طارق إسماعيل يكتب: إحنا بتوع الكورة

في حياتنا شخصيات دائما تظهر علي السطح ربما لا تكون من وجهة نظر الكثيرين مؤثرة لكنها بالتأكيد تترك شيئا في النفوس لأنها تمثل عالما آخر مختلفًا، فمثلا كان هناك شخصية فريدة وهو كبير مشجعي الاتحاد السكندري واسمه ريعو والمرحوم ريعو لم يكن مشجع كرة أو كبير مشجعين ده كان زعيم للناس اللي تحت يفهم في السياسة والاقتصاد والاجتماع لكن بمفهومه الخاص.. يعني الأخ ريعو شارك في هدم سرادق الوفد عام 84 بالإسكندرية أثناء إلقاء المرحوم فؤاد باشا سراج الدين كلمته وهو يري بذلك أنه عمل وطني جليل لأن الباشا من أعداء الثورة ويجب القضاء عليه كما تقول مبادئ الثورة، أيضاً الدولة استعانت بريعو لكي تواجه الدكتور محمود القاضي - رحمه الله - وكان رئيسًا لنادي الاتحاد وزعيما للمعارضة ويجب إسقاطه في دائرة العطارين وكان لريعو دور في ذلك وهكذا أصبح لريعو دور شعبي وسياسي وليس كرويا.. الوضع نفسه عندنا بالإسكندرية نجم آخر هو مشجع الاتحاد «الحن» يعشق الفانلة الخضراء وهو واحد من الظرفاء خفيف الظل ثقيل الوزن له نوادر وحكايات تصلح أفلام سيما وأتذكر وقت اغتيال السادات كان الاتحاد يلعب لقاء وديا مع الزمالك في القاهرة واشتبك «الحن» مع بعض جماهير الزمالك وعلي الفور قبض علي «الحن» وألقي به في مديرية أمن الجيزة وهناك نسي الجميع مشجع الكرة الذي دخل زنزانة الجماعات وبدأ يحسب عليهم وتعامل وكأنه واحد منهم وعبثا حاول الحن إقناع رجال الشرطة إنه بتاع الكورة وإنه ملوش علاقة لا بجماعات ولا السادات لكن مفيش فايدة الدولة تصر علي أنه واحد من قيادات الجماعة الإسلامية والجماعة داخل السجن فاكرين إنه مباحث مدسوس عليهم والرجل قاعد زي الكداب في الزفة مش فاهم أي حاجة خالص وفين وفين لما المرحوم عبدالله علي حسن - رئيس نادي الاتحاد - وقتها وكان عضوًا في البرلمان عرف طريقه وأخرجه من السجن.. الحكاية دي مكنتش آخر نوادر الحن لأنه لم يتعظ وأصر علي مواصلة نضاله مع الاتحاد السكندري وفي يوم كان الأخ الحن مش عاجبه مجلس إدارة النادي وأثناء دخول المستشار الجوسقي محافظ الإسكندرية وقتها إلي الملعب أراد الحن توصيل رسالة له بأن المجلس فاسد راح زعق وقال: ياسيد بيه المجلس كله حرامية المهم إن سيد بيه سمع الكلمة إن البلد كلها حرامية علي طول أمر بالقبض عليه وتم ترحيله لأجهزة الأمن وهناك بدأت عملية الاستجواب.. اسمك.. سنك.. مهنتك؟. ثم دخلوا في الجد.. نشاطك إيه يا عم حن؟ علي طول رد كورة.. الضابط استغرب كورة إيه يا أخ؟. نشاطك إيه يعني شيوعي إخوانجي ناصري؟. رد الحن كورة يا بيه ماليش نشاط في الدنيا غير كورة وقعد الحن يحكي للضباط علي حكايته وطبعاً هما غرقانين في الضحك.. لكن الأكثر سخرية اللي حصل بعد كده لما العميد قال له: رغم إن نشاطك كورة مش حنقدر نفرج عنك لأن سيد بيه شايف إنك خطر وبالتالي حتقعد معانا شوية.. المهم إن الحن مكنش زعلان أو مضايق أو غضبان لأنه بيتعامل كويس وبياكل تمام.. الشيء الوحيد اللي كدره إنه مكنش حيلحق لقاء الاتحاد والأهلي بعد أيام.. يعني هو مهتمش يعملو له قضية أو يدخلوه السجن وإنما مشكلته إنه يلحق لقاء الأهلي والاتحاد.
القصة اللي بحكيها كلها دي ليه؟ علشان سمعت إن المخبرين اللي قبضوا علي المرحوم الشاب خالد سعيد قال إيه خلصوا عليه علشان كان معاه فيديو يكشف تورط قسم سيدي جابر في صفقة مخدرات.. بالذمة ده كلام!! الراجل الغلبان خالد اللي قاعد يلعب علي الكمبيوتر وفي حاله ومالوش علاقة بأي حاجة في الدنيا حيفضح جهاز الشرطة!. خالد ده عامل زي الحن راجل طيب وفي حاله لكن لقي نفسه دخل في عش الدبابير وهو ما يعرفش.. مسكين الشاب خالد راح ضحية وانتهي أمره وبالتأكيد هو وأجيال كتيرة كان لازم يسمعوا عبدالحليم وهو بيقول لو أني أعرف خاتمتي ما كنت بدأت علشان كده حكيت حكاية الحن بتاع الكورة اللي لغاية دلوقت بيشجع الاتحاد وبيصر علي إن نشاطه الأساسي كورة وهو تصنيف جديد أصبح لدي الأمن بعد الإخوان والشيوعيين.