محشي ورق العنب

لكل أصدقائنا والبنات اللي لسه متجوزين جديد وعايزين يعرفوا طريقة عمل محشي ورق العنب، اعملوه معانا النهارده على "سفرة دايمة" وما تنسوش تبعتوا لنا رأيكم فيه...
محشي ورق العنب
المقادير:
2 كوب رز
1⁄2 كيلو ورق عنب
3 ثمرة بصل مفرومة
3 ثمرة طماطم مفرومة
خضرة محشي مفرومة (كزبرة وبقدونس وشبت)
2 ثمرة جزر مقطّعة شرائح
2 ثمرة بصل مقطّعة شرائح
2 ثمرة طماطم مقطّعة شرائح
ملح وفلفل وبهارات
4 ملعقة كبيرة زيت
عصير ليمونة
كوب شوربة
الطريقة:
1- اسلقي ورق العنب في مية مغلية وعصير الليمون، وبعد كده شيلي منه الفروع.
2- اخلطي البصل المفروم مع خضرة المحشي والطماطم المفرومة والملح والفلفل والبهارات.
3- حطّي الرز على الخلطة اللي عملتيها، وقلّبيهم كلهم مع بعض كويس، ولو بتحبي الأكل حرّاق، ممكن تحطّي شطة على الخلطة.
4- هاتي الحلة اللي هتعملي فيها المحشي، ورصّي فيها شرائح البصل والطماطم والجزر.
5- بعد كده احشي ورق العنب بخلطة الرز على الناحية الخشنة من الورق، ورصّيه في الحلة بشكل دائري، وفي الآخر رشّي عليهم شوية زيت علشان يدّي لمعة لورق العنب.
6- اسقي المحشي بالشوربة، وحطّي الحلة على نار متوسطة، وأول ما تحسّي إن الشوربة بدأت تغلي، قلّلي درجة الحرارة وسيبي المحشي على نار هادية لغاية ما تحسي إنه استوى، وعند التقديم اقلبي الحلة في الطبق.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت.