كب كيك بالفراولة على "سفرة دايمة"

أعدّتها لكم: آية خالد
النهارده هنقدّم لك طريقة عمل كب كيك بقطع الفراولة، بخطوات سهلة وبسيطة علشان تقدّمي لأسرتك أحلى وألذ كب كيك على الفطار..
كب كيك الفراولة
المقادير:
1⁄2 كوب سكر أبيض ناعم
ملعقة صغيرة بيكنج بودر
2 ملعقة كبيرة دقيق ذرة
1⁄2 ليمونة مبشورة
ملعقة صغيرة لبن
كوب دقيق أبيض
كوب فراولة
1⁄2 كوب زبد
3 بيضات
للتزيين:
4 ثمرات فراولة عصير
1⁄2 1 كوب سكر بودرة
بياض بيضة
2 ليمونة
الطريقة:
1- اضربي الزبدة مع السكر وقشر الليمون في طبق غويط بمضرب البيض لمدة 3 دقايق، لحد قوامه ما يبقى ناعم جدا وتظهر رغوة، بعدها ضيفي دقيق الذرة والبيض، واضربيهم لحد ما تبقى العجينة متجانسة ومختلطة كويس.
2- ضيفي الدقيق والبيكنج بودر، وقلبيهم مع الخليط بملعقة خشب كبيرة، لحد ما يبقى مزيج متجانس وكثيف، وضيفي اللبن وقلبيه معاهم دقيقتين، واغسلي الفراولة وقطّعيها قطع صغيرة جدا، وضيفيها للعجينة وقلبيها معاهم.
3- حطّي ورق الكب كيك في الصينية المخصّصة، وصبّي فيه العجينة، ودخّليه الفرن على درجة حرارة 180 لمدة 20 دقيقة، ولما تستوي ووشها يبقى لونه دهبي، طلّعيها وسيبيها تبرد.
4- وللتزيين حطّي السكر البودرة في طبق غويط، ومعاه عصير الليمونتين وعصير الفراولة وبياض البيض، واضربيهم لمدة 5 دقايق بمضرب البيض، أو حطيهم في الخلاط، وبعد كده خدي منهم بالملعقة وزيّني الكب كيك، أو اغمسي كل واحدة من الكب كيك بالمقلوب في الكريمة وطلّعيها على صينية، وسيبيها لحد ما يجمد لوحده، وقدّميه لأسرتك على الفطار، وبالهنا والشفا..
وبكده تكون خلصت وصفتنا النهارده..
جرّبوها وابعتوا لنا رأيكم فيها..
واستنونا بكره مع وصفة جديدة..
سلام،،،