حبيبتي التي أكرهها

أولاً أحب أشكركم على الموقع الجميل ده وعلى القسم ده بالذات بسم الله الرحمن الرحيم.
مشكلتي إني باتعذب كل يوم، أنا مخلّص معهد، ولما كنت في المعهد اتعرفت على واحدة بالصدفة وحبتها جداً أكتر من أي حاجة في الدنيا، وكنت باخلق أي حجج علشان أشوفها، ولما ادتني نمرة الموبايل بتاعها كنت باكلمها أكتر من تلات مرات يومياً؛ مع إننا بنتقابل في المعهد، واتخطبت مرتين وإحنا في المعهد، وكنت باعرف من أصحابها وتعبت نفسياً جداً؛ لدرجة إني اخترعت إني خطبت بنت خالتي علشان أغيظها؛ بس كانت كدبة باخية لأنها وقّعتني في مواقف محرجة، وبعد ما تفسخ الخطوبة ترجع لي وأنا كنت باصدّقها.
ولما خلّصنا المعهد عرضت عليها الجواز وسيبت لها فرصة تفكّر وتقول لأهلها واتفاجأت من ردها إنها عايزة تقابلني اتفقنا على ميعاد؛ بس أنا ما رحتش وما كلمتنيش تطمن عليّ لمدة شهر، وبعدين عرفت من واحدة صاحبتها إنها اتخطبت تالت مرة، أنا كرهتها وكنت عايز أنتقم منها؛ بس مع الوقت استسلمت للواقع وتعبت جداً. أنا بقالي 10شهور ما عرفش عنها أي حاجة ومش قادر أنساها وفيه بنت عايز اتقدم لها هي كويسة ومؤدبة وحاسس إنها بتحبني؛ بس مش قادر أنسى الحب الأولاني وخايف أظلمها معايا، ساعدوني أرجوكم أنا عايش مش حاسس بأي حاجة ولا أي حد.
علي
صديقنا العزيز
الحقيقة أنك حبيت غلط, اخترت غلط, يعني حبيت بنت عمرها ما حبتك, وكنت بالنسبة لها مجرد فاصل بين الخطوبة والتانية, وطبعاً حبك لها ما كانش بإيدك؛ بس اللي في إيدك إنك تنساها.
عارفة طبعاً إنه صعب ويمكن يكون مستحيل دلوقتي بالنسبة لك لأنك لسه خارج من الصدمة؛ بس لازم تحاول تنسى اللي حصل تنساها هي؛ بس ما تنساش الدرس اللي خرجت به من التجربة دي؛ فمش معنى إنك حبيت بنت وشايفها كويسة تبقي هي فعلاً كده, مش معنى إنك تحب إنك تكذّب عينيك وودانك وتصدّق بس قلبك اللي بيحبها.
إنت دلوقتي الحمد لله اتخرجت, يعني قدامك مشوار لازم تبدأه وأنت قوي وواثق من نفسك وكلك ثقة في إن ربنا بيختار لنا الخير حتى لو إحنا شايفين عكس كده, والحمد لله إنك استبعدت فكرة الانتقام منها؛ لأن اللي بيحب بجد مش ممكن يكره أو يؤذي حبيبه؛ بس مش لازم تخطب وأنت لسه مش قادر تنساها, وأنت لسه بتفكر فيها, وأنت لسه مش شايف غيرها, يمكن تكون فترة عشر شهور في العذاب اللي إنت عشته فترة طويلة؛ بس على قد حبك لها هتتعذب، والواضح إنك كنت بتحبها قوي؛ فلازم تتحمل وتصمم تنسى, والنسيان مش هيحصل طول ما إنت بتقاومه أو بتجبر نفسك عليه لما بتفكر تخطب واحدة تانية.
لازم تتحمل وتصبر على الألم ومع الوقت زي ما استسلمت للأمر الواقع مش هتقدر تعيش في الحزن والعذاب اللي إنت عايش فيه كتير, مع الوقت هتلاقي نفسك نسيتها؛ بس لازم تاخد وقت علشان تقدر تنسى, طبعاً مش سهل ومش معقول هتقدر تنساها بسرعة, وممكن حبها يفضل في قلبك سنين طويلة.
بس معنى كلمة تنسى هي إنك تقدر تعيش من غير ما تفكر فيها ليل نهار, من غير ما تشوفها في كل بنت قدامك, ومن غير ما تفتكرها كل ما تسمع أغنية كانت بتحبها أو تشوف حاجة بلون كانت بتحبه, لازم هتحزن وتتألم, ودي أعراض النسيان, ومع الوقت هتتعب من الحزن والألم, وهترضى بقضاء ربنا, وتؤمن بحكمة اختياره الخير لعباده حتى لو بدا ظاهر الأمر شر؛ بس حرام تظلم واحدة تانية معاك, وتخطبها وأنت لسه بتحب غيرها؛ فمن حقها عليك إنك تكون لها بقلبك وبعقلك.
صديقنا العزيز, من أجمل الجمل التي سمعتها عن النسيان هي "إني مش ممكن أنسى اللي راح بس خلاص ما عدتش حزينة", ولما تلاقي نفسك ما عدتش حزين تقدر ساعتها تدوّر على عروسة بنت حلال تكون لك نعم الزوجة؛ فبلاش تتسرع وربنا يعوّضك بخير, وابقى طمّنّا عليك.

لو عايز تفضفض لنا دوووس هنا