بحبها.. بس خايف يطلع حب مراهقة!!

أولا.. أحب أشيد بكل القائمين على موقع "بص وطل" والقائمين على هذا القسم، وباشكرهم كتير جدا.. أنا هادخل في الموضوع على طول؛ عشان مش أكتر من الكلام.

أنا شاب عندي 20 سنة، كنت ارتبطت قبل كده مرتين؛ بس حصل شوية حاجات كده وماحصلش نصيب، واقتنعت إن كل ده مجرد مراهقة، وإنه مش كان حب زي ما بيقولوا لعب عيال، وأنا دلوقتي فاضل لي سنة وأخلص كليتي بإذن الله .

أنا دلوقتي بحب واحدة قريبتي جدا، وحاسس بحبها عن أي مرة قبل كده، حاسس إنه الحب الحقيقي اللي الإنسان نفسه يلاقيه هي أصغر مني ب6 سنين، أنا قلت لها وصارحتها مادتنيش رد في الأول؛ لأنها كانت خايفة من أهلنا يعرفوا الموضوع ده، ويبقى فيه مشكلة بس بعد كده؛ لما كلمتها صارحتني بحبها، وقالت لي إنها بتحبني، وأنا قلت لها إني مش هاشغلها كتير عشان مذاكرتها ودراستها برضه؛ بس عرفتها إني بحبها وهاستناها.

بس هي مش تعرف إن البيت عندي عارف الموضوع ده، وهما عايزينها لي من الأول قبل لما أفكر فيها أصلا، وعندها في البيت متهيئ لي مش هيمانعوا.

كل خوفي بقى إن كل اللي بابني حياتي وأملي عليه دلوقتي أصحى في يوم مش ألاقيه زي المرتين اللي فاتوا، وقتها هاكون إنسان بلا هدف، بجد ماعدتش هاقدر إني أحلم بحاجة ممكن أحققها تاني.. آسف للإطالة؛ بس أحب أعرف رأيكم بجد في الموضوع ده. وشكرا لمجهودكم.

ahmed


لو عايز تفضفض لنا دوس هنا