أنا جامعية.. وهو دبلوم!!

أنا اتعرفت على واحد أكبر مني ب3 سنين، وطلع مخلص دبلوم؛ وهنا كانت المشكلة بس بعد إيه بعد ما حبينا بعض، المهم حاولت فمرة أبعد عنه رغم ثقتي في حبه ليّ، وقفلت الموبايل لقيته بيتصل على البيت، وبيكلّم ماما وبيعيط لها في التليفون وبيقول لها أنا بحب بنتك وهي محترمة وما تزعليهاش، هو أصلا باباه هو السبب في دخوله دبلوم علشان هو الصغيّر والمفروض يشيل شغل باباه، المهم موضوع ماما عدّى على خير، وقالت لي ابعدي عنه بقى.

طبعا بعد اللي هو عمله زاد حبي ليه فرجعت كلمته تاني ولسه باكلمه، وهو عايز يدخل معهد عشاني!! بس هل لو دخل معهد وأنا في كلية حننفع لبعض؟!! وهل لو ما عرفش يقدّم في المعهد أكمّل معاه أنا مستعدة أكمّل، بس الناس حتقول إيه لو اتجوّزته ده أقل منها؟!! هو بيحبني أوي وصعب إن حد يسيب حد بيحبه أوي كده بجد ساعتها حكون غبية وبعدين المهم هو بيشتغل إيه وعنده شقة ولّا لأ؟!! وحيقدر يصرف على البيت ولّا لأ مش معاه شهادة إيه؟!! إنتم معايا في النقطة دي ولّا إيه؟ أعمل إيه؟ يا ريت التفاصيل دي تكون كافية.
ر . س