بما أن

بما أن الشعب هو إللي في خدمة الشرطة مش الشرطة هي إللي في خدمة الشعب، بما أن الحكومة هي إللي بتأكلنا، مش إحنا إللي بندفع لهم مرتباتهم وبدلهم وتشريفاتهم من ضرايبنا، ونتعطل عن أشغالنا، ويتخصم لنا عشان مستنيينهم لما يعدوا، بما أن صحيفة الأهرام هي إللي قاريانا وجايبانا من الآخر مش إحنا إللي بنقراها (أبدًا.. إلا بقي الصفحة الأخيرة)، بما أن الفضائيات هي إللي مفرجة علينا الناس مش إحنا إللي بنتفرج عليها، بما أننا اتبنينا في الجدار مش إحنا إللي بنبنيه.
بما أن شهداء نجع حمادي هم إللي اتقتلوا عشان كان نفسهم في الشهادة مش القاتل هو إللي قتلهم، بما أن خضار وفواكه المجاري هي إللي بتأكلنا مش إحنا إللي بنأكلها، بما أن المستثمرين الأجانب هم إللي بيشترونا مش إحنا إللي بنشتري بضاعتهم، بما أن الحكومة بتعطل العمال مش بتشغل العواطلية، بما أن القطن هو إللي زرع الفلاحين في تكاليفه وما جابش حقه مش هم إللي زرعوا القطن، بما أن أطفال غزة هم السبب في العدوان الإسرائيلي مش إسرائيل هي إللي اعتدت عليهم، بما أن أفلام خالد يوسف هي إللي بتتفرج علينا مش إحنا إللي بنتفرج عليها، بما أن الحكومة هي إللي بتعارض المعارضة مش المعارضة هي إللي بتعارضها، بما أن المنتخب هو إللي بيشجع جمال وعلاء مبارك مش جمال وعلاء مبارك هم إللي بيشجعا المنتخب، بما أن خالد مشعل هو إللي مش بيتقتل لإسرائيل مش إسرائيل هي إللي مش عارفة تقتله، بما أن أمريكا هي إللي بتجري ورانا عشان تشحتنا المعونة مش إحنا إللي بنشحت منها وكل ما تزمزأ نقول لها ده إحنا عندنا إرهابيين حتي بصي: بووووووووم.
بما أن العيب في الشعب مش في الحكومة، زي ما قالت وزيرة القوي العاملة مؤكدة إن ربنا «لا يغير ما بقوم حتي يغيروا ما بأنفسهم»، بمعني إن الحكومة دي زي الزلازل والسيول والصيحة والريح الصرصر العاتية، لو اتقينا ربنا ح يرفعها عنا. بما أن إحنا إللي بنحبس السجن مش السجن هو إللي بيحبسنا، بما أن إحنا إللي قرفانين من العالم مش العالم هو إللي قاعد يضرب كف علي كف من سياساتنا الخارجية، بما أن الأرض هي إللي ماشية علينا مش إحنا إللي ماشيين علي الأرض، بما أن إحنا إللي بنطلع للشمس مش الشمس إللي بتطلع لنا (وبنخضها كمان)، بما أن إحنا إللي لوثنا مية المجاري ببقنا مش هي إللي لوثت مصارينا، بما أن محمد هو إللي إتخلع من مراته مش مراته هي إللي خلعته (أكيد فيه واحد اسمه محمد إتخلع من مراته في الدنيا)، بما أن سيئاتنا هي إللي كفرتنا مش إحنا إللي كفرنا عن سيئاتنا، بما أن إحنا إللي بنشتغل نفسنا ماحدش بيشتغلنا.
بما أن مصر هي إللي حصلت علي كل ده مش كل ده إللي حصل لمصر، فبناء علي كل ما سبق: «كأس العالم هو إللي خسر مصر مش مصر إللي خسرت كأس العالم».
وهو المطلوب إثباته.