"شوربة السمك" على طريقة "شيماء"

السلام عليكم ورحمة الله وبركاته، أنا شيماء من تاني، الحمد لله إن الوصفة عجبت الجميع، وبجد أنا مبسوطة إنكم نشرتوها والناس حبيتها..
أنا حبيت أشارك مرة تانية بوصفة حلوة أوي ومتميزة ومناسبة جداً للجو البارد اللي إحنا فيه، والحمد لله كل اللي في البيت بيحبوها وهي شوربة السمك، وهي وصفة سهلة جداً ومشهورة في المدن الساحلية؛ ولكن بتختلف طريقة تنفيذها من منطقة لأخرى..
المقادير:
نصف كيلو سمك بلطي متوسط الحجم (أو على حسب عدد الأفراد) ويكون نظيف من الداخل ومغسول جيداً.
2 ثمرة طماطم كبيرة الحجم.
2 ثمرة بصل متوسطة الحجم.
بهارات مشكّلة (ملح- فلفل- كمون- جنزبيل بودرة أو طازج- قرفة)
2 فص ثوم مفرومين
1 ثمرة لومس (أو الليمون الناشف)
فص مستكة وفص حبهان
ملعقة كبيرة زيت
الطريقة:
1- نبشر الطماطم والبصل مع بعض ونضيف عليهم البهارات المشكلة.
2- نفرم الثوم ونحطه في طبق لوحده.
3- نحط ملعقة الزيت في الحلة بتاعتنا، ونحط فيها المستكة والحبهان، ثم نضيف الثوم المفروم حتى يصفرّ، ثم نضيف البصل والطماطم اللي عليهم البهارات ونقلب كويس.
4- نضيف عليهم حوالي لتر ماء دافئ أو ساخن، ونحط الليمون الناشف، ونسيبهم لحد ما يغلوا مع بعض.
5- نضيف السمك إلى الشوربة ونتركه من 5 إلى 10 دقائق بالكتير علشان ما يتهريش.
6- بعد ما يستوي نشيل الغطا من عليه، ويقدم ساخن مع الأرز الأبيض وطبعاً السلطة الخضراء.. وبألف هنا وشفا ويا رب تعجبكم بإذن الله.
في النهاية كل أسرة "قمر 14" بتشكر الأصدقاء اللي بعتوا لنا وصفاتهم الجامدة دي..
ويا ريت تجرّبوها فعلاً..
وفي انتظار آرائكم..
وكمان وصفاتكم الجامدة على لينك..
ورينا شطارتِك،،،