كلام يفطّر.. السر وراء مرسي والزبّالين

قصة واقعية حدثت بالفعل..
في أول اليوم وقبل الذهاب للعمل قال المصري..
قوّينا يا رب على الصيام.. استغفر الله العظيم.. اللهم إنّي صائم.. ياااااا رب.. يااااا رب عدّي يوم الصيام على خير.. ولا تجعلني أقول كلام يفطّر بسبب المواقف اللي بنشوفها.. اللي هي أشدّ من الحر اللي عايشين فيه.. صبرنا يا رب.. اللهم إنّي صائم..
في وسط اليوم قال..
لما أفتح التليفزيون علشان أشوف آخر الأخبار..
المذيع: أعزائي المشاهدين إليكم آخر الأخبار..
- رئاسة الجمهورية تؤكّد أن الإعلان عن اسم رئيس الوزراء سيكون قريبا..
- الرئيس محمد مرسي يقرّر صرف علاوة 15% للعاملين بقطاعات الدولة..
- الرئيس محمد مرسي يعلن حملة للنظافة يوم الجمعة القادم الموافق 27/ 7
قفل التليفزيون وقال المصري..
ربنا يقويك يا ريس.. وآديني هادي لك الفرصة كاملة وهاشوف هتنفذ وعودك ولا لأ.. وعن نفسي هاشترك في حملة النظافة دي على الأقل مش هارمي "زبالة" في الشارع..
قبل المغرب بساعة.. نزل المصري إلى الشارع ليشتري وجبة الإفطار ليتناولها في مقر العمل مع زملائه..
وإذا به يجد المهزلة الكبرى..
سيارة نقل تحمل قمامة ومخلفات من بقايا فروع شجر.. وأكياس "زبالة".. وقفت أمام عمارات العبور بشارع صلاح سالم.. وقامت بتفريغ ما تحويه على الأرض أمام العمارات..
وقف مذهولا.. وكان بعيدا عن المشهد.. انطلق نحو السيارة؛ لكنها انصرفت مسرعة قبل أن يلحظها أحد!!
فقال.. يا جدعان.. يعني على آخر اليوم كده.. وقبل المغرب تخلوني ليه أقول كلام يفطّر..
وعندما عاد إلى مقر عمله.. تحدث بما رآه مع زملائه.. فإذا بأحدهم يخبره أن صاحب محل في المنطقة التي يسكن فيها قبل أن يغلق أبوابه قبل الفجر.. قام بإلقاء مخلفات المحل أمامه، وعندما ذهب إليه قال له: "يا عم ما صندوق "الزبالة" قريب منك أهو.. ليه بترمي أدام المحل في الشارع كده..؟!".
فردّ عليه صاحب المحل قائلا: "أبقى خلي مرسي والإخوان ييجوا يلموا الزبالة هم.."، وضحك في سخرية وانصرف..
وحكى زميل آخر أنه رأى بعينه سيارة تابعة لشركة نظافة مشهورة قامت بإلقاء حمولتها من القمامة في وسط الشارع وانصرفت..
فقال لهم: "طب وهم مين اللي بيعملوا كده..؟!!".
فردّ زميل آخر وقال له: "يا عم إحنا صايمين ومش عايزين نجيب سيرة حد.. ده حتى المغرب لسه مأذنش..".

مش هاقول لك إن اللي عامل الحملة دي مستهدف بيها إنه يبوظ مشروع النظافة اللي عامله مرسي..
مش هاقول لك إن العربيات اللي بتفضي حمولتها في الشارع دي واخده تعليمات وفلوس، بالضبط زي عربيات السولار والبنزين اللي كانت واخده تعليمات وفلوس علشان تفضي الجاز والبنزين في الصحراء علشان تعمل أزمة، فتصدرها لمجلس الشعب علشان الناس تثور عليه..
مش هاقول لك إن اللي عامل حملة "ارمي الزبالة في الشارع.. وخلي مرسي والإخوان يلموها" هم شركة نظافة مشهورة قام مرسي برفض تجديد عقدها بعد تأكده أنها لا تقوم بواجبها..
مش هاقول إن اللي وراء تعويق برنامج ال100 يوم للرئيس واحد مشهور صاحب مصنع مشهور العمال عاملين احتجاجات ضد، ولا هاقول لك إنه واحد من لجنة السياسات في الحزب الوطني المنحل اللي كان مشارك في حملة دعاية لأحد المرشحين الخاسرين المحسوبين على نظام مبارك.. ولا هاقول لك إنه رئيس تحرير لجريدة مشهورة يكره أي خطوة إيجابية تقوم بها الرئاسة؛ لأنه يكره الرئيس و....
ولا بلاش مش عايز أجيب سيرة حد علشان أنا صايم.. ومش عايز أقول كلام يفطّر..
فردّ زميل آخر متسائلا: "أنتوا عارفين إيه الفارق بين عمال النظافة و"الزبالين"؟".. ثم استطرد مجيبا: "عامل النظافة هو الذي يتعب ويعرق كي ينظف ويجمع القمامة من الشوارع ومن أمام البيوت".
أمّا "الزبالون": "فهم أولئك اللذين يلقون بالقمامة في الشوارع.. وده على فكرة مش شتيمة ولا كلام يفطر.. دي وصف حقيقي لهم؛ لأن أنا شفت بعيني شباب زي الفل ماسكين أدوات نظافة وبيكنسوا وينظفوا الشوارع في حملة مرسي..".
فقال لهم الجميع.. الكلام اللي يفطّر بصحيح.. هو اللي يشوف حد بيرمي زبالة في الشوارع.. أو عربية بتفرغ حمولتها من القمامة في الشارع ويسكت؛ لأنه لو سكت يبقى... ولا بلاش أقول.. اللهم إني صائم..
اللهم إني صائم..
اللهم إني صائم..