شوربة البطاطس بالكريمة

وصفتنا النهارده سهلة، وكمان مغذيّة، ومناسبة جدا مع البرد، وهي شوربة البطاطس بالكريمة، جرّبيها وابعتي لنا رأيك فيها، وماتنسيش تقولي لنا على كل الوصفات اللي عايزة تعرفيها..
شوربة البطاطس بالكريمة
المقادير:
* 4 ثمرات بطاطس مسلوقة ومقطّعة مكعبات
* بصلة مقطّعة مكعبات
* 1⁄4 كوب كريمة لباني
* بقدونس للتزيين
* 1 1⁄2 كوب لبن
* 3 كوب شوربة
* ملح وفلفل
الطريقة:
1- اخلطي اللبن والشوربة مع البطاطس والبصل، وحطّيهم على النار، وسيبيهم لغاية ما يغلوا، وبعد كده تبّليهم بالملح والفلفل.
2- ارفعي الشوربة من على النار، واضربيها في الخلاط لغاية ما المكونات تتجانس مع بعضها كويس، وبعد كده رجّعي الشوربة في حلة على النار، وضيفي عليها الكريمة، وسيبيها لمدة 5 دقايق على النار، وبعد كده صبّي الشوربة في طبق التقديم، وزيّنيها بالقدونس.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..