أرجوك اديني رأيك: حبيبي أصغر منّي ومش عارفة أنساه

أنا مش عارفة أبدأ الكلام إزاي.. أنا عندي 23 سنة، ومشكلتي إن كان فيه واحد قريبي بيحبّني وأنا كمان حبيته، بس هو أصغر منّي بسنة، وجه اتقدّم لي، بس مامته ماكانتش موافقة، وبابا طبعا قال له إنه مش هينفع يوافق إلا لو مامته جت معاه..
المهم أنا وهو فضلنا زي المخطوبين لمدة أربع سنين، وكان كل الناس عارفين كده، بس إحنا كنّا لسه بندرس، بس أنا دلوقتي خلّصت الكلية وهو لسه، وهو حاول كتير يقنع مامته ويخلّي ناس يتوسّطوا علشان تقتنع، بس هي برضه مش موافقة وده بسبب فرق السن، وكمان علشان هو ابنها الوحيد.
المهم من حوالي 4 شهور أنا وهو سيبنا بعض؛ بس ده لأن حصل مشاكل كتير من ناحيته، هو كان دايما بيكذب وبيعمل حاجات كتير تزعلني، وقال لي أكتر من مرة إن موضوعنا مش هينفع.
حسّيت إنه مش باقي عليّ، وسيبته علشان كرامتي، وهو ماحاولش يرجع لي تاني، بس المشكلة دلوقتي إن أنا لسه فاكراه ومش قادرة حتى إني أوافق على أي حد بيتقدّم بسببه، مع إن هو عايش حياته ونسيني ولا كأنّي كنت حاجة في حياته، أصلا أنا مش عارفة أعمل إيه علشان أنساه؟ أنا ماعرفش عنه أي حاجة من أربع شهور، ودعيت ربنا كتير إني أنساه..
يا ريت تساعدوني.. أنا يمكن مش عايزة أنساه، بس أنا لازم أعمل كده.. بس إزاي؟ أنا حاسّة إني مش عايشة أصلا، ودايما باشوفه في الحلم.
أرجوك اديني رأيك..
stick_witu909


لو عايز تفضفض لنا دوس هنا