كيكة البرتقال المزيّنة بالأناناس

النهادره هنعمل كيكة خفيفة وكمان طعمها حلو جدا على "سفرة دايمة"، وهي كيكة البرتقال المزيّنة بالأناناس، جرّبيها وابعتي لنا رأيك فيها...

كيكة البرتقال المزيّنة بالأناناس
المقادير:
5 بيض
كوب سكر
كوب زيت
2 كوب دقيق
علبة أناناس حلقات
ملعقة صغيرة فانيليا
ملعقة صغيرة بيكينج باودر
2 ملعقة كبيرة بشر برتقال

الطريقة:
1- اخفقي البيض مع السكر والفانيليا والزيت في المضرب الكهربي.

2- ضيفي الدقيق والبيكينج بادور وبشر البرتقال على خليط البيض والسكر، وقلّبيهم كويس مع بعض لغاية ما يمتزجوا تماما.

3- هاتي الصينية اللي هتعملي فيها الكيكة، وحطّي فيها طبقة خفيفة من السكر بحيث تغطّي قاعدة الصينية بالكامل، وحطّيها على النار شوية لحد ما السكر يبقى لونه بني.

4- رصّي حلقات الأناناس في الصينية، وحطّي عليها الخليط، ودخّليها الفرن لمدة 40 دقيقة على درجة حرارة متوسطة.

5- بعد ما الكيكة تستوي طلّعيها من الفرن، وحطي عليها ميه الأناناس اللي موجودة في العلبة، وبعد كده اقلبي الكيكة في طبق التقديم، وممكن تزيّنيها بالكريم شانتيه أو قطع الأناناس الطازجة.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..