الصديقة ياسمين.. هتقدّم لنا طريقة عمل فطيرة القرفة

النهارده حبّيت أشارك معاكم بطريقة عمل فطيرة القرفة cinnaparts، أنا بحب أعملها وأصحابي بيحبّوها، ودايما يطلبوها مني.. وحتى لو مش بتحبوا القرفة لكن صدقوني طعمها تحفة جدا..
فطيرة القرفة
المقادير:
2 كوب دقيق (وممكن تحتاجي شوية صغيرين كمان حسب العجينة ما تمسك معاكي)
3⁄4 كوب سكر بودرة أو سكر عادي (حسب ما تحبي)
قطعة خميرة بيرة أو معلقة كبيرة خميرة فورية
2 ملعقة كبيرة قرفة مطحونة
ملعقة صغيرة بيكينج باودر
3 ملعقة كبيرة لبن بودرة
2 ملعقة كبيرة زيت
ملعقة كبيرة سكر
ميه دافية للعجن
ذرة ملح صغيرة
سمنة سايحة
الطريقة:
1- اخلطي المكونات بالترتيب.. الأول الدقيق، وبعدين اللبن البودرة، والملح، والسكر، وقلّبيهم كويس، وبعد كده حطّي الخميرة والبيكينج باودر، وقلّبيهم كويس أوي، وبعد حطّي الزيت، وابتدي اعجنيهم بشوية ميه دافية لحد ما تتكون عجينة متماسكة مش بتلزق في إيدك.
2- سيبي العجينة تتخمر في مكان دافي حوالي ساعتين، وخلّي بالك إن دي من أنواع العجين اللي كل ما تتخمر كل ما كان طعمها أحلى وأخف.
3- وفي الوقت اللي العجينة بتتخمر فيه، ابدئي حضّري بودرة القرفة، وصوص الفانيليا.. وعلشان تحضّري بودرة القرفة كل اللي عليكي إنك تخلطي السكر البودرة مع القرفة، وشيلي الخليط ده في كيس على جنب.
4- لتحضير صوص الفانيليا: اخلطي كمية من الشربات العادي اللي بتعمليه للحلويات مع اللبن البودرة ورشة فانيليا، وقلّبيهم مع بعض جامد؛ لغاية ما تحسّي إن الصوص بقى سُمكه معقول زي سُمك الكريمة السايلة كده.
5- بعد ما العجينة تتخمر افرديها بالنشابة بحيث يبقى سُمكها صغير، وبعد كده قطّعها بالسكينة لقطع متساوية بالطول، وبعدين قطّعيها بالعرض؛ لأن الفطيرة دي أصلها إنها تكون قطع متشابكة.
6- بعد كده حطّي قطع العجينة في الكيس اللي فيه السكر والقرفة، واقفلي الكيس ورجّيه كويس علشان تتأكّدي إن العجينة اختلطت كويس، وبعد كده رصّي قطع من العجين بشكل عشوائي جدا فوق بعض في أي صينية صغيرة، وبعدين رشي فوقيهم شوية سمن سايح، وعليهم شوية من خليط السكر والقرفة.
7- بعد كده حطّي صف تاني من العجين، بس راعي إنك تشبّكي العجين كويس بإيدِك، وتحطّي شوية سمنة، وهكذا بس ما تحطّيش صفوف كتيرة؛ لأنها بتعلى في الفرن، وفي آخر صف، رشّي شوية سكر وقرفة.
8- دخّلي الصينية في الفرن وسيبيها لمدة 20 دقيقة، أو لغاية ما تتأكدي إنها استوت؛ بإنك تحطّي شوكة جواها ولو طلعت نظيفة تبقى العجينة استوت، وبعد ما تتأكدي إنها استوت، طلّعي الصينية من الفرن وسيبيها لمدة 5 دقائق وبعدين اقلبيها، وآخر خطوة إنك توزّعي عليها صوص الفانيليا.. وبالهنا والشفا.
ملحوظة:
1- العجينة دي مش بالضرورة تقطّعها وتعملي كل الخطوات اللي عملناها؛ لكن ممكن تفرديها بالنشابة، وتوزّعي فوقيها القرفة والسكر، وتلفّيها رول زي السويسرول، وبعد كده قطّعيها قطع، وحطّيها في صينية مدهونة بالسمنة.
2- ممكن تعملي الفطيرة دي بصوص الكراميل بدلا من صوص الفانيليا.. وطريقة تحضريه: إنك تخلطي كوب سكر مع ملعقتين ميه، وتحطّهم على النار من غير ما تقلّبيهم لحد ما السكر يغلي ويتحول للون الدهبي، وبعد كده هدّي النار، وانزلي عليهم بالكريمة اللباني أو قطعة قشطة لو مافيش عندك كريمة، وخدي بالك لإن السكر هيفور أول ما تحطّي الكريمة، وبعد كده قلّبي الصوص كويس واطفي النار عليه، وبعد كده حطّي نصف ملعقة سمنة وفانيليا على الصوص، وبكده يكون صوص الكراميل جاهز؛ بس يفضل إنك تعمليه والفطيرة في الفرن؛ لأن صوص الكراميل بيجمد على طول.
ودلوقتي هنشوف كليب يوضح لك طريقة رص العجينة

إضغط لمشاهدة الفيديو:
وبكده تكون خلصت وصفتنا النهارده..
استنونا بكرة مع وصفة جديدة..
يا ريت تجرّبوها وتبعتوا لنا تقولوا لنا على اقتراحاتكم..
ولو عايزين تشاركونا بوصفاتكم المميزة.. ابعتوا هنا