فطيرة قرع العسل على "سفرة دايمة"

النهارده هنعمل فطيرة قرع العسل، ودي من الأكلات اللذيذة والخفيفة اللي ممكن تقدّميها لأسرتك ولضيوفك كمان...
فطيرة قرع العسل
المقادير:
11⁄2 كوب دقيق
1⁄2 ثمرة قرع عسل
1⁄2 كوب زبدة مقطّعة مكعبات
1⁄2 ملعقة صغيرة قرنفل مطحون
1⁄2 ملعقة صغيرة جوزة الطيب
2 ملعقة صغيرة قرفة
ملعقة صغيرة فانيليا
2 ملعقة كبيرة سكر
11⁄2 كوب لبن
4 بيضة
ملح
الطريقة:
1- اغسلي قرع العسل وقشّريه وقطّعيه مكعبات صغيرة واسلقيه، وبعد كده اهرسيه كويس أوي.
2- قلّبي الدقيق مع الملح والفانيليا والسكر وضيفي عليها الزبدة، وافركيها بإيدك لحد ما تحسّي إنها متماسكة، وبعد كده اخفقي بيضة واحدة وضيفيها على العجينة، وامزجيهم مع بعض كويس.
3- حطّي العجينة في كيس بلاستيك، ودخّليها الثلاجة لمدة 30 دقيقة.
4- اخفقي باقي البيض وضيفيه على القرع واخلطيهم كويس، وضيفي معاهم القرفة وجوزة الطيب والقرنفل واللبن، واخلطيهم كويس.
5- هاتي صينية وادهنيها بمسحة خفيفة من الزبدة، وطلّعي العجينة من الثلاجة وافرديها في الصينية وساوي أطرافها كويس، وخرّميها بالشوكة في أماكن مختلفة.
6- افردي طبقة القرع على العجينة، ودخّلي الصينية في الفرن لمدة 45 دقيقة لحد ما تتماسك كويس، ويبقى لونها بني خفيف وخرّجيها، وممكن تقدّميها سخنة أو باردة.. وبالهنا والشفا.
خلصت وصفتنا النهارده..
استنونا كل يوم مع وصفات أكل جديدة..
سلام،،،