جوزي قليل الأدب وبيخانق دبان وشه!

السلام عليكم ورحمة الله وبركاته، أنا جوزي متقلب المزاج، اليوم اللي يبقى فيه كويس معايا ويعترف لي بحبه ويبقى حنين.. تاني يوم ألقى إنسان تاني متعصب وقليل الأدب وبيخانق دبان وشه.
ساعات بافكر إنه اتجنن أو مريض نفسي، وأي حاجة تافهة يعمل منها مشكلة كبيرة، وساعات أسأله إنت عايز تسيبني؟ يقول لي لأ أنا بحبك، ولو عايز أسيبك هاقول لك.
جوزي من 20 يوم قال لي ماتروحيش عند مامتك، ولما رحت عند ماما ورجعت وعرف قال لي إنتي طالق، وبعد كده اتصالحنا وحصل بيننا جماع، هو كده يبقى ردّني لعصمته ولا إيه؟
مع العلم هو ماقاليش أنا رديتك، ومش عارفة كان في نيته يردني ولا لأ، بس أنا سألت ماما وواحدة صاحبتي قالت لي يبقى كده ردك..
أنا محتارة، بحبه وعايزة أرضيه، وفي نفس الوقت عايزة أكون سعيدة بس مش عارفة هو ليه بيعمل كده، وهو أصلا إنسان كتوم جدا ومابيحكيش إيه اللي جوّاه أبدا.
مش عارفة هو بيحبني ولا لأ.. أنا هاتجنن ومحتاجة رد وحل..

amany3


السلام عليكم ورحمة الله وبركاته صديقة "بص وطل" العزيزة.. أما بعد..
من يسمع كلامك صديقتي في أن زوجك له تصرفات متقلّبة، ويوم يكون زي العسل حب وكلام حلو، ويوم يكون زي المجنون يخانق دبان وشه يصدقك ويقول فعلا دا يا مجنون يا مجنون.
واللي يشوف تصرفاتك ويعرف منك إنك لا تسمعين الكلام، أو تسمعيه وتعملي اللي على مزاجك مثل خروجك لبيت أمك مع إنه حذّرك ومنعك، يقول إنك بتصرفاتك خرّجتي الرجل من العقل ومن الدين ونطق كلمة الطلاق، التي لا ينطقها الرجل إلا بعد ما يكون وصل به الأمر للطريق الذي لا رجعه فيه، وهو الطلاق.
وخلاصة كلامي علشان تفهمي ما أقول أن تصرفاتك التي تتصورينها تافهة، ومايصحش ينفعل عليها زوجك كده ويتحول لمجنون أو مريض نفسي عنده هو كبيرة، وتحرق دمه لدرجة إنها تحوّله من حالة العقل لحالة الجنان دون أن يدري، "و أي حاجة تافهة يعمل منها مشكلة كبيرة".
يعني إنتي السبب والحق عليكي!
أما موضوع إنه طلقك وعاشرك معاشرة الأزواج فمعناه إنه ردك حتى من غير ما يقول لك، ويحلف لك إنه والله العظيم رجّعك لعصمته لأنه بيحبك ومايقدرش يستغنى عنك، لأن الطلاق الأول والثاني طلاق رجعي ما دام في أيام العدة اللي هي ثلاث حيضات، يعني بالبلدي ثلاثة أشهر من غير مأذون ولا أهلك ولا مخلوق يتدخل.
فإذا لامسك ترجعين لعصمته وتحسب عليكي وعليه طلقة، يبقى فاضل لكم طلقتين، واحدة يقدر يرجعك زي الأولى بالضبط من غير تدخّل من أحد، والثالثة يلزمك تتزوجي رجل غيره ويطلقك الرجل الثاني وبعدين يرجع زوجك يتزوجك مرة ثانية.
والحقيقة أنا قصدت أشرح لك حكاية الطلاق في الشرع عشان تعرفي إن تصرفاتك ممكن توصلك وتوصله لخراب البيت والفراق، والمصيبة لو كان فيه حمل وأولاد.
والخلاصة صديقة "بص وطل" العزيزة أن الزواج مش كلام في الحب، وليس حبيبك يندغ لك الزلط، وكلام الأمثال إيّاه، إنما الزواج مسئوليات وحب بالتصرفات، يعني الطاعة التي أمر الله تعالى بها لله ولرسوله صلى الله عليه وسلم ولأولي الأمر وهو الأب قبل الزواج، والزوج بعد الزواج، لقول الله عز وجل: {يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُوْلِي الأَمْرِ مِنْكُمْ} يعني الحب طاعة.
والحب أن تعرفي ما لا يرضي زوجك من تفاهات فتتوقفي عنها، والحب أن تحافظي على هدوء زوجك النفسي وليس دفعه إلى التحول إلى الجنون على طريقة "حبيبك اللي تحبه وعشمان فيه.. كتر عليه الأذية يبان لك اللي فيه"، وإنتي لقيتي الأذية بتطلع الجنان وخراب البيت بالطلاق.
فيا ريت، يا ريت تكبّري دماغك وتراجعي تصرفاتك عشان تحافظي على حب زوجك، وحالته اللي بيبقى فيها حنين وبيعبر لك فيها عن حبه.

لو عايز تفضفض لنا دوس هنا