في ثالث أيام العيد هنقدم لكم سفرة متميزة وبسيطة، وفي نفس الوقت تكوني نوّعتي في أطباقك خلال أيام العيد، والسفرة دي هتكون مكونة من الكبسة السعودي، وسلطة الخيار بتتبيلة الزبادي، ومهلبية البرتقال، جرّبيها وتابعينا. كبسة سعودي المقادير: 3/ 4 كيو لحمة بالعظم أو الريش 2 كوب رز بسمتي 2 حبة بصل 2 حبة طماطم فلفل حامي 4 ليمون جاف (هتلاقيه عند العطار) 3 عيدان قرفة خشب حبهان قرنفل ملح وفلفل
الطريقة: 1- أول حاجة اسلقي اللحمة، وحطي في الميه اللي بتسلقيها البوكيه جارنيه (وهو عبارة عن بصل، وجزر، وكرفس، وورق لورا)، وبعد ما توصل درجة تسوية اللحمة حوالي 75% حطي ملعقتين صلصة طماطم، وتبّليها بالملح والفلفل، وبعدين صفّي اللحمة من الشوربة، وسيبيها تغلي على النار. 2- بعد كده افرمي البصل وحطيه في الزيت أو السمنة، وشوحيه على النار لحد ما يدبل، وبعدين حطي عليه الطماطم وقلبيهم مع بعض، وحطي اللحمة تتشوح معاهم شوية. 3- بعدين حطي الرز وقلبيه مع الخليط، وحطي كل التوابل اللي عندك، القرفة والقرنفل والحبهان والليمون الجاف وقلبيهم كويس؛ علشان المكونات تتداخل، وممكن تحطي المكونات دي في شاش. 4- قطّعي الفلفل الحامي قطع كبيرة، وحطيه على الرز، وبعدين صبي عليه حوالي 3 أكواب ونصف شوربة، وبعد ما الشوربة تغلي والرز يتشربها هدي النار وسيبي الكبسة على نار هادية لحد ما تستوي. 5- اغرفي الكبسة في طبق التقديم، وممكن تقدّمي معاها سلطة الخيار بتتبيلة الزبادي.. بالهنا والشفا.
سلطة الخيار بالزبادي ودلوقتي هنعرف طريقة السلطة سلطة الخيار بالزبادي المقادير: 2 حبة خيار 2 ملعقة كبيرة شبت مفروم 3 ملاعق كبيرة خل تفاح أو عادي لعمل التتبيلة: كوب زبادي ملعقة صغيرة بصل مفروم ملعقة كبيرة سكر أو عسل ملعقة ونصف صغيرة خردل ملعقة صغيرة عصير ليمون ملح وفلفل الطريقة: 1- اعملي التتبلة في الأول؛ وده بإنك تخلطي كل مكونات التتبيلة مع بعض، وخليهم في التلاجة لحد وقت التقديم. 2- قشّري الخيار وقطعيه شرايح، واخلطيه مع الشبت والخل وشوية ملح. 3- عند التقديم حطي التتبيلة على الخيار، وقدميها مع عيش محمص.. بالهنا والشفا.
مهلبية البرتقال واللبن مهلبية البرتقال واللبن المقادير: لعمل مهلبية اللبن: 2 كوب حليب 3 ملاعق كبيرة سكر ملعقتين كبيرة نشا لعمل مهلبية البرتقال: كوب عصير برتقال 2 ملعقة صغيرة نشا 2 ملعقة كبيرة سكر 2 ملعقة كبيرة مكسرات مجروشة الطريقة: 1- أول حاجة اعملي مهلبية اللبن؛ حطي النشا والسكر في اللبن، وقلبيهم بهدوء لحد ما تتأكدي إن السكر والنشا دابوا تماما، وبعدين حطيهم على النار مع الاستمرار في التقليب لحد ما الخليط يبقى كثيف. 2-بعد كده اعملي مهلبية البرتقال بنفس الطريقة، اخلطي عصير البرتقال والنشا والسكر، وقلبيهم لحد ما يدوبوا، وبعدين حطيهم على النار مع الاستمرار في التقليب، لحد ما تبقى كثيفة. 3- صبي المهلبية في الكاسات، ممكن تصبي مهلبية اللبن، وبعدين مهلبية البرتقال، أو ممكن تصبي مهلبية اللبن وتسيبيها تبرد شوية في التلاجة، وبعدين صبي عليها مهلبية البرتقال، ودخّليها تبرد مره كمان. 4- بعد ما تطلعيها من التلاجة زيّنيها بالمكسرات وقدميها.. بالهنا والشفا.