أحمد عفيفي يكتب : أسئلة حائرة!!

تفتكروا حسني مبارك وولاده .. مهربّوش فلوسهم فعلا بره مصر .. تفتكروا هما ناس طيبين واحنا اللي كنا ظالمينهم ؟ .. تفتكروا لو خرجوا النهارده من السجن حيعيشوا عيشة المصريين .. بلاش اقول الغلابة .. المصريين العاديين .. مستورين يعني .. تفتكروا ممكن نلاقي جمال مبارك مثلا بياخد قرض من البنك ب 110 الف جنيه مثلا عشان يسد ديون عليه لواحد صاحبه .. انا عن نفسي مفتكرش .. بل يقينا ممكن اقول انهم اول ما يخرجوا اقصد جمال وعلاء تحديدا حيسافروا بره ويبان المستخبي وتطلع الفلوس من تحت الارض ويطلعّولنا هما لسانهم انهم ضحكوا علينا وضربونا على قفانا .. وطبعا مبارك خلاص بينه وبين القبر فركة كعب ، بس هو كمان عنده - بلاش اقول مليارات - .. عنده ملايين .. متوزعة مابين بنوك العالم .. مش حيلحق يعمل بيها حاجة .. وحيورثها عنه مراته وعياله ويبقى زيادة الخير خيرين .. وصوتي ياللي منتش غرمانة!

لسه قاري دلوقتي مقال مهم لزميلي الصحفي كمال جاب الله في الاهرام وكتبه من سويسرا .. قال فيه ان مبارك وبشهادة الشهود عنده مليارات هناك .. واحنا هنا بعد الثورتين معملناش اى خطوة جادة لاسترداد الاموال دي .. لو عرفنا نجيبها وحطيناها في صندوق تحيا مصر .. يبقى لا حنعوز جنيه من فلان ولا علان .. بس تقول ايه .. الناس عندنا مش عايزين يوجعوا دماغهم .. ولا هما سايبينهم لمبارك وعياله يتهنوا بيها بعد ما يخرجوا .. ولا ايه الحدوتة بالضبط.؟ .. انا مش عارف .. اللي عارف يجاوبني.
.... اامبارح اسامة كمال استضاف عبد الرحيم علي في برنامجه 360 على القاهرة والناس .. وبيقول اسامة ان الاستضافة دي بمبادرة شخصية منه .. بمعنى بدون تدخل طارق نور .. وده طبعا كلام ساذج ميدخلش عقل طفل .. اكيد طبعا عبد الرحيم جابوه كترضية بعد اللي حصل معاه اخر مرة .. بس السؤال : وهما ناويين يرجعوه تاني ويفتح صندوقه الاسود .. طيب لو كان كده ، كانوا بيمّشوه ليه ؟ .. هما البهوات بيشتغلونا ولا ايه الحكاية بالضبط؟ .. انا مش فاهم .. اللي فاهم ينوّرني
.... احمد دومة وعلاء عبد الفتاح تحديدا .. محبوسين عشان قضية خرق قانون التظاهر .. وهى قضية تافهة جدا بصراحة وحرام انهم يتحبسوا بسببها لو حتى شهر واحد .. كان الموضوع ممكن يتلم بطريقة أشيك من كده .. لكن اللي حصل مقصود .. وكان ممكن الرئيس السيسي يفرج عنهم بجرة قلم هما وغيرهم .. لكن محصلش .. لييييه .. مش عارف .. انا مش مستوعب .. اللي مستوعب الحدوتة يقوللي.
.... السؤال الرابع : الناس ع الفيس نازلين شتيمة في يسري فودة ومحمود سعد .. لانهم بيحاولوا يفتحوا ملفات وبيحطوا مناخيرهم في حتت ممكن تعمل صداع للحكومة وللسيسي نفسه .. وبصرف النظر ان كان يسري او محمود صح ام غلط .. فإيه المشكلة ان يكون هناك برنامجين دمهم تقيل على قلب الحكومة قصاد 90 برنامج دم اصحابها زي العسل .. ماتسيبوهم يتكلموا .. على الاقل يعملوا منظر قصاد الناس اللي بره .. وان احنا عندنا معارضة وحرية رأى .. صحيح يسري فودة " مأفور " حبتين وتنقصه اللياقة احيانا في التعامل مع بعض ضيوفه خاصة ان كانوا من رجال الشرطة .. ومحمود سعد " هجّاص " .. وساعة الجد حيجيب واطي ، لانه مع احترامي له معندوش قضية .. يمكن يسري عنده رأى ثابت ماشي عليه .. محمود سعد معندوش حاجة خالص .. بس سيبوا الاتنين يتكلموا .. مش هما يعني اللي حيوقفوا المراكب السايرة .. فبلاش شرشحة ع الفيس وفي بعض مقالات الكتاب .. وخلينا نسأل بصراحة : انتوا عايزين معارضة ولا اعلام الصوت الواحد ؟
اللي يعرف اجابة يرد بيها عليا .. واللي ميعرفش يجي جنبي هنا ويتفرج معايا ع المشهد من بعيد .. وهو حيعرف كل حاجة!!