخطط لتقسيم مصر فردة يمين وفردة شمال
-اسامة هيكل وماسبيرو: نناشد المواطنين الشرفاء بالبحث عن جزمة المشير والادلاء باي معلومات عن السارق
-مرتضى منصور : انا عندى سيديهايه للى سرق الجزمه ومعايه مقاسه كمان
-يا بخت اللى سرق جزمه المشير ,, والله عيل جرئ دا انا اخاف اسرق جزمة امين شرطه
-المشير هينتج فيلم جديد اسمه (رد جزمتي)
ا-لمشير سرق الثوره والشعب سرق الجزمه
ا-لتسليم السلمي للجزمة هيتم ف خلال 6 شهور
-التلفزيون المصرى :قله مندسه واصابع خفيه تلعب فى جزمه المشير ولكن مازال الرباط شديد بين الجيش والشعب
-توفيق عكاشه: يا سياده الموشيير مهو انت يا خويا لو كنت واخدها تحت باطك وانت داخل كداهون مكنتش إتسرقت
احمد زوبيضر : هذا مخطط ماسونى لمعرفه مقاس المشير
-عمرو مصطفى:جزمه المشير اساسا فوتوشوب .... مرسومه على رجله ولا يمكن سرقتها ... هذا خبر كاذب من منظمه بياده أون لاين لصالح كوتشيهات الاعداء
-اللواء الفنجري ( مشيرا باصبعه ) : و لن نسكت على اى محاولة للمساس بامن و مقدرات الجزمة
-التلفيزيون المصري ينفي خبر اختفاء جزمة المشير ويعرض فيديو قديم لها من حفل اكاديمية الشرطة
-على فكرة بقى الجزمة ماتسرقتش و لا حاجة، المشير متعود ينزل من بيتهم حافى - مصدر عسكرى ليسرى فودة فى آخر كلام
-الجيش حمى الثورة ولم يحمي الجزمة
‎- وزي ما مينا جيه ووحد القطرين، أكيد في بطل حييجي يوحد الفردتين
-تعان عصابة ولاد ابو اسماعيل عن مسؤليتها عن سرقه جزمة المشير وتطلب فديه ثلاثه مليون دولار وتعطيه مهله 48 ساعه ولا سيتم اعدامها فورا علي مراي ومسمع العالم كله وده اخر انذار
-وبما اننا حمينا الثوره ومش عرفين نحمى الجزمه
فنناشد شعب مصر الشرفاء ... إللى يلاقى الجزمه يسلمها لأقرب وحده شرطه عسكريه وهنيالك يا فاعل الخير ... وإلا المشير مش هيعرف يسلم العهده ... وهتلبسوه للأبد .... والله الموفق والمستعان
بعد البيان مباشرة :اعداد هائله من الجزم تنهال بغزاره على المجلس العسكرى
لجنه تقصى الحقائق : لقد تم سرقه جزمه المشير وهو لابسها
-واحنا ايه الي مخلينا مصدقين حكاية سرقة الجذمة دية .. مش ممكن تكون المدام رقعاه بيها علقة قبل ماينزل وخايف يرجع يلبسها تاني..
من ناحية اخرى أعلنت جبهة تحرير المصريين عبر موقع اليوتيوب مسئوليتها عن سرقة الجزمة من خلال هذا الفيديو
إبناء المخلوع : حمله مكثفه لجمع اموال لشراء بياده كلاركس للمشير بدل إللى اتسرقت بعنوان (إحنا اسفين يا جزمه)