بتاع كله | الحياة مش بس فرص!

"مد إيدك، جرب، مش هتخسر حاجة، حاول مرة تانية... طيب شوف كدة الطريق ده بيودي لفين، إسأل "فلان"... تعالى ندور على النت، روح المركز "الفلاني" بيقولوا بيعمل الحاجات دي، في فرصة هناك روح جرب، روح قول لها انك بتحبها ياعم"
"بصراحة خايف يكسفوني - لا ياعم أحسن يطلعوا مش عايزين خريجين جداد هتبقى احراج آخر حاجة – خايف أتعب ع الفاضي – ياعم قالولي مش هينفع – خايف أقول لها وتحرجني"
ندخل بقى في المقال والكلام اللي عايزين نقوله..
في البداية مافيش اي سبب يخليني أشرح الكلام اللي فوق ده.. هو شارح نفسه بنفسه، أنا بس عايز أقول.. إن اللي عايز أي حاجة "ينجح – يبقى مشهور – يكتب مقال جميل – يشتري عربية – يتجوز البنت اللي معجب بيها.. إلخ" لازم يمد إيده ناحيتها.. ياخدها... يحاول مرة واتنين وتلاتة.
خد الخطوة الأولى ماتخافش مش هتخسر كتير.. ولو هتخسر.. هتخسر إيه
وقت "أديك بتتعلم"
فلوس "البني آدم هو اللي بيعمل الفلوس .. مش الفلوس اللي بتعمل بني آدم"
أصحاب "لما تلاقي صحابك مش واقفين جنبك وانت بتحاول أو لما تفشل يبقى مكانوش اصحاب أصلا"
أهلك "لو مش واقفين جنبك، أو مش مقتنعين بيك – حاول بقوة أكتر وانجح واثبت لهم ان كلامك انت اللي صح"
وانا صغير كنت بلعب في نادي وابويا كان السبب في إني مكملش فيه.. وفي وسط قرايبي بحكي الموضوع وانا متدايق، سمعت كلمة من بنت خالتي بتقول لي "كان لازم تتمسك باللي انت عايزه .. الحياة فرص"
فضلت كلمة الحياة فرص دي قدامي طول الوقت.. لدرجة اني مبقتش أفوت فرصة أحاول فيها.. أدخل هنا وهنا .. يمكن لسة موصلتش لحلم من أحلامي الكبيرة.. بس راضي عن محاولاتي لإن كلها كانت بجد... حبيت بس أزود كلمة "إن الحياة مش بس فرص".. الحياة فرصة ومدة إيد.
مدة الإيد دي هي المحاولة، هي التجربة اللي بتخلينا نكسب أو نخسر.. هي اللي بتوصلنا للي احنا عايزينه.
لو بتحب بنت ومعجب بيها.. مافيش أي سبب في التاريخ يمنعك من إنك تروح وتقول لها انك معجب بيها "طبعا لو فيه أصلا كلام بينكوا، مش عايزين غباوة".
لو ممدتش إيدك علشان تاخد اللي انت عايزه.. تبقى أصلا متستحقوش.