بسكويت سهل وسريع للأطفال

لكل أصدقائنا اللي طلبوا مننا طريقة سهلة وسريعة لعمل بسكويت صحي للأطفال؛ جرّبوا وصفتنا النهارده وابعتوا قولوا لنا رأيكم فيها...
بسكويت سهل وسريع للأطفال
المقادير:
* بيضة
* 1⁄3 كوب زبدة طرية
* 1⁄2 كوب سكر بودرة
* ملعقة صغيرة فانيليا
* ملعقة كبيرة دقيق
* كوب ونصف دقيق
* 1⁄2 ملعقة صغيرة بيكينج باودر
* رشة ملح
الطريقة:
1- اضربي السكر مع الزبدة كويس جدا بالمضرب الكهربي، وبعد كده ضيفي عليهم الفانيليا وملعقة الدقيق.
2- بعد كده ضيفي عليهم البيضة، واعجنيهم مع بعض كويس جدا، وبعدين ابدئي في إضافة الدقيق تدريجيا، وبعدين ضيفي البيكينج باودر والملح، مع الاستمرار في العجن لغاية ما العجينة تتماسك، وبعد كده حطّي العجينة في كيس نايلون وشيليها في الثلاجة لمدة 30 دقيقة.
3- افردي العجينة بالنشّابة على سطح مستوي ومغطى بالدقيق؛ بحيث إن سمكها ما يزيدش عن 1⁄2 سم، وبعد كده هاتي قطاعات العجين وقطّعيها بأشكال مختلفة.
4- رصّي البسكويت في صينية ودخليها الفرن على درجة حرارة 180 وسيبيها لمدة 10 دقائق، وبعد كده طلّعيها وقدّميها لأطفالك... وبالهنا والشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،