"الدستور الأصلي" يبدأ نشر تقييم القراء لمسلسلات رمضان

تفاعل القراء مع ما نشره الدستور الأصلي أمس من طلب آرائهم حول الأعمال الدرامية التي تعرض في رمضان، وفي استجابة منهم أرسل القراء تقييمهم لمسلسل " دوران شبرا" والذي كان محل التقييم أمس و ننشر لكم تعليقات القراء :
جيري قالت" المسلسل المفروض انه واقعي بس انا اندمجت في الواقعية بحيث اني مش قابلة اي حاجة خيالية في الموضوع يعني مثلا كل شقق شبرا القديمة ايجار قديم ولا تساوي اي ارقام من اللي اتقالت علي لسان أبطال المسلسل ،المؤلف عايز يورينا ان الأولاد ممكن يضحوا بأمهم وبيتهم علشان يحلوا مشاكلهم بفلوس الشقة بس الشقة اكيد إيجار قديم يعني ماتتبعش بالأرقام اللي بيقولوها دي، وبعدين الشقة حتي لو فعلا تجيب نص مليون جنيه زي ما بيقولوا لما يقسموا الفلوس دي عليهم هما الاربعة نصيب كل واحد مايجيبش اوضة فوق السطوح ولا حتي في عزبة القرود"،أما بقي الكاركتر بتاع ماجدة واقعي جدا رغم ان انا واثقة ومتأكدة ان كل المسيحيين هايزعلوا من الشخصية دي بس صدقوني فعلا دي واقعية قوي واحدة مابتعملش اي حاجة في حياتها غير انها عايزة توقع عريس وطبعا الاستاذ اشرف بقي لقطة اول ما أبوه مات المحل وشقة أمه علي طول خلوه مؤهل لانه يبقي عريس للسنيورة اما بقي نصايح أم ماجده فهي تودي في داهيه بس فعلا كل الستات بيفكروا كده وبينصحوا بناتهم كده،اما السوبر هيرو في المسلسل فهي عزة – عزة بتنضف كل شقق العمارة والسلم والمدخل وبتطبخ كل ده في يوم واحد رغم ان كلنا كستات بيوت عارفين ان تنضيف الشقة علي ايدين اي شغالة كبيرة كهنة او صغيرة وغندورة زي عزة بياخد له اربع خمس ساعات يعني يدوبك شقة واحدة فاليوم بس عزة بايونيك وومان".
وقالت شيرين محمد" انا من شبرا والعمل عكس علاقة المسلمين والمسيحين الحقيقية فى شبرا فعلا مفيش فرق وفي محبة وإخاء عااااااااااااااالي جدا عمرنا ماحسينا بأي مشاكل طائفية شبرا بتضم فئات كثيرة سواء من الناحية الثقافية أو المادية ومع لك في تعايش بين جميع الفئات لاحظنا العلاقة الطيبة بين السكان والبوابة وده حقيقي انا شايفة ان المسلسل نجح في نقل الحياة بداخل هذه المنطقة العريقة"
وكان رأي محمد أشرف " المسلسل بطئ جدا في أحداثة كعادة مسلسلات رمضان والمسلسلات المصرية عموما فما يقال في حلقة يمكن ان يقال في لقطة بحرفية ولكن الإضافة الحقيقية في هذا المسلسل اكتشاف مجموعة من الممثلين الجدد في شريان الفن المصري ومنهم حورية ومريهان والجميلة المتالقة نرمين ماهر وفقدان بريق لآخرين مثل الفلة عفاف شعيب وابنها الكبير مش فاكر اسمة أحمد كمال باين وعلى العموم أداء الشباب في المسلسل مقبول وواعد"
وقالت منى ريان" اسوأ مافية كمية السجائر اللي بيدخنوها وعفاف شعيب بتفصلني أول ما تطلع"
أما طارق محمد فرأيه كان" أنا من شبرا والمسلسل في قمة السوء 13 حلقة ممكن كل أحداثهم تخلص في حلقتين بس، كم رهيب من المشاهد و الحورات المفتعلة بشكل غريب، نقطة اخير هو المؤلف عايز يقول ايه النهاردة الحلقة 13 و مش فاهم المسلسل بيقول ايه".
مروان القلموش يتفق إلى حد ما مع طارق في أن المسلسل طويل ولم تتضح فكرته بعد فقال"ممطوووووووط مطة السنيييييييييييييين و نرمين ماهر أوووووووووووفر بصراحة".
مصطفى فايز كان رأيه "مسلسل هادي أحداثه واقعية وجوه شبابيه زي الفل مفهوش تزعيق وخناق زي المعتاد..المخرج خالد الحجر مكسب كبير للدراما".
مسلسل اليوم: (شارع عبد العزيز)
إخراج : أحمد يسري.
تأليف: أسامة نور الدين.
بطولة: عمرو سعد، علا غانم، هنا شيحة، ريهام سعيد، سامي العدل، ميمي جمال.
غناء: أحمد سعد.
تدور أحداث المسلسل حول عبد العزيز الشاب الذي يحاول اثبات نفسه في شارع عبد العزيز ، في ظل العديد من التجار الذين سرقوا حق والده، ويستمر الصراع بين عبد العزيز والتجار.
أرسلوا تعليقاتكم لتنشر على موقع "الدستور الأصلي" على الإيميل: moslslat2011@gmail.com