نصايح ذكية لأكلات رمضانية هنية (2)

لسه بنكمل استعدادتنا للشهر الكريم زي ما وعدناكم من الأسبوع اللي فات، والنهارده هنعرف إزاي نحفظ بعض الأكلات الجاهزة في الفريزر؛ علشان توفر وقت لست البيت وهي بتحضّر لفطار رمضان..
السمبوسك
احشيها بأي حشو تحبّيه ولفيها، وبعد كده ادهني سطحها بشوية زيت صغير، وقسّميها على أكياس بلاستيك مفرغة من الهواء، ولما بتيجي تستخدميها طلّعيها قبلها بساعة أو ساعتين وبعد كده اقليها في الزيت.
المكرونة بالبشاميل
ممكن تحضّري صينية مكرونة بالبشاميل، وتشيليها في الفريزر، وتطلعيها على السوى على طول، بس الأفضل إنك تعملي كده لو عندك عزومة تاني يوم، وعايزة تكوني مجهزة كل حاجتك من قبلها؛ لكن مش بيفضل إنك تشيليها لوقت طويل في الفريزر.
صلصة الطماطم المسبكة
الصلصة عامل أساسي بتدخل مع معظم أصناف الخضار اللي ممكن تعمليها زي البامية أو الفاصوليا أو البسلة، وعلشان تسهلي على نفسك ممكن إنك تعملي كمية من الصلصة المسبكة وتشيليها في أكياس، وفرّغيها من الهوا واقفليها كويس وحطّيها في الفريزر.
الشوربة
بتعتبر من الأطباق الأساسية على سفرة رمضان، وعلشان توفّري وقتك ممكن تعملي أنواع مختلفة من الشوربة وتقسّميهم على أكياس بلاستيك وتقفليهم كويس، بحيث إن الكيس ما يكونش فيه أي هوا، واحتفظي بهم في الفريزر، وكل يوم تطلعي كيس الشوربة اللي هتستخدميه وتحطيه على النار وفي خمس دقايق تكوني جهزتيها.
ومن أنواع الشوربة اللي ممكن تحفظيها الشوربة العادية أو المرق، واللي بتطلع من سلق الفراخ أو اللحمة، بس قبل ما تحطيهم في الأكياس صفّي الشوربة كويس من بواقي البصل والحبهان اللي فيها.
اللحمة المعصّجة
ممكن تعصّجي كمية من اللحمة المفرومة، وتقسّميها في أكياس بلاستيك، وتشيليها في الفريزر، وتستخدميها لما تيجي تعملي سمبوسك أو مكرونة بالبشاميل أو بطاطس محشية باللحمة المفرومة.
الفراخ البانيه والبوفتيك
ممكن تجيبي منهم كمية وتتبّليهم وتقسّميهم في أكياس بلاستيك، وتشيليهم في الفريزر، وبكده وقت ما تحتاجيهم، بتطلّعيهم قبل الاستخدام بشوية.
العصاير
ممكن تعملي العصاير والمشروبات اللي بتحبيها إنتي وأسرتك، وتقسّميهم في برطمانات زجاج أو أكياس بلاستيك، وتشيليهم في الفريزر.
وبكده كمان تكوني مستعدة لرمضان جدا جدا..
وتقدري تعملي لعيلتك كل يوم أكل طازة وفي أسرع وقت..
وكل سنة وكلكم طيبين،،،