نانسي حبيب تكتب: دولة.. «طيور الظلام»

الجمل التالية مقتبسة من حوار فيلم طيور الظلام.. مع التحية لكبيرنا وحيد حامد

* المهم تبقى معانا.. سواء كنت بدقن أو من غير دقن
قيادات الإخوان لجماعة 6 أبريل وبعض السياسيين -مشيها السياسيين- الذين شاركوا في مؤتمر فيرمونت وأعلنوا تأييدهم لمحمد مرسي.
* لولا الملامة كنت عملت زي علي بابا لما دخل المغارة وصرخ وقال دهب.. ألماظ.. ياقوت.. حكمتك يارب
محمد مرسي بعد إعلان فوزه بالرئاسة ودخوله إلى قصر الاتحادية.
* الفرصة دي مش على مقاسي.. أصل الفرص زي الجزم لا تبقى ضيقة قوي تخليك تعرج ولا تبقى واسعة قوي تخليك تلق
محمد مرسي بعد توليه الرئاسة وبدء المظاهرات ضده أمام قصر الاتحادية.
* أنا زيك بالظبط مستنى الفرصة بس الفرصة اللي على مقاسي.. وهتيجي
عمرو موسى بعد إعلان نتيجة الانتخابات الرئاسية السابقة، ثم إزاحة حكم الإخوان وحتى اختياره رئيسا للجنة الخمسين.
* لازم تعرف إن إنت في أمان بسببي.. وإنت في نعيم بسببي
من قيادات الإخوان برئاسة خيرت الشاطر ومحمد مرسي إلى المجلس العسكري برئاسة المشير طنطاوي وسامي عنان.. والعكس.
* القانون زي ما بيخدم الحق بيخدم الباطل.. واحنا ناس الباطل بتاعهم لازم يكون قانوني
محمد مرسي يصدر الإعلان الدستوري في نوفمبر 2012 لتحصين قرارته وجعلها غير قابلة للطعن.
* ياختشي كده ينفع وكده ينفع
شيوخ الفضائيات الذين يصدرون فتاوى وعكسها في نفس الوقت.
* الجهاد في سبيل الله لابد له من ضحايا وإراقة الدم واردة وهذا مسجل عبر التاريخ.. الشهداااااء.. لهم الجنة
قيادات الإخوان والجماعة الإسلامية من على منصة رابعة.
* انتو عايزين ايه غير راجل فساد.. ده انتو موجودين بالفساد.. ده الفساد هو حجتكم الأساسية
بعض الحقوقيين ومنظمات المجتمع المدني التي تعيش على وجود انتهاكات لحقوق الإنسان.
* ثوري بقى ولا مش ثوري.. احنا مالنا ده شغل.. يعني خلاص بقى مطلوب مننا نعمل أي حاجة لأي حد يدفع؟.. سلو بلدنا كده
المحللين والمنظرين -مشيها محللين- المقيمين في قطر والذين يظهرون بشكل يومي على قناة الجزيرة.
* أنا أعلم عنك الكثير.. وأنا كمان أعلم عنك الكثير
من الإخوان للسلفيين.. والعكس.
* قبّلها أم لم يقبلها؟.. لكنه خالها..
حادثة ضبط النائب السلفي السابق علي ونيس مع "فتاة طوخ" وتأكيده لكمين الشرطة إنها خطيبته وكان يقوم بغسل وجهها بالماء بعد شعورها بالإعياء ثم قوله في التحقيقات إن الفتاة ابنة شقيقته.
* القضية فيها خمس ثغرات.. ثلاثة ينسفوها من أساسها والاتنين التانيين يرفعوا أنقاضها
مرتضى منصور متحدثا عن أي قضية.
* نحن نعلم أنه لا أمل لنا في الخروج من هنا في القريب ولكن الأمل أن تستمر المسيرة بالخارج كما ينبغي أن تكون
قيادات الإخوان من داخل السجون لأعضائهم الموجودين خارج السجون.
* لله الأمر من قبل ومن بعد.. لله الأمر من قبل ومن بعد
صفوت حجازي لحظة إلقاء القبض عليه بالدوجلاس!
* اكتساااااااااااااح.. اكتساااااااااح
أعضاء لجنة الخمسين بعد إعلان نتيجة الاستفتاء على الدستور بالموافقة بنسبة 98.1%.
* بس أنا خارج يا فتحي.. وأنا خارج قبلك
قيادات الإخوان إلى قيادات الحزب الوطني داخل السجن.. والعكس.
* البلد دي اللي يشوفها من فوق غير اللي يشوفها من تحت
إبراهيم محلب وهو واقفا فوق كوبري ترعة الزمر وتحته أكوام الزبالة.
* احنا شعارنا في المعركة الانتخابية.. أفعال لا أقوال
مرتضى منصور في انتخابات نادي الزمالك معلنا عن مفاجأة للأعضاء تتمثل في حفل تحييه هيفاء وهبي.
* فتحي فتحي.. أووه أووه
لسان حال أحمد راتب في احتفالية عيد الفن بالأوبرا وهو يهتف "منصورة بعدلي منصور والفتح جاي على إيد عبد الفتاح".
* المرحوم أبوك كان واخد مني خمس آلاف جنيه.. روح خدهم منه
خالد علي يعقد مؤتمرا لإعلان انسحابه من انتخابات الرئاسة رغم إنه لم يطالبه أحد بالترشح، ورغم عدم إعلانه هو شخصيا الترشح من قبل ورغم إن لجنة الانتخابات نفسها لم تعلن فتح باب الترشح بعد، ورغم حصوله في الانتخابات الرئاسية السابقة على 0.5% من الأصوات!
* اشتغل يا حبيبي اشتغل
لسان حال سامي عنان في مؤتمر إعلان عدم ترشحه للرئاسة وهو ينظر لمصطفى بكري والأخير يعلن أن انسحاب عنان سببه اجتماعه به أكثر من مرة ومطالبته بإعلاء المصلحة الوطنية.
* لو رشح نفسه في الانتخابات ينجح؟.. ده مش ينجح وبس.. ده يكتسح.. حتى التزوير ماينفعش معاه
انت وخيالك بقى!.. تفتكر مين؟