بالفيديو.. بيتزا بالجبنة من صنع إيدك

النهارده هنعمل مع بعض بيتزا بطريقة سهلة وبسيطة، ممكن تعمليها في البيت واستمتعي بوقت البيتزا مع العيلة، لأنها هتكون من عمايل إيديكي..
بيتزا بالجبنة
المقادير:
3 كوب دقيق
2 كوب ميه دافية
ملعقة صغيرة ملح
كوب خميرة فورية
1⁄4 كوب صلصة طماطم
ملعقة صغيرة عسل أبيض
1⁄2 كوب جبنة رومي مبشورة
1⁄2 كوب جبنة موزاريلا مبشورة
1⁄4 ملعقة صغيرة فلفل أحمر
زيت زيتون
الطريقة:
1- حطّي الخميرة في حلة وضيفي عليها العسل وكوب ميه واخلطيهم مع بعض، وبعد كده ضيفي الزيت والميه والدقيق واخلطيهم مع بعض، لحد ما يبقى الخليط متجانس ويبدأ يتماسك.
2- اعجني الخليط بإيدك على سطح مرشوش بالدقيق، لحد ما العجينة تتماسك في إيدك، وبعد كده حطّي عليها ملعقة زيت زيتون واعجنيها مرة تانية، وبعد كده غطّيها وسيبيها في مكان دافي لمدة من 30 : 40 دقيقة.
3- افردي العجينة مرة تانية على شكل دائرة، وقطّعيها لأربع أجزاء، وامسكي كل جزء وابدئي اثنيه بإيدك من الأطراف أكتر من مرة زي ما واضح في الفيديو، وبعد كده غطّيهم مرة تانية وحطّيهم في مكان دافي، وسيبيهم لمدة 20 دقيقة.
4- خدي واحدة من العجينة وابدئي افرديها وادهنيها بزيت الزيتون، وافردي عليها طبقة من الصلصة، وضيفي عليها الجبنة الموتزاريلا والجبنة الرومي وأي نوع جبنة تاني تفضّليه، وممكن تحطّي عليها خضراوات مقطّعة، وكرّري الخطوة دي مع باقي قطع العجين، ودخّليهم الفرن لمدة من 15 : 20 دقيقة، وبعد كده طلّعيها من الفرن وقدّميها.. وبالهنا والشفا.

ملحوظة:
ممكن تعملي قطعة واحدة بس من العجين، وتشيلي الباقي في أكياس بلاستيك، وحطّيهم في الفريزر واستخدميهم عند الحاجة.

إضغط لمشاهدة الفيديو:
خلصت وصفتنا النهارده..
استنونا كل يوم مع وصفات جديدة..
سلام،،،