المرض يهدد خطبتي

السلام عليكم ورحمة الله وبركاته.. أرجو مساعدتي في حل مشكلتي وتخفيف معاناتي.. أنا كنت مخطوبة وخطيبي فسخ الخطبة دون سبب منطقي..
وبعد مرور شهر عاد ليوضح لي سبب بُعده غير المنطقي، حيث إنه اكتشف أن احتمال الإنجاب ضعيف، بالإضافة إلى أنه مريض سكر، ومن خلال إجراء عملية حقن مجهري يمكن الإنجاب بنسبة 20%، وعند علم أهلي بذلك رفضوا إتمام الزواج لأنهم يرون أن الله قد أوضح لنا ذلك قبل الزواج، فلا يوجد داعٍ للعب بالنار والدخول في دائرة مفرغة، وقد تحدثت معهم كثيرا دون فائدة، وأنا وخطيبي نحب بعضنا جدا.. فماذا أفعل؟
marwa


صديقتي الجميلة.. على الرغم من احترامي الشديد للأهل وضرورة موافقتهم ومباركتهم للعلاقة بين كل زوجين، لكني أوقات باقدر أقول وبقلب جامد، إننا مش لازم نسمع كلامهم في الغلط.
يعني لما يكون رفض الأهل راجع لأسباب مادية أو أسباب مرضية إحنا ملناش يد فيها بيكون ده مبني على خبراتهم المحدودة في الحياة، وعلى أنانية شديدة بإنهم عاوزين الأفضل وخلاص، بغض النظر عن الأفضل ده أفضل ليكي إنتي كمان ولا لأ؟
وكأن مريض السكر أو الشخص الغلبان أو البنت اليتيمة مالهمش حق يتجوزوا ويعيشوا زي باقي البني آدمين، علشان هما عاوزين دايما شخص سليم وغني ومأصل، سامحيني ده ظلم وقصر نظر.
صديقتي.. رأيي الشخصي إنك تصرّي على موقفك وتحاولي تقنعي أهلك، إذا كنتي بتحبيه فعلا ومقتنعة بيه، والأطفال دول رزق من عند ربنا، وكمان مافيش حد بيخسر أهله، هما هيزعلوا شوية وهيرجعوا يرضوا ويلينوا لو فضلتي متمسكة بموقفك، ومش هيكون فيه مشاكل بإذن الله.
وصدقيني كل إنسان معرّض للمرض ده، وممكن جدا بعد ما تتجوزي شخص سليم ييجي له السكر، وقتها هتعملي إيه؟ هتتطلقي يعني؟!
صدقيني إيمانكم بربنا وبالقدر والرزق وقوة حبكم هي اللي هتحدد مصير علاقتكم، لو إنتي خايفة وعاوزة تسمعي كلام أهلك يبقى أحسن تبعدي عنه بدون ما تجرحيه، ولو بتحبيه يبقى اتحدي الدنيا علشانه.. وإن شاء الله ربنا مش هيخذلك.
لو عايز تفضفض لنا دوس هنا