أحمد حلمي يُعلق على واقعة التحرش ب«فتاة التحرير»

علق الفنان أحمد حلمي، على واقعة التحرش بفتاة التحرير التي أثارت الجدل أمس، بعد تعريتها بالكامل وسط جموع غفيرة بميدان التحرير، خلال الاحتفال بتنصيب الرئيس عبد الفتاح السيسي.

وقال «حلمي»: «من صغري وانا بحب الكلاب.. وكنت بربي كلاب كتير جدا «ذكور واناث»، وفي تاريخ تربيتي للكلاب بكل أشكالها وأنواعها .. عمري ما شفت كلب مُتحرش».

وأضاف عبر حسابه على تويتر: «ممكن حد يقولي ماهو ده لانها كلاب متربية ومتدربة وعايشة في التكييف .. اقوله لآ .. دي كلها كانت كلاب شوارع .. كلاب بلدي زي مابيقولوا عليها.. كلاب جعانة وعيانة ونايمة تحت العربيات في الشوارع .. وكنت مربيهم في حتة أرض فاضية جنب العمارة .. ماكنتش مربيهم لا في شقة ولا في ڤيلا ولا حتى فوق السطوح.. وكانوا سكان العمارة بيآكلوهم من فضلات الأكل بتاعتهم».

وتابع: «اكتشفت إن الكلاب اللي معندهاش عقل ومبيحكمش تصرفاتها غير الغريزة طلعت محترمة وعندها مبدأ.. عمر غريزتها ماغلبت علي مبدأها.. حد عمره سمع ان في شوية كلاب اتلموا علي كلبة ونهشوا لحمها .. الكلب اللي معروف عنه إنه نجس .. طلع محترم وعنده مبدأ».

واختتم: «مش عارف أوصف المتحرشين دول بآيه .. لو قلت عليهم كلاب .. حقيقي هابقي بمدحهم وبشتم الكلاب».