«اللفافة» و«منطاد الحامبولي» يتصدران تويتر: «احنا في زمن النفخ»

تابع أعضاء تويتر الأحداث الجارية في مصر ولكن كل بطريقته الخاصة، وكانت أبرز الأحداث هي وفاة المواطن "عصام عطا" في سجن طره وسط تأكيد أهله بتعرضه للتعذيب، وحادث خطف منطاد سياحي عن طريق "ياسر الحمبولي" أحد أكبر مسجلي الخطر بالصعيد.
وقد خصص "للحمبولي" هاش تاج باسم "#el7ambolly" وكانت معظم التويتات ساخرة وتربط الحادث بالوضع الأمني في مصر، كما تحدثت بعض التويتات عن لفافة البانجو أو الحشيش التي يقال أنها وجدت مع جثة "عطا"، والتي تتصدر المشهد في كل قضية تعذيب.
"الدستور الأصلي" يشارك قراءة أطرف تعليقات تويتر على هذه الأحداث:
النشيد الوطني للطب الشرعي: هنا مقص وهنا مقص ~ وهنا لفايف بتترص
- "الداخلية" للإنتاج السينمائي الهابط تقدم: اللفافة لا تزال فى حلقي.
- احنا آسفين يا لفافة.
- اللفافة هي اللي سرقت ألبوم عمرو دياب
- اللفافة هي اللتي دهست المتظاهرين في أحداث ماسبيرو بعد سرقتها المدرعة، اللفافة دي قلق بجد.
- اللفافة الملعونة.
- مرة ظابط دخل على العيسوي في مكتبه وسأله "عندك لفافة؟" رد العيسوي وقال له "لَا"... وهو عنده جوا.
- اللفافة التي هزت عرش مصر
- الثورة التي بدأت بلفافة ورجعت فاقت بلفافة تانية، ده إحنا بلد دمااااااغ!
- لازم يكون في حملات توعية عن البانجو في كل حتة في مصر.. إنه مش بيتبلع.
- إحنا فعلا في زمن النفخ
- أخويا ابتلع لفافة ورق عنب وجاله اسفكسيا المحشي.
- هو بوب مارلي برضه مات باللفافة؟
- أنا باقول ينزلوا مع كل لفافة كاتالوج وديسكليمر.
- تويتر بقى نصه دكاترة تشريح والنص التانى دكاترة تحاليل.
- يعني أيه كوكا زيرو؟ يعني الحمبوللي يخطف منطاد نقوم نعتذر له ونرجعله ابنه وفوقهم 40 ألف جنيه وننقل مدير الأمن لأسوان.
- واحد يسرق منطاد سياحي ده ما اسموش انفلات ده اسمه سوسن سعادتك :))))
- الحمبوللي هينزل الانتخابات بقائمة لوحده مفيهاش حد تاني وهينجح.
- الحمبوللي ملك ملوك انجلترا وكبير مشجعي منشستر يونايتد.
- وبرضو الحمبوللي هو اللي هيجيب العيسوي في شوال.
- الحمبولي إيده نظيفة... لا بصابونة ولا بليفة.
- الداخلية قصاد خطف المنطاد رجعت للحمبولي ابنه وعليه 40 ألف جنيه .. مصاريف العملية.
- هاركب المنطاد ترلم ترلم واتمنطد تم ترلم ترلم لم لم لم.
- كيف تسرق منطاد: افتح باب المنطاد - طلع السواق - شغل الطيار الآلي -اقفل الباب.
- اقترح إن الجيش والحامبولي يتقابلوا في النهائي واللى يكسب يحكم مصر.
- فهو لم يقهر ولم يجرح ولم يلمس.. ولم يتقهقر ولم يتدهور.. ولم يتعثر ولم يتعور ولم يتلولو.
- سرقوا المنطاد يا محمد لكن حمبوللى معااايا.
- المنطاد معايا.. والسلاح كمان معايا.. متاخد تكلمه أنت.
- لو كل واحد فينا اكتشف وطلع الحمبولي اللي جواه.. كان زمان الثورة دي نجحت من زمان.
- حمبولي في كل حتة..عمال يجيب أجوان.. وزي ما راح الأقصر.. برضه راح اليابان.
- الحمبولي مش بلطجي بنضربه.. الحمبولي وطن بنعشقه.