بالفيديو.. عيش الكيزر بالعسل

من النهارده مش هتحتاجي تشتري الكيزر من بره البيت؛ لأنك على سفرة دايمة هتقدري تعمليه بنفسك.
عيش الكيزر بالعسل
المقادير:
كيس خميرة فورية
2 ملعقة كبيرة عسل أبيض
2 ملعقة صغيرة روزماري
2 ملعقة كبيرة زيت زيتون
ملعقة صغيرة ملح
1⁄4 كوب مية دافية
ملعقة صغيرة لبن
3 كوب دقيق
كوب لبن
بيضة
الطريقة:
1- اخلطي الخميرة مع المية وسيبيهم على جنب لمدة من 10 : 15 دقيقة، وبعد كده اخلطي البيضة مع ملعقة اللبن وسيبيهم على جنب، وبعد كده سيحي الزبدة مع اللبن وسيبيهم على جنب.
2- ضيفي على خليط الخميرة العسل والملح والروزماري وقلبيهم مع بعض، بعد كده ضيفي الدقيق وخليط الزبدة واخلطيهم مع بعض كويس لحد ما تتجانس العجينة، وبعد كده ادهنيها بزيت الزيتون وغطيها وسيبيها لمدة ساعتين.
3- افردي العجينة على شكل مستطيل كبير مايزيدش سمكه عن 1 سم، وبعد كده قطعيها لشرائح طولية، وبعد كده قطعي الشرائح الطولية إلى مستطيلات صغيرة زي ما هو موجود في الفيديو، وبعد كده ابتدي اتني كل قطعة من الأطراف واعمليها على شكل كورة.

4- رصي كرات العجين في الصينية، وحاولي يكون فيه مسافات بينهم بسيطة، وبعد كده ادهنيهم من على الوش بخليط البيض، وبعد كده حطي الصينية في مكان دافئ وسيبيها لمدة 30 دقيقة، وبعد كده حطيها في الفرن لمدة 20 دقيقة لحد ما يكون لونهم بني، وقدميهم.. وبالهنا والشفا.

إضغط لمشاهدة الفيديو:
خلصت وصفتنا النهارده..
استنونا كل يوم مع وصفات جديدة..
سلام،،،