فسخوا الخطوبة علشان أخرت فلوس الجمعية

أنا كنت خاطب من شهرين وفسخنا الخطوبة ومشكلتي إني بحبها، واللي حصل إني كنت داخل معاهم في جمعية بادفع 4000 جنيه في الشهر بس مرتبي بيتأخر شوية على اللي بييجي من محلي بادفعه بس بتأخر، هما بصراحة ماكانوش بيقصّروا..
بس في شهر فبراير اللي فات كلمتني خطيبتي أو اللي كانت خطيبتي، يوم 1 فبراير كان يوم الجمعة وقالت لي وإنت جاي بكرة هات معاك إن شاء الله 2000 جنيه بس، وأنا ماكنتش قبضت والمحل ربنا مارزقش اليوم ده، جه يوم السبت اتصلت قلت لها أنا مكسوف ومش هاقدر آجي قالت لي إنت كل مرة كده..
المهم ماتكلمناش بقية اليوم لقيتها باعتة رسالة بالليل بابا هيطلق ماما بسببك، رديت برسالة قلت لها بطريقتك دي حتى لو معايا فلوس ماكنتش جاي، قعدنا مانكلمش بعض 4 أيام، وبعدين ربنا رزقني وجيت أرن عليها ماردتش الرنة، حتى رحت مشوار للمحل وقلت هاروح أدفع الفلوس لقيت والدتي في المحل بتقول لي أبو خطيبتك راح لأبوك وقال له كل شيء نصيب..
فاتصلت بيه قال لي خلاص كده، حتى مارضيش يقابلني، بعتّ له ناس ومافيش فايدة، وإحنا كانت علاقتي بيها اتطورت لدرجة كبيرة بس هي بنت، المهم لقيت والدي بيقول إن أبوها قال إني كداب ومابشتغلش وماعنديش فلوس بس أنا عندي اللي يثبت العكس، كلمته بردو مافيش فايدة بس أنا اتهورت وبعتت رسايل إهانة لأبوها وإهانة في شرفها، يعني كان ممكن أرجع بس قفلت الباب بإيدي وباحاول أرجّعها بس أبوها هو اللي منشّف دماغه.
مش عارف أفضل أحاول لأني بحبها وعرفت قيمتها ولا أحاول أنسى، أنا عايز حد يساعدني لأني لو وصلت لها هاقنعها، ولو أبوها وافق يتكلم معايا هاقنعه، مش عارف عندي أمل وبيزيد كل يوم، أنا عايز حد يفيدني لأني تعبان أوي وعارف إني اندفعت في اللي عملته وإنه غلط، بس الشيطان وتسرعي هو اللي خلاني أبعت الرسايل دي، مش عارف أفضل أحاول أرجعها ولا أحاول أنساها.
أنا لسه باحاول وبابعت للقريب والغريب، بس فعلا نفسي نرجع وأبوها يفهم إني غلطت وإني اتعلمت، وإني أكتر حد هيحافظ عليها ويحبها بجد، لأني بجد عرفت قيمتها لما ضاعت من إيدي ولو رجعت لي مش هاقدر أزعّلها أو أستغنى عنها لحظة، لأني اتعلمت وعرفت قيمتها صح ومايحافظش على الحاجة أد اللي كانت معاه ورجعت له، لأنه أكتر واحد عرف قيمتها وعارف أد إيه بيحبها.
بس أنا غلطت لكن أي غلط ممكن يتسامح فيه، نفسي أبوها يسمعني وأعرّفه إني ماكدبتش أنا كنت حريص بس بغباء، والغلط اللي غلطته من غير تفكير، وهي لو وصلت لها أو كلمتها هاقنعها وأبوها لو قعد معايا واتكلمنا هاقنعه بس هو عارف إني هاقنعه ومنشف دماغه، مش عارف أستمر أحاول أرجع ولا أحاول أنسى، وأهلها مش مخلييني أعرف أوصل لها، حتى تليفون البيت مفصول، مش عارف أعمل إيه، أرجو الإفادة والرد.

afahmey


صديقنا العزيز.. الرجل الذي يتركك من أجل جمعية فبعه ولا تكثر عليه التأسف، أنا لا أكاد أصدق حكايتك اللهم إلا إذا كان فيها تفاصيل مخفية لم تذكرها أنت.. ولكن مجرد أن تتأخر بالجمعية مدة يومين فيطلّق فيها الرجل زوجته، وعندما يصلون إلى أربعة أيام يترتب عليه فسخ خطوبة ابنته منك فهذا رجل -سامحني- لا يستحق كل هذا البكاء والشحتفة التي تبديها نحوه..
هذا رجل مادي يبحث عن الفلوس، والجمعية التي بينكما هي كانت سبب المصلحة، الله أعلم بظروفه وما وراءه، ولكن أي رجل عاقل لا بد أن يفرّق بين الزواج والمصالح المادية، وسأفترض معك أنه مزنوق ومدّي لناس كلمة إن الفلوس توصل لهم أول الشهر، فهل عندما يفسخ خطوبتك بابنته ستصل الفلوس في ميعادها؟ هل هذا من ذاك؟ وعلى أي أساس يلحس كلمته والفاتحة التي قرأها مع والدك من أجل 4 آلاف جنيه؟ صدقني الأمر لا يستحق..
وحتى ابنته أيضا من خلال رسالتك لا تستحق كل هذا الحب الذي تقوله يا صديقي، فهي لم تكلّف خاطرها بأن ترد عليك اتصالك أو تبحث عنك أو تطمئن على أحوالك أو تطلب أن تزورها لتراك، بل تبحث عن الفلوس والجمعية وإن شا الله حتى ألفين، كم هو غالٍ الحب لديها!
هذا بيت باعك ولم يفكر حتى في إعطائك فرصة لتدافع عن نفسك، ربما كنت سيئا في التعامل المادي، وربما كنت بتطلع روحهم في دفع الجمعية، وربما للموضوع أبعاد أخرى، ولكن كل هذا لا يكفي ليكون سندا قويا لفسخ الخطبة من طرف واحد، ودون حتى أن يخبر أهلك بالسبب كناس محترمين..
احمد الله أن خلّصك من هذه الأسرة المادية، ولا تُقدِم على ارتباط جديد إلا وأنت مستعد تماما، واحرص على مصلحتك واهتم بعملك وابحث عن مصادر دخل تعينك على الحياة، وإذا كنت كسولا أو متواكلا أو مماطلا فتخلّص من هذه العيوب السيئة لتبني شخصية يحترمها الناس، وعندما تختار اختر من يزنك كشخص لا كقيمة مادية، ومن يريد رجلا لا بنكا، وابحث عن أسرة صالحة تحسن التربية لا تحسن العد، وابحث عن بنت حلال تنشئ معها أسرة لا جمعية!

لو عايز تفضفض لنا دوس هنا