السيناريو الثابت.. لفراق الأحباب

أنا مشكلتي إني مش عارف أحب أو حتى أختار صح، ويمكن كمان زي أي شاب إني مش جاهز كل مرة أقابل بنت وأحبها وتحبني تحلف لي إنها هتخلص ليّ، وإنها مش مهم الماديات ليها.. وفي النهاية تسيبني وتجرحني وتتخطب، أو حتى تتجوز غيري بس جاهز، وبعد فترة ترجع لي وتقول إنها ندمت على إنها سابتني، وساعات إنها بتفكر في الطلاق، وأنها ترجع لي.

الغريب إني في فترة أخدت طريق التسلية كنوع من الانتقام، والغريب إن أي واحدة ماحستش ناحيتها بالحب كانت عايزاني أوي، ودلوقتي حاسس إني تايه مش عايز أرجع للطريق ده تاني، ونفسي أرتبط بجد.. بس خايف لأتجرح لرابع مرة؛ أصلي حاسس إنه بقى سيناريو ثابت إني أحب وهي تسيبني وتتخطب ولا تتجوز.

First meet


بتقول خايف لتتجرح لرابع مرة وإنه بقى سيناريو ثابت.. وده صحيح ووارد حدوثه جدا جدا لو فضلت على طريقتك القديمة في دخول علاقات دون وضع هدف للعلاقة بحجة إنك مش جاهز، فكرتني بمقولة آينشتاين اللي بتقول: "الجنون هو أن تفعل الشيء مرة بعد مرة وتتوقع نتيجة مخالفة".

أنت فعلا بتختار غلط، ومش شرط اختيار الشخص؛ ولكن اختيار الفكرة، دلوقتي زي ما قلت أنت مش جاهز، ومع ذلك بتدخل في علاقات وبتحب، وبتنتظر من حبيبتك الإخلاص؛ لكن في النهاية بتسيبك وتتخطب أو تتجوز، رغم إنها قالت مش مهم الماديات، يمكن بيرجعوا تاني بس ده غلط برضه.

فياريت تبعد عن أي واحدة متجوزة، سواء كنت لسه بتحبها أو انتهى الموضوع بس جواك عايز تتسلى أو تنتقم، وحاول تلاقي حد جديد مناسب ليك، بس قبل ما تختار لازم تفهم حاجة مهمة:

عمرك ما فكرت علشان حبيبتك تكون مخلصة فعلا وتتنازل عن الأمور المادية، أنت هتديها إيه في المقابل، معظم البنات بيكونوا محتاجين الأمان، لو حد خد إيدك وخلاك تمشي في طريق ضلمة، مش عارف حتى هو آخره إيه أو فين.. يا ترى هتمشي معاه؟؟ طيب يوم أو اتنين الطريق هيطول ويمكن تقعوا كتير، بس أول ما هتلاقي حد جاي وفي إيده شمعة هتسيبه وتروح له، ده اللي بتعمله البنات اللي بيكونوا معاك في العلاقة.

بيدوروا على الأمان، وبيرجعوا لك تاني مش علشان الأمان عندك؛ لكن علشان ماقدروش يلاقوه في الضمانات المادية زي الشبكة والشقة والجهاز؛ لأن الأمان الحقيقي في المسئولية، وأنك ترتبط بكلمة وعهد مع حد، وبغض النظر أنت جاهز ولا مش جاهز، المهم يكون عندك نية الارتباط الحقيقي، وأنك تشارك الإنسانة دي حياتك بجد.

مش بس مجرد تسلية وتضييع وقت أو انتقام في حد مالوش ذنب بسبب قصص حب قديمة فاشلة، لو بجد أنت دلوقتي حاسس أنك تايه ومش عايز ترجع للطريق ده تاني، ونفسك ترتبط من غير ما تتجرح؛ جرّب تغير السيناريو الثابت.. يعني المرة دي دور على بنت مناسبة ومخلصة وترضى بإمكانياتك هي وأهلها، وروح اتقدم لأهلها وصارحهم بموقفك المادي.. قولهم أنت محتاج وقت قد إيه، وممكن تجهز في قد إيه؟

وماتقلقش لو نيتك خير، إن شاء الله ربنا هيرزقك وهيفتح عليك، وهتقدر تحقق كل اللي أنت عايزه، وصدقني في بنات كتير كويسين ومش بتهمهم الأمور المادية، بس أنت حاول تختار بعقلك، شخص متناسب معاك على كل المستويات.. وإن شاء الله ربنا هيوفقك.

لو عايز تفضفض لنا دوس هنا