أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور.. على سفرة النهارده هيكون موجود مشروب الشيكولاتة والقرفة بالأيس كريم وسلطة الجزر والفاصوليا البيضاء و شوربة بكرات اللحمة والمشروم وستيك اللحمة بصوص البرتقال وكرات التمر وعلى السحور هنقدّم لك بطاطس مشوية بالأعشاب..
مشروب الشيكولاتة والقرفة بالآيس كريم مشروب الشيكولاتة والقرفة بالآيس كريم المقادير: 1⁄2 كوب عصير لبن بالشيكولاتة كوب آيس كريم بطعم الفانيليا 2 ملعقة صغيرة قهوة سريعة الذوبان 1⁄2 ملعقة صغيرة قرفة 2 ملعقة كبيرة سكر 3 كوب لبن بارد 3⁄4 كوب ماء الطريقة: 1- سخّني الميه ودوّبي فيها القهوة مع السكر، وبعد كده ضيفي عليهم اللبن والقرفة واللبن بطعم الشيكولاتة وقلّبي الخليط كويس لغاية ما يغلي. 2- دخّلي العصير في التلاجة وسيبيه لغاية ما يبرد جدا واضربيه بعد كده في الخلاط الكهربي لغاية ما يكوّن رغوة وممكن تضيفي سكر تاني لو احتجتي. 3- حطّي ملعقة اّيس كريم في كل كوباية وصبّي فيها خليط الشيكولاتة والقرفة وضيفي مكعبات ثلج وقدميها باردة. *************** سلطة الجزر والفاصوليا البيضاء سلطة الجزر والفاصوليا البيضاء المقادير: 1⁄2 كيلو جزر 1⁄4 كيلو فاصوليا بيضاء مسلوقة ملعقة كبيرة كزبرة خضراء مفرومة ملعقة صغيرة كمون مطحون ملعقة كبيرة بقدونس مفروم ملعقة صغيرة فلفل أسود 1⁄3 كوب عصير ليمون 1⁄3 كوب زيت زيتون ملح الطريقة: 1- قشّري الجزر وقطّعيه شرائح سميكة واسلقيه في كمية ميه مناسبة وشوية ملح وبعد كده صفّيه وسيبيه يبرد. 2- اخلطي باقي المقادير مع الجزر والفاصوليا في طبق وقدّمي السلطة. *************** شوربة كرات اللحمة والمشروم شوربة كرات اللحمة والمشروم المقادير: علبة مشروم مقطع 1⁄2 كيلو لحمة مفرومة 2 ملعقة كبيرة زيت زيتون 4 كوب شوربة لحمة 2 ملعقة كبيرة زبدة 1⁄4 كوب بقسماط ملح وفلفل أسود ملعقة كبيرة دقيق 2 بصلة مفرومة كوب لبن بيضة الطريقة: 1- سخّني زيت الزيتون في حلة علي نار متوسطة وضيفي معاه البصل والمشروم وشوية ملح وفلفل وقلّبيهم تقليبة خفيفة من وقت للتاني، وسيبيهم لمدة من 10 : 12 دقيقة. 2- اخلطي اللحمة المفرومة مع البيض والبقسماط وملعقة كبيرة من البصل المفروم والملح والفلفل الأسود، وشكّليها كرات صغيرة وحطّيها في الحلة وشوّحيها مع البصل والمشروم لغاية ما لونها يبقى دهبي، وبعد كده ضيفي عليها الشوربة، وسيبيها تغلي على نار هادية لمدة 20 دقيقة. 3- سيّحي الزبدة في حلة تانية وضيفي عليها الدقيق وقلّبيها لغاية ما الدقيق يبقى لونه دهبي، وبعد كده ضيفي عليه اللبن وقلّبيهم كويس لغاية ما كثافة اللبن تزيد معاكي، وبعد كده ضيفي الخليط ده للشوربة وقلّبيهم مع بعض لغاية ما تغلي، وبعد كده ارفعي الشوربة من على النار، واغرفيها في أطباق الشوربة. *************** ستيك اللحمة البقري بصوص البرتقال ستيك اللحمة البقري بصوص البرتقال المقادير: 3⁄4 كيلو ستيك لحمة بقري مقطّع شرائح رفيعة 1⁄2 كوب فلفل أخضر مقطّع مكعبات 2 ملعقة صغيرة نشا مذابة في ماء ملعقة كبيرة قشر برتقال مقطع 5 شريحة رفيعة زنجبيل طازج 2 ملعقة كبيرة صويا صوص 2 ملعقة كبيرة زيت سمسم (أو أي زيت نباتي) 1⁄2 كوب عصير برتقال ملعقة كبيرة سكر الطريقة: 1- سخّني الزيت في طاسة على نار عالية وبعد كده ضيفي عليه الزنجبيل وقلّبيه لمدة 10 ثواني أو لغاية ما ريحته تطلع. 2- شوّحي اللحمة مع الزنجبيل لمدة دقيقتين، وضيفي بعد كده السكر والصويا صوص وعصير البرتقال وسيبيهم على نار هادية لمدة دقيقتين. 3- حطّي الفلفل الأخضر وقشر البرتقال والنشا المذوّبة في الميّه على الخليط وقلّبيهم مع بعض على النار لغاية ما يبقى قوامه سميك، واللحمة تستوي. 4- قدّمي الستيك مع الصوص بتاعه في طبق التقديم وممكن تقدّميه مع مكرونة بالصوص الأبيض. *************** كرات التمر بالبسكويت وجوز الهند كرات التمر بالبسكويت وجوز الهند المقادير: 2 كوب تمر مفروم كوب بسكويت سادة مطحون 1⁄4 كوب فستق مطحون (أو أي نوع مكسرات) 1⁄4 كوب جوز هند 1⁄2 كوب زبدة الطريقة: 1- اخلطي كل المقادير مع بعض ماعدا الفستق وجوز الهند واعجنيهم بإيدك لغاية ما تتكون معاكي عجينة متماسكة. 2- ادهني إيديكي بشوية زيت، وشكّلي العجينة كرات متوسطة الحجم. 3- اخلطّي الفستق مع جوز الهند ولفّي فيها كرات التمر، وقدّميها. *************** بطاطس مشوية بالأعشاب للسحور.. بطاطس مشوية بالأعشاب المقادير: 1⁄2 كيلو بطاطس متوسطة الحجم ملعقة كبيرة روزماري 1⁄2 كوب زيت نباتي 3 فص ثوم مفروم ملح وفلفل أسود ملعقة كبيرة زعتر الطريقة: 1- قطّعي البطاطس على 4 قطع بالطول، وحطّيها في طبق واخلطيها مع باقي المقادير، وسيبيها لمدة ساعة. 2- حطّي البطاطس في صينية ودخّليها في الفرن لمدة 45 دقيقة على درجة حرارة عالية، وبعد كده طلّعيها وقدّميها واستمتعي ببطاطس خفيفة ولذيذة على السحور. وبكده تكون خلصت عزومة النهارده.. مستنيين تجرّبي وتقولي لنا إيه رأيك.. واستنينا بكره إن شاء الله مع عزومة جديدة.. نتمنى لكم صوما مقبولا وإفطارا شهيا بمشيئة الله.. سلااام،،،
