اعملي المربى في البيت مع "سفرة دايمة"

النهارده وبمناسبة إن المدارس خلاص على الأبواب، هنقدّم لك طريقة عمل أنواع مختلفة من المربى، علشان تعملي بيها أحلى السندوتشات لأولادك..
************

احتفظي بالمربى في برطمانات زجاجية معقمة
مربى الفراولة
المقادير:
كيلو فراولة
1 و1⁄2 كيلو سكر
2 ملعقة كبيرة عصير ليمون
الطريقة:
1- اغسلي الفراولة ونظّفيها، وقطّعيها لقطع متوسطة الحجم.
2- حطّي الفراولة في طبق غويط، وحطّي عليها نصف كمية السكر اللي عندك، وسيبي الفراولة في الثلاجة لمدة ليلة كاملة علشان تنزّل المية اللي فيها.
3- حطّي المية اللي نزلت من الفراولة في حلّة على النار وسيبيها لغاية ما تغلي، وبعد كده ضيفي عليها باقي كمية السكر اللي عندك، وسيبيهم يغلوا مع بعض شوية، وبعد كده ضيفي عليهم عصير الليمون.
4- بعد كده ضيفي قطع الفراولة وسيبيها تغلي شوية، وبعد كده قللي درجة الحرارة، واستمري في تقليب الفراولة لمدة 30 دقيقة تقريبا، أو لغاية ما المية تتكاثف على النار، بس خلّي بالك إنك تشيلي الريم اللي بيظهر على الوش، وأول ما تحسّي إن خليط الفراولة بقى سميك ارفعي الحلة من على النار، وسيبيها تهدا شوية، وبعد كده احتفظي بيها في برطمانات زجاجية معقمة.

************

القرنفل بيضيف للمربى طعم مميز
مربى الجزر
المقادير:
كيلو جزر مقشّر ومبشور
2 ملعقة عصير ليمون
1⁄2 كوب عصير برتقال
3 - 4 مسمار قرنفل
3 كوب ماء
كيلو سكر
عود قرفة
الطريقة:
1- اخلطي المية مع السكر على النار، وسيبيهم يغلوا مع بعض غلوتين لغاية ما السكر يذوب تماما، وبعد كده ضيفي القرنفل والقرفة وعصير الليمون وعصير البرتقال، وبعد كده ضيفي الجزر، وسيبي الخليط يغلي كله مع بعضه.
2- بعد كده قلّلي درجة الحرارة، وسيبي المربى على النار لمدة ساعة تقريبا مع الاستمرار في التقليب، لغاية ما كل المية اللي فيها تتبخر وتحسّي إن المربى بقى قوامها مناسب، وبعد كده ارفعيها من على النار وسيبيها تبرد شوية، وبعد كده صبّيها في البرطمانات، واحتفظي بيها في الثلاجة.

************

سيبي المربى تبرد قبل ما تصبّيها في البرطمانات
مربى البرتقال
المقادير:
كيلو برتقال
1 و1⁄2 كيلو سكر
كوب عصير برتقال
كوب عصير ليمون
2 كوب ماء
الطريقة:
1- قشِّري البرتقال وتخلّصي من القشرة البيضاء اللي جوّاه والبذور، والألياف اللي بتكون موجودة في قلب البرتقالة، وقطّعيه قطع صغيرة، وانقعيه في المية لمدة ساعتين.
2- اغلي قطع البرتقال مع المية وعصير البرتقال، وسيبيهم مع بعض على نار هادئة لمدة 25 دقيقة.
3- بعد كده ضيفي عليهم السكر وعصير الليمون مع التقليب لغاية ما الخليط يغلي، وسيبيهم مع بعض لمدة ربع ساعة أو لغاية ما قوام المربى يبقى كثيف، وبعد كده ارفعي المربى من على النار، وسيبيها تبرد شوية وبعدين صبّيها في البرطمانات، واحتفظي بيها في الثلاجة.

خلصت وصفاتنا النهارده..
استنونا مع وصفات جديدة كل يوم..
وكل سنة وإنتي طيبة..
سلام،،،