اليوم.. الحصاد الثاني لورشة ضربة شمس.. ويطيب لي في مثل تلك المناسبة العطرة أن أطرش في وجوهكم العزيزة والجميلة بعض ملاحظاتي علي ما تلقيته طوال الفترة الماضية من مشاركات جميلة ومبشرة.. أولاً: أنا سعيد بكل ما أرسلتموه لي من مشاركات.. فلحظة اكتشافي أثناء تصفح مشاركاتكم لصورة متميزة أو لرسمة وراها فنان بجد أو لكتابة مختلفة أو بتعبَّر عن شيء حقيقي.. لحظة مثل تلك لا تعادلها لحظة أخري في السعادة (طبعًا وعشان ما ابقاش كداب فيه لحظات تانية بتعادلها وبتفوقها كمان في السعادة ولكن لا مجال هنا لذكرها..) إكتشاف تلك المشاركات المتميزة يعقبه إرسالها إلي Folder اسمه OK.. وتلك هي المرحلة الأولي.. المرحلة الثانية تجئ أثناء تصوري لشكل الصفحة.. والعنصر الرئيسي في الطبخة العامة.. ثم موائمة هذا التصور مع إختياراتي للكتابة والرسوم والفوتوغرافيا.. بحيث الفوتوغرافيا تخدِّم علي الكتابة.. والكتابة تمهد الطريق للفوتوغرافيا والرسم يبقي متماشي في النهاية مع دا كله.. لهذا.. ما ترونه علي هاتين الصفحتين طبخة أخري من طبخات ورشة ضربة شمس.. وهي طبخة ترتكز في الأساس علي الفوتوغرافيا والرسم ثم الكتابة.. الإختيار فيها كان معتمدًا علي إيه اللي لايق مع إيه.. بمعني؟!.. بمعني أنه لاتزال هناك مشاركات عديدة لم ترونها بعد.. وتستحق النشر.. وسوف تنشر.. ثانيًا: لايزال أنصار جماعة «الفكاكة بدون حدود» يواصلون إرسال مشاركاتهم بدون احتوائها علي البيانات المطلوبة.. بعضهم يعتذر في السطر الأخير من مشاركته عن إرسال صورة فوتوغرافية علي أساس إنه ماعندوش صورة 6*9 (مع إني ماطلبتش صورة 6*9.. أنا طلبت صورة واضحة للمُشارك في الورشة وبس).. والبعض الآخر يعتذر بأنه ماعندوش ولا صورة شخصية خالص.. والبعض الآخر بيكبَّر ومابيعتذرش وبيبقي واضح إنه يا إما «فكيك وناصح».. يا إما مايعرفش حاجة عن «ورشة ضربة شمس».. وسمع عنها من حد يعرفه فراح طارش أي بؤين علي الميل وكمان بإسم مستعار.. ولهؤلاء اللي مكبَّرين وعاملين فيها مش واخدين بالهم من شروط الإشتراك في الورشة.. أنا كمان باكبر عن أي رسالة «فكيكة» أو «ناصحة» وباعمل فيها مش واخد بالي من إنهم أرسلولي أي حاجة أصلاً.. ثالثًا: سوف أستمر حتي نهاية شهر يونيو في استقبال المشاركات في الكتابة والفوتوغرافيا والرسم.. بنفس الشروط الرئيسية.. الاسم الثنائي وتاريخ الميلاد والدراسة أو العمل وصورة شخصية واضحة.. اللي بعت وإتنشرله أو ما إتنشرلوش يبعت تاني.. مشاركة واحدة ساعات مابتعبَّرش عن صاحبها كفاية.. اللي متأكد إنه بيعمل حاجة بيحبها بجد.. يأكدلي ويأكد لنفسه.. رابعًا: الأسبوع دا حنبدأ لعبة جديدة في الورشة.. «الخوف».. إبعتولي مشاركات بالكتابة أو بالفوتوغرافيا أو بالرسم عن مفهومكم للخوف.. إيه أكتر لحظة خفتوا فيها في حياتكو؟! وإيه أكتر حاجة بتخوفكوا عمومًا؟! أو ممكن أي حاجة تانية خالص من خيالكم.. المهم يبقي ليها علاقة بالخوف.. والمرة دي يتكتب علي الإيميل كده بالظبط.. «ورشة ضربة شمس.. الخوف.. (كتابة أو رسم أو فوتوغرافيا).. خامسًا: بدءًا من الأسبوع المقبل وحتي نهاية شهر يونيو سوف يتم دمج مشاركات الورشة اللائقة للنشر في صفحة ضربة شمس.. بمعني.. أحلي الحاجات اللي حتجيلي علي الإيميل عمومًا.. هي اللي حتتنشر.. سادسًا: ركزوا أكتر يا جماعة.. دوروا علي الفكرة المختلفة.. ماتستسهلوش.. وفي نفس الوقت ماتفكروش إن الكتابة العميقة هي الكتابة المجعلصة اللي ماحدش يفهمها غير اللي كاتبها.. الكتابة أو الفوتوغرافيا أو الرسم.. تلات فنون.. علي قدما هُمَّه صعبين.. سهلين.. وعلي قد ما هُمَّه سهلين.. صعبين.. سابعًا: منتظر إيميلاتكو من النهاردة وحتي يوم الأحد القادم عن.. الخوف.. وروني خيالكوا بقي..